Buraambi 20
20
Lukyendo lwe khuutsya i Masedoniya ni Buyonaani
1Ulwo shisaayumba ni shawa, Paulo warumanisa ari baleekelwa beetse is'ali. Ne n'amala khubesamo kamaani, wabasibula, watsya i Masedoniya. 2Aryo wakyeenda nga abira mu bisiintsa ibyo nalundi nga wamalile khubesamo kamaani, lwanyuma watsya woola i Buyonaani. 3Ibweene iyo wamalayo kimyeesi kitaru. Ne n'aba nga erengekharengekha khuutsya i Siriya, Bayudaaya bamukholela luwomelo. Nashiryo, wakhalawo khukobolayo nga abirira mu Masedoniya. 4Babaandu baabamurongesakho baaba nibo Sopateli umwaana wa Pilo, uwama i Berowa, ni Arisitaluko, ni Sekundo khukhwaama i Sesalonika, ni Gayo khukhwaama i Derube, ni Timosewo naye, ni Tikiko, ni Tulofimu khukhwaama mu Asiya. 5Babaandu bano baraangila bakhuliindila ifwe i Turowa. 6Lwanyuma lwe shifukhu she kimikaati kikikhasiila ta, ifwe khwarura i Filipi nga khwambukhila mu meeri. Ne nga abirirewo bifukhu biraano, khwetubaasa khu baandi i Turowa, esi khwamenya khumala bifukhu musaafu.
Khukyeniya khwa Paulo khumalilisi i Turowa
7Khu shifukhu shishinyoowa mu Sabiiti, ifwe khwabusana atweela khufuniakila atweela kumukaati. Paulo wakanikha isi babaandu ni shitsiililwa shaba shiri niye akana khukobolayo khu shifukhu shishilakho. Aryo wakanikhila imbuka indeeyi khukhwoolisa mu shilo khukari. 8Mu shiseenge she khu ngaaki esi khwabusanila mwabamo tsitaala ngali. 9Umusooleli mutweela nga bamulaanga bari Yutiko, aba wekhaale mwitilisa. Ne Paulo n'aba nga ashikanikha imbuka indeeyi, umusoleeli yuno liilo lyamuwamba, wakonela ilala, khukhwolisa n'awanukha khukhwaama khu ntsu ikhola inungo iye khataru wakwa asi. Baryo bamwangalayo nga wafwiile. 10Paulo weekha asi, wenama khu musooleli yuno, wamuwamba ni kamakhono keewe, lwanyuma waloma ari, “Mukheyembelela ta, lwekhuba ashiilimo bulamu.” 11Aryo Paulo welayo khu ngaaki mu ntsu, wamenyulamo kumukaati, walyakho. Nga wamalile weloosela khukanikha ni nabo imbuka indeeyi, khukhwolisa antsye ni bwasha, watsya na khuutsya. 12Babaandu bayila umusoleeli uyo ingo nga mulamu, nga bali ni kumwikhoyo kumukali naabi.
Lukyendo khukhwaama i Turowa khuutsya i Mileto
13Khuryo khwelooselayo, khwatsya mu meeri, khwambukha khwatsya i Asosi, nga khukana khuri khutsye ibweene iyo ni Paulo. Lwekhuba abe umweene wamala khaale khukhulomela aryo nga ambaasa ari niye kane atsiile bikyele. 14Ne ni khwakanana ni naye mu Asosi, wenjila mu meeri, khwatsya i Mitilene. 15Khuryo ni khwama awo ni meeri, shifukhu shishelakho khwoola i Kiyosi. Ni shifukhu shishelakho khwoola i Samosi. Ne ni bwasha khu shifukhu shishiindi, khwoola i Mileto. 16Shaba shiryo lwekhuba Paulo akhalawo khubira bubiri mu Efeso, ari nio alekhe khukhwonakisila imbuka mu Asiya ta. Aba alikho atsya khaangu i Yerusalemu, nga akana oleyo, nga shinyalikhana, nga shifukhu sha Pentekote shishiili khwoola ta.
