2 Basesalonika 2
2
Khukhwiitsa khw'Omukasya
1 #
1 Ses 4.15-17
Ne ari be buulebe, bibiwaamba khu bilomo bye khukhwiitsa khw'Omukasya weefwe Yezu Kristu, ni khubusanisibwila atweela is'ali, khubekoontselela khuri, 2mulekhe khuyeŋaana wangu muryo mukhwambaasa khweenywe, namwe khukhwisindukha kimyoyo kyeenywe ta. Nga bino bireerebwa lwe bye buŋoosi, namwe khuboolela, namwe ibaluwa, bibifwaana nga bibyaama isi Mwoyo Umukhosefu, namwe nga bibyaama isi khuli nga biloma biri shifukhu sh'Omukasya shayiitsa khaale. 3Mukhafukiilila umuundu yeesi khubawombesa na khafwiiti khoosi ta. Lwekhuba shifukhu isho si shiliitsa ta, khurusakho nga bumiinyi bwanyoowele khukhwiitsa, n'umuundu uwe khukhwoneka nga bamalile khumurumbula, niye umuundu we khuhela. 4#Dan 11.36; Ezek 28.2Niye alikhaandisana lundi eniinise naabi khufuura buli shiindu shoosi shishilaangibwa shiri wele, namwe sheesi besaaya, nio ekhale Mwisaayilo Likhulu lya Wele, nga eyokesana ari niye Wele.
5Inywe si mushebulila muri, nga ise ni naba ni nanywe nababoolela bibiindu ibyo byoosi ta? 6Ne ari mwamanyile muri iliwo shimuwambiliile niye khubonekha, nio bari amanyikhe lubuula khu mbuka inyene. 7Lwekhuba ari shimoonyo she kamaani ke bubwonaki shiliwo shiraamba, ni nooyo ushiwaambiilila kane eloosele khukhola aryo khukhwoolesa ni balimurusawo. 8#Isay 11.4Nio lwanyuma balirumbula umuundu uwe bubwonaki uyo, n'Umukasya Yezu Kristu alimuhesa nga araambisa kumuukha kwe mukhanwa mweewe, lundi amwiirire ilala ni khuumulikhamulikha khwe khukhwiitsa ni khubonekha khweewe. 9#Mat 24.24Khukhwiitsa khw'omundu uwe bubwonaki uyo khuliba khulwe buraambi bwe kamaani ka Sitaani, nga kabonekhela mu khukhola bye kamakaanga byoosi ni bye khukhwiyaangisa bye bubeeyi, 10ni khukhola bye bubwonaki bwoosi, khuborosa ibo babaatsya khuhela. Babeene ibo balihela lwekhuba baayikaana khukana bwa ŋali nio manya bawonesebwe. 11Ni lwe lomo yino, Wele abasiindikhila nibo khuborokha khwe kamaani khuraambile mu nibo nio akile bafukiilile bye bubeeyi.
12Ni shishamamo babakhalile nibo boosi kumusaango ibo babakhafukiilila bya ŋali ta, ne bekhoyela bubwonaki. 13Be buulebe, shikhwakhila ifwe khusiima Wele busheele khu lweenywe, nga ni muli babaandu beesi niye akana naabi. Lwekhuba khukhwaama makiboole, Wele abarobola inywe ari muwonesebwe khulwe khuwaanibwayo buraawa n'Umwoyo, ni khulwe khufukiilila mu bwa ŋali. 14Wele abalaangila inywe shino khubirira mu Makhuwa Kamalayi keesi ifwe khwababoolela, ari nio munyale khunyoola shiriifwa sh'Omukasya weefwe Yezu Kristu. 15Ni nashiryo be buulebe, ni mwiimikhe ni kamaani, lundi muwandalalile mu byeesi khwabawa, nga khubaleekela khuubirira mu lomo namwe mu baluwa yeefwe. 16N'Umukasya weefwe Yezu Kristu umweene ni Wele Paapa weefwe uwakhukana ifwe, lundi wakhuwa ifwe khuwandalala khukhawawo ta, ni kumwiyikino kumulayi khulwe bubweela, 17abekhoyese kimyoyo kyeenywe, lundi abawandalase mu buli buraambi bulayi ni mu byeesi mukanikha.
Lumasaaba Catholic Bible © The Bible Society of Uganda, 2017.