Khuurakikha 50

1Yozefu waakwa khu mulaambo kwa paapa weewe, nga alikho alila kamasika luundi nga amuwunya imunwa. 2Lwanyuma Yozefu waalakila babaakaanisi beewe bakaangi, bakaange kumulaambo kweewe. Bakaangi baashikhola nga n'abalakila. 3Khuukaanga khuno khwabayilila biifukhu kamakhumi kane bibuufu. Babaandu ba Misiri baalila Yakobo khuumala biifukhu kamakhumi musaafu.

4Nga biifukhu bye khuulila ibyo byaaweelekho, Yozefu waatsya waakanikha isi baakhulu be mu lubili lwa Faraawo, nga abalomela ari, “Inywe siinga muba nga mwaasiimile, ni mutsye muboolele Faraawo bubakha buno muri, 5#Rak 47.29-31‘Nga paapa wase ashiili khufwa ta, aanoma naamwitsubila ndi, ikhaatsye imusiikhe mu ŋani isi umweene aaŋoonaŋoona mu shibala sha Kanaani.’ Nashiryo inoomba ndi, andekhuule intsye isiikhe paapa wase, nga naamalile, ikhaakobole.”

6Kila Faraawo elamwo ari, “N'utsye usiikhe paapa woowo, nga ni wamusuubisa uri ukhaashikhole.”

7Aryo Yozefu waatsya khuusiikha paapa weewe. Babaandu baakhulu be mu lubili lwa Faraawo, baamuroongesakho, mumulimo babaandu baakhulu be kamakyesi, ni baaraangilisi babaandi be mu Misiri. 8Babaandi babaatsiilakho baaba babaandu be muungo mwa Yozefu, ni babaandaaye, atweela ni babaandu babaandi babaaba baalebe be muungo mwaabwe. Khuurusakho babaana baabwe baakyeekhe, ni kamasheese kaabwe, ni tsimbusi tsaabwe, atweela ni tsikhaafu tsaabwe, nibyo byonyene bibyarama i Gosheni. 9Baaba basaani babaakyeendela mu makaari, atweela ni naabo babaakyeendela khu ŋwaaŋwa. Lyaba lituuli lye babaandu liboofu naabi.

10Lwanyuma lwe khukhwaambukha luluutsi Yorudaani, nga boolile i Atadi, khu lusha khweesi bawuulila iŋaano, Yozefu waashikhola baaba nga baalila ni kamaani keene khuumala biifukhu musaafu bibuufu. 11Babaandu be mu Kanaani babaaba nga bamenya ibweene iyo ni baabona babaandu bano baalilila khu lusha lwa Atadi, baaloma bari, “Nga khulila khuno khuli khwe kamaani naabi khweesi ba Misiri balikho balila.” Isho shaakila shiifwo isho baashilaanga bari Abeli Mizirayimu.#50.11 Abeli Mizirayimu: Lisiina lino mu Luheburaniya liwulilikha nga “Khukhwiilootsa khwe ba Misiri.”

12Musaambo iyo, basooleli ba Yakobo baakhola nga paapa waabwe umweene n'abalakila khuukhola. 13#Bur 7.16Baryo baasuta kumulaambo kweewe baakuyila i Kanaani, baatsya baakusiikha mwifuluma lye Makipela aambi ni Mamure, mu mukuunda kweesi Iburayimu aakula khukhwaama khu Efuroni umu Hiti. 14Lwanyuma lwayo nga Yozefu waamalile khuusiikha paapa weewe, waashuukha weelayo i Misiri, atweela ni babaandaaye, ni babaandu boosi babaatsya ni naye khuusiikha.

Yozefu aŋaŋasa babaandaaye

15Lwanyuma lwayo nga Yakobo waamalile khuufwa, babaandaaye ba Yozefu belomela bonyene bari, “Ari khwaamanyile khuri Yozefu atsya khukhubiyila ifwe, arakikhe khukhwiliyaasa byeesi ifwe khwamukhola niye.” 16Kila barumanisa buurume is'ali nga baloma bari, “Nga paapa weefwe ashiili khufwa ta, 17aakhulomela ifwe ari khukhuloombe iwe ukhwiyakhile ifwe bibyoonako byeefwe, ni buubi bweesi khwakhukhola khwiiwe, nga ni khwakhubirisaka buubi. Shikila ari khukhuloomba khuri, ukhwiyakhile ifwe babaakaanisi ba Wele wa paapa woowo, buubi bweefwe bweesi khwakhola.” Buryo buurume buno nga bwoolile isi Yozefu, waalila kamasika.

18Lwanyuma lwayo babaandaaye babeene, beetsa beenamisa kimirwe kyaabwe aasi khwiloba iburaangisi weewe, nga bamulomela bari, “Ifwe khuli ano baakulwa boowo.”

19Kila Yozefu abeelamwo ari, “Inywe mukharyakho shishiindu shoosi ta. Ise sinyala neera ise samweene mu shifwo sha Wele ta. 20Inywe mwakana khukhuukholakho ise buubi, ne Wele aashishuusa sheekyelamwo shiilayi, ari nio anyalise khuuwonesa buulamu bwe babaandu baakali naabi, nga n'ali khuushikhola khu mbuka yino. 21Nashiryo mukhabakho ni khuurya khwoosi ta. Ise kane imbalolelele inywe atweela ni babaana beenywe.” Musaambo iyo, Yozefu waaba nga abawooyawooya, waabeesamwo kamaani.

Khuufwa khwa Yozefu

22Yozefu waamenya mu Misiri atweela babaandaaye, khukhwoolesa n'afwa, nga woolesile kimiiko shitoondo shitweela ni likhumi (110) kye buukhulu. 23Niye ahangala khukhwoolesa n'abona khu baana ba Efurayimu, ni babetsukhulu beene. Naluundi aamenya khukhwoolesa n'abona khu baana ba Makiri, umwaana wa Manase, waabakaanila muungo mweewe. 24Kila alomela babaandaaye ari, “Ari bona ise ndi aambi khuufwa. Ne ilala Wele akhaabalolelele inywe buulayi, khukhwoolesa naalibaraangilila khuubarusa mu Misiri muno, abayile mu shibala sheesi aasuubisa Iburayimu, Isaaka ni Yakobo.” 25#Luky 13.19; Yos 24.32; Heb 11.22Kila Yozefu akyelasawo alayisa babaandaaye ari, “Ngana muntsitsubile, nga mumboolela muri nga Wele weetsile khubaraangilila waabayila mu shibala shisuubise, mulisuta kumulaambo kwase, mutsye ni nakwo.”

26Aryo Yozefu waafwa nga woolisile kimiiko kye buukhulu shitoondo shitweela ni likhumi (110). Lwanyuma bakaanga kumulaambo kweewe buulayi, baakubiikha mu sanduuku.

Currently Selected:

Khuurakikha 50: LCE

Highlight

Copy

Compare