Paulo akanikha isi basakhulu be mu Efeso
17Paulo n'aba nga ali i Mileto, warumanisa ari bamulaangile baraangilisi be bafukiilisi be mu Efeso. 18Baryo ni beetsa isi Paulo, wabaloma ari: “Inywe mwabeene mwamanya bulayi bulamu bwase nga ni bubeele. Nga ni mbeelatsakile ni nanywe bifukhu byoosi khukhwaama khu shifukhu shishanyoowa sheesi nasambilakho shikyele shase mu Asiya. 19Ise naakaanisa Umukasya ni buwolu bwoosi nalundi nga indila ni kamasika khulwe khukhakiilisibwa khukali khweesi nabiramo lwe tsimbomelo tse Bayudaaya. 20Inywe mwamanya nga ni nekhalilikha nababoolela lubuula buli shiindu shishaba she lisuno, nalundi nga imbaleekela lubuula khukhwaama khu ntsu ndweela khuutsya khu ntsu ikiindi. 21Ise namanyisa Bayudaaya ni Bayonaani ndi bali ni khukhwibiiyisa bibyonako byaawe isi Wele ni khufukiilila mu Mukasya weefwe Yezu Kristu.
22“Ne lola ari ntsya i Yerusalemu, nga Umwoyo asindikhilisa khuutsya, ne simanya shishilikholikha khu bulamu bwase nga nolileyo ta. 23Khurusakho Umwoyo Umukhosefu wamanyisile ise ari, mu buli shiriimba bubowe ni khutaambisibwa byaniindiliile. 24#2 Tim 4.7Ne bulamu bwase simbwambaasakho khuuba shishiindu shikhulu namwe she lisuno isi ise ndi ta, khurusakho ndi singa shinyalikha imalilise lukyeendo lwase ni bubwakaanisi bwase byeesi nafuna khukhwaama isi Umukasya Yezu nga nikhwo khumanyisa Kamakhuuwa Kamalayi ke bubweela bwa Wele.
25“Ne bona ari inywe mweesi beesi nakyeendatsakamo nga imboolela Buyiinga bwa Wele, si mulimbonakho ise lundi ta. 26Nashiryo imbamanyisa mweesi shaleelo ndi ise s'indi ni kumusaango kwoosi khu mafuki keenywe ta. 27Lwekhuba nababoolela inywe mweesi lubuula shitsiililwa sha Wele shoosi. 28Ni mwiliindatsake inywe mwabeene atweela ni lituuli lyoosi lye bafukiilisi, lyeesi Umwoyo Umukhosefu umweene abawambisa inywe nga babaayi, khuuba babaayi be babaandu ba Wele beesi umweene ekulila nga abirira mu mafuki k'Omwana weewe umweene. 29Ise namanyile ndi nga narulilewo naatsiile, bitsuutse birafu bilinjila mu lituuli lyeenywe; sibililekha khutuumbusa lituuli lyeenywe ta. 30Ni khukhwaama mu lituuli lyeenywe lilyeene, mulyamamo babaandu nga baloma bilomo bibikoraanisa babaandi, bari nio bakhonjelese bafukiilisi beekele baleekelwa baawe. 31Nashiryo ni mube meeso, nga mushebulila muri namala kimiiko kitaru, mu shilo ni kumuusi, nga imbareewula inywe, ni kamasika kamakali.
32“Ne ari imbawanayo mu mikhono kya Wele n'isi shilomo she bubweela bweewe, shishinyala khubombekha inywe ni khubawa kumukabo kwe busikha atweela ni naabo babaali bakhosefu beesi arobora. 33Ise sinayikoombatsakakho ifeeza y'omundu, namwe izaabu y'omundu yeesi ta, namwe shikwaro sh'omuundu yeesi ta. 34Inywe mwamanya nga kamakhono kaase kano kameene niko kakakholatsakila ise byoosi byeesi nakanatsaka, atweela ni naabo beesi naba ni nabo. 35Mu biindu byoosi byeesi nakhola, ise nabokesanisa ndi khulwe khukhalaabana khukali nga khuno, mwakhiile khuyeeta babaandu babaali batoro, ni khushebulilatsaka bilomo by'Omukasya Yezu umweene, byeesi aloma ari, ‘Khuuwaana khuli khwe khabi ngali khufuura khuweebwa.’ ”
36Aryo Paulo n'amala khuloma bilomo bino byoosi, wafukhamila asi, waloombela atweela ni nabo boosi. 37Boosi kumutaambo kwabawamba, balila kamasika lukali, nga bakwa Paulo mu shifuba. 38Ne shishabawambisa kumutaambo khuminyisila ilala, yaba lwe lomo yeesi Paulo aloma ari si balimubonakho lundi ta. Baryo bamuronjisa bamwoolisa khu meeri.
Currently Selected:
Buraambi 20: LCE
Highlight
Copy
Compare
Share
Want to have your highlights saved across all your devices? Sign up or sign in
Lumasaaba Catholic Bible © The Bible Society of Uganda, 2017.
