Khuurakikha 47

1Aryo Yozefu waatsya isi Faraawo, waamuboolela ari, “Paapa wase ni babaandaayase beetsile khukhwaama mu shibala sha Kanaani. Beetsile ni kamasheese kaabwe, ni tsikhaafu atweela na buli shiindu shoosi sheesi bali nasho. Beetsile boolile mu shisiintsa she Gosheni.” 2Nga ashiili khuutsyayo ta, aanyoowa waaroboramo babaandaaye baraano waatsya ni nabo, waabayila isi Faraawo. 3Kila Faraawo abareeba ari, “Kumulimo kweenywe mulimo shiina?”

Nabo baamwiilamwo bari, “Musakhulu, ifwe babaakaanisi boowo khuli babaayi be kamasheese, nga baakuuka beefwe boosi ni baaba.” 4Baalooselakho baamulomela bari, “Khweetsile khuumenyakho mu shibala shino, lwekhuuba mu shibala she Kanaani iliyo intsala ingali naabi, ni bibyaayo byeefwe sibilikho ni bunyaasi ta. Shikila khukhuloomba khuri ukhufukiilile ifwe babaakaanisi boowo, khumenyekho mu shisiintsa sha Gosheni.”

5Faraawo waalomela Yozefu ari, “Shili shiilayi khuubona ndi paapa woowo ni babaandaayo boolile ano. 6Ne bona shibala she Misiri shoosi shili mu bunyala bwoowo, n'ubayile bamenye mu shisiintsa she shibala shino shishifuura buulayi. Ne nambaasa ndi batsye bamenye i Gosheni, nga nisho shiifwo shishiminyisayo buulayi. Ne siinga ibawo batweela khu nibo babaali babaayi baalayi, ubayile babe nga balolelela bibyaayo byase nase.”

7Lwanyuma Yozefu waareera paapawe Yakobo isi Faraawo, waamumwokesa. Nga isho shaweele shiryo, Yakobo waaloombela Faraawo tsikhabi. 8Faraawo waamureeba ari, “Iwe aluno woolesa kimiiko kyeenga kye buukhulu?”

9Yakobo waamwilamwo ari, “Kimiiko kyase kye bukyeendaani ari kyaayola kimiiko shitoondo shitweela ni kamakhumi kataru (130). Kimiiko ikyo kyaayimbeela kimisiro luundi kye biwaangafu. Nikyo sikyoolana ni kimiiko kyeesi baakuuka baase baahangala, nga bakyeendaana ta.” 10Lwanyuma Yakobo waaloombela Faraawo tsikhabi tsitsakamayo, waarurawo waatsya.

11Aryo Yozefu waawuliilisa byeesi Faraawo aamulomela, waayila paapa weewe ni babaandaaye, waabawa bye buyiindifu mu shisiintsa shishifuura buulayi mu shibala isho she Misiri, mu shisiintsa she Ramusesi. 12Yozefu waawa paapa weewe, ni babaandaaye, ni babaandu be muungo mwa paapa weewe, khuusiintsiila khu bukali bwe babaana, biilyo bibibamala boosi.

Intsala mu Misiri

13Intsala yalya naabi, shaakila yaataambawo biilyo buli aandu oosi. Babaandu be mu Misiri ni be mu Kanaani, bataambataamba naabi lwe ntsala iyo. 14Baryo babaandu ni beetsa khuukulaka bilyo, Yozefu waaba nga abuusa tsinusu tsoosi khukhwaama khu baandu be Misiri ni be mu Kanaani, waatsiyila mu lubili lwa Faraawo. 15Babaandu boosi tsinusu tsaabawakho, shikila ba Misiri beetsa isi Yozefu baamulomela bari, “N'ukhuwe biilyo! Ukana ifwe khufwe nga iwe waaloleleele busa? Tsinusu tsoosi tsaakhuweelekho.”

16Kila Yozefu abeelamwo ari, “Ni mutsye mureere bibyaayo byeenywe, siinga muba nga si muli ni tsinusu ta, ise kane imbawe biilyo.” 17Khukhwaamila abweene awo, babaandu baatsya baareera bibyaayo byaabwe isi Yozefu, naye waabawa biilyo, nga akulaanisamwo ni tsiŋwaaŋwa, kamasheese, tsimbusi, tsikhaafu, ni tsisikilya. Mu mwiiko ukwo kwoosi, waaba nga akulaanisamwo biilyo ni bibyaayo byeesi baareera.

