Buraambi 25
25
Paulo ajulila isi Kayisaali
1Lwanyuma lwe bifukhu bitaru, nga Fesito wekyelile niye gafana, wama i Kayisaliya, waniina i Yerusalemu. 2Basaayi bakhulu ni baraangilisi be mu Buyudaaya, beetsa isi Fesito, bamuboolela bilomo bibiwaamba khu Paulo. 3Baryo bekoontselela Fesito, nga bamuloomba lwe bulayi bwaabwe bari, arumanise bareere Paulo i Yerusalemu, ne nga sheesi batsiililila bari bamwibuulile khu ntsila bamwiire. 4Ne Fesito welamo ari, “Paulo aliindibwila i Kayisaliya nga ali umubowe, ni nase samweene ndi ambi khuutsyayo. 5Nashiryo, batweela khu baraangilisi beenywe ni beetse batsye ni nase. Ne n'iliiba nga iliwo ilomo yoosi imbi khu musaani yuno, mumuwabile.”
6Aryo n'amala khumenya ni nabo bifukhu bibyoola nga shinaane namwe liikhumi, weekha i Kayisaliya, ni shifukhu shishelakho wekhala khu shitsoloŋo she khukhalilakho kimisaango, walakila ari, bareere Paulo. 7Ne Paulo n'amala khukhwoola, Bayudaaya babaama i Yerusalemu beema bamubotokhelela, nga bamutsuntsumilisa bibiindu bikali, byeesi bakhanyala ni khuwandalasa babeene ta.
8Ne Paulo wewotsakho nga aloma ari, “Ise shina kholaatsakakho she bubwonaki isi kamakaambila ke Bayudaaya, namwe isi Lisaayilo Likhulu, namwe isi Kayisaali ta.”
9Ne lwekhuba Fesito akana khusangaasa Bayudaaya, wareeba Paulo ari, “Ukana utsye i Yerusalemu, ibweeneyo ukhaliwileyo kumusaango lwe bilomo bino mu moni tsase?”
10Paulo welamo ari, “Ise nemile ano mu moni tse shitsoloŋo sha Kayisaali, sheesi bakhalilakho kimisaango, esi nakhila khuwotsesewela. Ise sina birisakho buubi Bayudaaya, nga wamweene n'umanyiile ilala bulayi. 11Aso, ne abeele nga ise naakholakho buubi bwoosi bubukila ifwe, ise sindoba khuufwa ta. Ne nga abeele bilomo byeesi Bayudaaya bareera khukhuntsuntsumilisa nga sibili byelala ta, mbaawo umuundu yeesi uli ni bunyala khukhumbaanayo mu makhono kaawe ta. Ise injulila isi Kayisaali.”
12Aryo Fesito n'amala khufukiilisana nibe mu lukhobo, walaangilila ari, “Wajulile isi Kayisaali, uryo isi Kayisaali niyo isi ulitsya.”
Fesito ereeba khu Aguripa
13Lwanyuma lwe bifukhu bikyeekhe, umuyiinga Aguripa n'umukyelema weewe Berenike, boola i Kayisaliya khusheesakho Fesito. 14Ne ni bamenyayo bifukhu bikalikho, Fesito wakanikhakho n'umuyiinga Aguripa khu bilomo bya Paulo, nga aloma ari: “Aliwo umuundu ano esi Felikisi alekha nga umubowe. 15Ne ni naba nga netsilekho i Yerusalemu, basaayi bakhulu ni basakhulu be Bayudaaya, bareera bilomo byeewe isi ndi, nga bakana bari akhalilwe kumusaango. 16Nase nabelamo ndi siili isaambo ye Baroma khuwayo umuundu khuwabilwa kumusaango nga umweene ashiili khubonana ni babamuwabiile khu moni ta, n'umweene khukhwiwotsakho lwe bilomo byeesi bamuwabila ta. 17Baryo ni babusana ano, nase shinekhala ta, ne khu shifukhu shishelakho, nekhala khu shitsoloŋo she khukhalilakho kimisaango, nalakila ndi bareere umusaani uyo. 18Ne babamuwabila ni beema angaaki, balekha khureera tsilomo tsinyene tsitsimutsuntsumilisa nga nase ni nambaasa ta. 19Khurusakho ndi bamutsuntsumilisa bibiwaamba khu diini yaabwe, ni bibiwaamba khu musaani uwafwa Yezu, isi Paulo alomakho ari ali mulamu. 20Nase ndyo ni nakhasikha isaambo ye khuwentselesamo bibiindu bino, shikila nareeba Paulo nga beele akana khuutsya i Yerusalemu khukhalibwilayo kumusaango lwa bino. 21Ne Paulo n'akana khuliindiwila mu mapuusu khukhwoolisa Kayisaali n'alikukhala, nase nalakila ndi bamuliinde khukhwoolisa lweesi indimwakaanisayo isi Kayisaali.”
22Kila Aguripa aloma Fesito ari, “Nandikanile khuwulila khu musaani uyu samweene.” Fesito wamwiilamo ari: “Kumukaamba ukhamuwulile.”
Paulo nga ali mu moni tsa Aguripa
23Ni bwasha, Aguripa ni Berenike beetsila mu shiriifwa shikali, benjila muntsu iye lukhobo nga bali ni bakhulu be basilikhale, ni babaandu babaandi be mu shiriimba. Fesito walakila ari bareere Paulo. 24Fesito waloma ari, “Umuyiinga Aguripa, ni nanywe mweesi mumuuli ano ni nafwe, mwaboone umusaani yuno? Bayudaaya boosi be mu Yerusalemu ni nahano mu Kayisaliya bantsikontselela nga balomela angaaki bari, sishimwakhila niye khuuba mulamu ta. 25Nase ni nashifumbula nga mbaawo shishiindu shoosi shakholele shishimwakhila khumwiirisa ta, ni lwekhuba naye umweene aba wajuliile isi Kayisaali nase nakhalawo khumwakaanisa i Roma. 26Ne ise siindi ni lomo inyene iyelala khu niye isi inyala khuronela umukoosi wase ta. Shino nisho shikilile imureerire isi muli, ni khufuura isi iwe umuyiinga Aguripa. Manya khumureebelese khubone, nio imbe ni lomo iye khumuronakho. 27Lwekhuba imbona nga she busilu khukhwakaanisa umubowe nga mbaawo khukhwokesana bibyeene byelala bibimufunaanibwa ta.”
Currently Selected:
Buraambi 25: LCE
Highlight
Copy
Compare
Share
Want to have your highlights saved across all your devices? Sign up or sign in
Lumasaaba Catholic Bible © The Bible Society of Uganda, 2017.
