Tsinikha 2
2
Biilayi byeesi ufuna khukhwaama mu makhula
1Mwaana wase, siinga iwe uwuliilisa biilomo byase byeesi ikhuboolela,
wabiikha buulayi biilakilo byase byeesi ikhuwa,
2waareka khukhuru khwoowo buulayi isi kamakhula,
naluundi waakhakakho naabi khuumanya,
3Ilala kane wikhuunge,
uryo ulaangilile nga ukana khuumanya.
4Uweentselesele ilala ufwaane nga umuundu uweentselesa ifeetsa,
namwe nga uweentselesa bye buyiindifu bibyebisa.
5Iwe siinga ukhola uryo, kane umanye shiina sheesi khuurya Umukasya khumanyisa,
naluundi kane umanye kamakyesi ka Wele.
6Umukasya niye uwaana kamakhula;
mu niye nimwo mumwaamamo kamakyesi ni khuumanya.
7Umweene niye uwaana kamakhula kakaayeeta isi abo babaali baalayi,
naluundi niye ali ingabo yaabo babetsiliilisa.
8Niye umweene uliinda abo babaabirisa babaandi buulayi,
waakhiinga abo boosi babaali babeyikinwa isi ali.
9Lwanyuma nga waarekeeresile buulayi,
kane umanye bye buukwalaafu luundi bibyaakhila,
khuukyeenda buulayi ni khuuba umulayi.
10Lwekhuuba kamakhula niko kakanakhuraangilila,
ni nawe kane wikhoyesebwe nga uli ni kamakyesi.
11Kamakhula koowo ke mukari kane kakhwaayilise buulayi,
ni kamakhula kane kakhukhiinge iwe.
12Kamakhula kane kakhukhiinge iwe isi babaandu bamoyaani,
kane kakhuwonese khukhwaama mu bilomo byaabwe bibyaborokha,
13nga nibo babaalekha tsintsila tse bukwalaafu,
baakana khuukyeendela mu shiilima.
14Nibo bali babaandu babewulila buulayi nga bakhola biibi,
luundi bewulila kumwikhoyo
nga balikho bakhola buuraambi bwe bubwoonaki.
15Nibo tsintsila tsaabwe tsaaborokha,
naluundi mu byeesi bakhola byoosi sibeyikinikha ta.
16Kamakhula kane kakhuwonese iwe
khukhwaama isi umukhasi umuyeyani,
niye ukhakakho khukhwimiliisa khu ngaaki
ni biilomo bibikhoongelesa.
17Niye ali umukhasi ufuniaaka indakaano n'umuseetsa weewe iye mu busooleli,
naluundi uwibilila bibiitsubo byeesi aakhola mu moni tsa Wele weewe.
18Iwe siinga ukyeenda waatsya mu ntsu yeewe,
uba uli khuutsya khu mukhoosi kwe khuufwa!
Khuutsyayo,
uba uli khuutsya mu shibala she makoombe.
19Mbaawo umuundu utsyayo waakobola nga ali umulamu ta,
namwe waakyeendela khu mukhoosi kwe baalamu luundi ta.
20Nashiryo iwe waakha khukyeenda
nga uloondelela she khuubonelakho she babaandu baalayi,
umenye mu buulamu bukwalaafu.
21Babaandu babaali bakwalaafu bakhaabe baasikha be shibala,
luundi abo babaali bakwalaafu
nibo babaakhaamenye mu shibala shino.
22Ne abo babaali baboonaki
Wele akhaabatuume ibulafu we shibala,
ni naabo babaakhali babeyikinwa ta,
akhaabakhuulake abarusemo.
Currently Selected:
Tsinikha 2: LPE
Highlight
Copy
Compare
Share
Want to have your highlights saved across all your devices? Sign up or sign in
The Bible in Lumasaaba © Bible Society of Uganda, 2016.