18Mu mwiiko kukweelakho babaandu beetsa luundi isi Yozefu, baamulomela bari, “Musakhulu, ifwe singene khwiibisabise khuri khuli buulayi ta! Tsinusu tsoosi tsaakhuweelekho, ari bona ni bibyaayo nabyo byoosi bili mu makhono koowo. Ari mbaawo sheesi khuramile nasho sheesi khunyala khwaakhwookesa ta, khuurusakho kimibili kyeefwe ni liiswa lyeefwe. 19Ukhakhulekha khwaahela nga waaloleleele busa uryo ta! Khuloomba khuri ukhukule ifwe fabeene atweela ni liiswa lyeefwe lyeene, ukhuwemo biilyo. Ifwe kane khwikyele baakulwa ba Faraawo, niye ayile ni liiswa lyeefwe lyeene. N'ukhuwe bumiitso, khunyalise khuuba baalamu, ni liiswa lyeene lilekhe khuba awo busa ta.”

20Aryo Yozefu waakula liiswa lyoosi lye mu Misiri khulwa Faraawo. Lwekhuuba babaandu be mu Misiri boosi, buli mutweela aakulisa liiswa lyeewe lwe intsala iyaba imbi naabi. Liryo liiswa lyoosi lyeekyela lya Faraawo. 21Musaambo iyo, Yozefu weekyelisa buli mutweela khuuba umukulwa wa Faraawo, khukhwaama mu shisiintsa she Misiri shitweela khuutsya mu shiindi. 22Liiswa lilyarama lyeesi aakhaakula ta, nilyo lilyaba lye basaayi, lwekhuuba nibo baafunatsaka bibibamala khukhwaama wa Faraawo. Isho nisho shishakila baalekha khukulisa liiswa lyaabwe ta.

23Lwanyuma Yozefu waalomela babaandu ari, “Ari mwaamanyile buulayi muri ise naabakulile inywe mwabeene, atweela ni liiswa lyeenywe khulwa Faraawo. Bona indikhuubawa bumiitso mutsye mubyaale mu mikuunda. 24Ne nga imbuka iye likyesa yoolile, muli ni khuureera shisiintsa shitweela she kharaano isi Faraawo. Inywe mwabeene mwiramisile bibiramile khuuba biilyo byeenywe ni be muungo mweenywe.”

25Nabo babaandu baamwiilamwo bari, “Iwe waawonesile buulamu bweefwe, waabeele umulayi isi khuli, nashiryo musakhulu, ifwe kane khube baakulwa ba Faraawo.” 26Aryo Yozefu waarusa likaambila khuutsya mu Misiri mwoosi, liliwaamba khu shisiintsa shitweela she kharaano she bibikyesebwa byoosi khuuba sha Faraawo. Likaambila lino lishiiliyo khukhwoolesa ni shaleelo shino. Khuurusakho liiswa lye basaayi lyonyene nilyo lilikhali mu bunyala bwa Faraawo ta.

27Babaandu ba Isiraeli baaba nga bamenya mu shisiintsa sha Gosheni, ibweene iyo baaba bayiindifu naabi, naluundi basaalana, lisaaye lyaaba liboofu naabi. 28Yakobo waamenya mu Misiri khuumala kimiiko likhumi na musaafu, khukhwoolesa ni oolesa kimiiko kye buukhulu shitoondo shitweela ni kamakhumi kane na musaafu (147).

29 # Rak 49.29-32; 50.6 Ne imbuka yeewe iye khuufwa ni yoola, Isiraeli walaanga umusooleli weewe Yozefu waamulomela ari, “Iwe siinga uba nga ungana ise, ikhuloomba ure kumukhono#47.29 Ure kumukhono: Bona khusontsoola khukhuuli mu suula iye 24.9 kwoowo mu maraango kaase untsitsubile uri kane untsokesanise shiisa ni bubwiyikinwa. Intsitsubile uri singene usiikhe ise mu Misiri muno ta. 30Ne nikane imbe nga naafwiile, ukhaasute kumulaambo kwase khukhwaama ano mu Misiri, umbile usiikhe isi baasiikha baakuuka baase.”

Yozefu waamwiilamwo ari, “Ise kane ikhole nga n'ulomile.”

31Yakobo waalooselakho ari, “Ingana ukholele ise shishitsubo, khukhwookesanisa uri ukhaasikhole.”

Yozefu waakhola shishitsubo isho, Yakobo weenamisa kumurwe kweewe, imurwe we bulili bweewe waasiima.

Currently Selected:

Khuurakikha 47: LCE

Highlight

Copy

Compare