Khuurakikha 39

Yozefu n'umukyelama wa Potifari

1Ari ba Ishimaeli nga baamalile khukhwoolesa Yozefu mu Misiri, baamukulisa wa Potifari, umusaani umu Misiri, uwaba mutweela khu bakhulu ba Faraawo, nga niye uraangilila baaliindi be mu lubili.

2 # Bur 7.9 Umukasya waayeeta naabi Yozefu, musaambo iyo, waaba nga akhola buulayi mu buli shiindu shoosi sheesi aakholatsaka. Aryo waamenyatsaka muungo mw'omukoosi weewe umu Misiri uyo. 3Potifari wemenielesa, waashifumbula nga ilala Umukasya aaba ali ni Yozefu, naluundi waashibona nga Umukasya aamuyeetatsaka naabi mu buli shiindu shoosi sheesi aakholatsaka. 4Musaambo iyo Yozefu wekhoyesa naabi Potifari, waamwikyelisa umuloleleli weewe uwa buraawa. Isho shaakila waamwikyelisa umukhulu we muungo mweewe mwoosi, waamuwaambisa buli shiindu shoosi sheesi aaba nasho. 5Khukhwaamila abweene awo, nga baaweele Yozefu buukhulu ubwo, Umukasya waarakikha khuuwa muungo mwa Potifari tsikhabi tsingali khulwa Yozefu. Tsikhabi ts'Omukasya itso tsaaba khu biindu bya Potifari byoosi, bibyaba mu ntsu mukari ni mu mikuunda kyeewe. 6Musaambo iyo, Potifari waalekhuulila Yozefu buunyala bwoosi bwe khuulolelela buli shiindu. Aryo waalekha khubakho ni sheesi eyembelela shoosi ta, khuurusakho khuukhalawo bilyo shiina byeesi aba alya.

Yozefu aaba umusaani umushishifu buulayi, luundi aaba abonekha buulayi naabi. 7Lwanyuma nga imbuka yaabirirewo, umukyelama wa Potifari waarakikha khukhwikoomba naabi Yozefu, nga akana ari atsye akone ni naye.

8Ne Yozefu niye wekaana nga amulomela ari, “Umukoosi wase waayikhola ise khuuba umuloleleli we bibiindu byeewe byoosi mu ntsu yeewe. Buli shiindu shoosi sheesi ali nasho shili mu makhono kaase. 9Ise ndi ni buunyala mu ntsu muno bubulekhaana ni bubweewe. Naluundi niye mbaawo shishiindu shoosi sheesi akhamaambisa ise ta, khuurusakho iwe wenyene, lwekhuuba iwe uli umukyelama weewe. Nashiryo, ise inyala ndyeena khuukhola shiibi shishifwaana shiryo mu moni tsa Wele?” 10Ne abe yakhaba nga umukhasi uyo aamuŋuunyilisa aryo buli shifukhu, nga akana ari atsye akone ni naye, Yozefu ekaanila ilala.

11Ne yabawo shifukhu shitweela, Yozefu wenjila mu ntsu khuukhola kimilimo kyeewe, nga mbaamwo na mutweela khu baraambi babaandi ta. 12Kila umukhasi amuloondakho, waamukumila ingubo yeewe, nga amulomela ari, “Yiitsa khukone.” Ne Yozefu weyabulamwo ingubo, waatitukha waarura ibulafu, waamulekha ni nayo mukhono.

13Ne umukhasi n'ashibona ari Yozefu waatitukhile waarurire ibulafu, waamulekhile ni ngubo yeewe, 14waarakikha khuukhupa liyoombo, nga alaanga baraambi basheewe, waabalomela ari, “Bonakho! Umusaani umu Heburaniya isi umuseetsa wase aareera ali khuukhureerera bye kamaŋaanyu! Abe etsile mu shiseenge shase bari akana khuukona ni nase, ne ise naakhupa liyoombo liikali lilyeene. 15Naye nga n'abone aryo, waatitukha waarura ibulafu, waandekha ni ngubo yeewe.”

16Aryo waabiikha ingubo iyo khukhwoolesa umukoosi wa Yozefu n'akobola ingo. 17Lwanyuma umukhasi waamuboolela byoosi nga ni byaba, nga aloma ari, “Umusaani umu Heburaniya isi waareera uyo abe etsile mu shiseenge shase khukhufwakhila ise. 18Ne ni khupile liyoombo luukali lulweene, atitukhile waarura ibulafu, waandekha ni ngubo yeewe yino.”

19Aryo Potifari n'awulila biilomo by'omukyelama weewe bino, lirima lyaamuniina! 20Kila atsya wawaamba Yozefu, baamubowa mu mapuusu, mweesi baabowatsakila baabowe b'omuyiinga babaandi, naye waamenya mu bweene umwo. 21#Bur 7.9Ne Umukasya waabatsaka ni Yozefu ibweene iyo nayo, waamwokyesanisa bye shiisa sheewe shiikali, shaakila wekhoyesatsaka naabi umuliindi we kamapuusu. 22Shikila umuliindi uwe kamapuusu yuno awa Yozefu buunyala bwe khuulolelela baabowe babaaramile boosi, ni khuulolelela buli shiindu shoosi shishakholekhatsaka mwipuusu ilyo. 23Umuliindi yuno s'elolelesatsaka khu shiindu shoosi sheesi Yozefu aaba nga akhola mwipuusu ta, lwekhuuba Umukasya aaba ali ni Yozefu, na buli shiindu shoosi abe sheesi akhola, shamutsiilatsakila buulayi.

Currently Selected:

Khuurakikha 39: LCE

Highlight

Copy

Compare