Matayo 6

Khuuleekela khu bye khuuyeeta bataambi

1 # Mat 23.5 “Ni mwitsililise mulekhe khukholela buraambi bweenywe bwe bukwalaafu mu moni tsye babaandu bari nio bababone ta. Ni kane mukhole muryo, singene mufune kumukheemba kukwaama isi Paapa weenywe uli mwikulu ta.

2“Iwe n'uba nga ukabila bataambi, ukhafuura ikhoombi lwe khuukana khukhwiyokesana nga babemiliisa khu ngaaki ni bakhola mu ntsu tsye khukhwisaayilamo, ni mu mikhoosi nio bari babaandu babaabuyile ta. Ilala imbaboolela ndi, baamalile khaale khuweebwa kumukheemba kwaabwe mu bwitsufu. 3Ne iwe n'uwa bataambi, kumukhono kwoowo kumunyeletsi kukhamanya sheesi kumukhono kwoowo kumulayi kuli khuukhola ta, 4nio khuukana khwoowo khunyale khuuba khwe mu shimoonyo. Aryo Paapawo ubona mu shimoonyo alikhuwa kumukheemba kwoowo.

Khuuleekela khu bye khuuloomba

(Luka 11.2-4)

5 # Luka 18.10-14 “Ne ni muba nga muloomba, mukhaba nga babekholisa busa ni bakhola ta. Lwekhuuba bakana khuuloomba nga beemile khu ngaki mu ntsu tsye khukhwisaayilamo, ni mu mikhoosi esi kyaakananila, nio bari babaandu bababone. Ilala ise imbaloma inywe ndi nibo baamala khaale khuuweebwa kumukheemba kwaabwe mu bwitsufu. 6Ne iwe n'uba nga uloomba, yinjila mu shiseenge shoowo, wikalewo lulwiitsi, uloombe Paapawo ukhabonekha ta, ni Paapawo mweene ubona mu shimoonyo, alikhuwa iwe kumukheemba. 7Inywe ni muba nga muloomba, mukhelaŋana mu bilomo nga Banaambo ni bakhola ta. Lwekhuuba nibo bambaasa bari, lwe bilomo byaabwe bikali kane Wele abawulile. 8Mukhaba nga nibo ta, lwekhuuba Paapa weenywe wamanya byeesi mukana nga mushiili nakhuloomba ta. 9Nashiryo ni muloombatsake muri:

‘Paapa weefwe uuli mwikulu,

Lisiina lyoowo likhosefu liisibwemo lukoosi.

10Buyiinga bwoowo bwiitse,

khayo byeesi ukana bikholebwe mu shiibala,

nga ni bikholebwa mwikulu.

11Ukhuwe biilyo byeefwe bye shaleelo.

12Khwiyakhile bibyoonako byeefwe,

nga nafwe ni khwiyakhila babaakhwonakisila.

13Ukhakhuyila mu khukhonjelesebwa ta,

ne ukhuwonese isi umubi.’

14 # Mako 11.25,26 “Lwekhuuba inywe ni kane mwiyakhile babaandi buubi bweesi baba bakholile isi inywe, Paapa weenywe uli mwikulu naye kane abeyakhile inywe. 15Ne ni kane mulekhe khukhwiyakhila babaandu babaandi buubi bwaabwe, Paapa weenywe naye s'alibeyakhila bibyoonako byeenywe ta.

Khuuleekela khu bye khuubuya intsala

16“Inywe ni mubuya intsala lwe khukhwisaaya Wele, mukheyokesana mu moni nga babaali mu mutaambo, nga ibo babemiliisa khu ngaaki ni bakhola ta. Lwekhuuba boonakisa mu moni mwaabwe khukhwokesanisa isi babaandu babaandi bari babuya intsala. Ilala imbaboolela ndi baamalile khaale khuufuna kumukheemba kwaabwe. 17Ne iwe n'ubuya intsala, yisiinga mu moni mwoowo, wihakhe kamafura mu murwe kwoowo, 18nio babaandu balekhe khumanya bari, ulikhubuya intsala ta, akhali Paapawo yenyene ukhabonekha uyo amanye, ni Paapawo uyo ubona bibiili mu shimoonyo alikhuwa kumukheemba kwoowo.

Buyiindifu mwikulu

(Luka 12.33-34)

19 # Yak 5.2,3 “Mukhebiikhila bye buyiindifu bweenywe khu shiibala isi tsisilili, ni ingikhina binyala byoonakisila ta, ni esi babeefwi bayabila baabiiba ta. 20Ne ni mwibiikhile bye buyiindifu bweenywe mwikulu, isi tsisilili ni ingikhina bikhanyala byoonakisila ta, namwe esi babeefwi bakhanyala khuyaba beeba ta. 21Lwekhuuba iyo isi buyiindifu bwoowo buba, niyo esi kumwoyo kwoowo nakwo kuba.

Buwaanga bwe kumubili

(Luka 11.34-36)

22“Tsimoni tsoowo nitso itaala ye kumubili. Tsimoni tsoowo ni tsiba nga tsindayi, kumubili kwoowo kwoosi kwitsula buwaanga. 23Ne tsimoni tsoowo ni tsikhaba tsindayi, kumubili kwoowo kwoosi kwitsula shishiilima. Noola buwaanga bubuuli mwiiwe buli shishiilima, ni shishiilima isho shiba she kamaani!

Wele ni byeesi ifwe khwiyembeelela

(Luka 16.13; 12.22-31)

24“Mbaawo umuundu unyala khuuba umwakaanisi uwe bakoosi babili ta, lwekhuuba anyala waabiyila mutweela, waakana ukuundi, namwe wehaamba naabi khu mutweela, waalekelesa uramile. Nashiryo, simunyala khukhwakaanisa Wele ni buyiindifu ta.

25“Nashiryo, imbaloma ndi mukheyembelela lwe bibiwaamba khu bulamu bweenywe, nga muloma muri, manya kane mulye shiina, namwe muri kane munywe shiina, namwe bye kumubili kweenywe muri kane mukwaare shiina ta. Buulamu sibuminyisa naabi biilyo, ni kumubili sikuminyisa naabi bikwaaro? 26Ni mubone binywiinywi bye mu ngaaki; sibimiitsa, namwe byabuusanisila mu shiirara ta, ne Paapa weenywe uli mwikulu abiliisa. Inywe simuli be kumukaso naabi khufuura binywiinywi ibyo? 27Naanu khwiinywe unyala khukhwilooselakho imbuka ifwiiti iri khu bulamu bweewe lwe khukhwiyembelela?

28“Ne lwashiina mwiyembelela lwe bikwaaro? Ni mubone nga bimuli bye mwirome nga ni bitsowa, sibiraamba, namwe siibinabila bikwaaro ta. 29#1 Bay 10.4-7; 2 Kim 9.3-6Ne ise imbaboolela ndi, ikhaba Solomoni mu shiriifwa sheewe shoosi, s'akwaarakho nga shitweela khu bimuli bino ta. 30Ne noola isaambo iyo niyo isi Wele akwaarisamo bunyaasi bwe mwirome, bubuuliwo buulamu shaleelo, ne kumukaamba bwaatuumibwa mu mulilo, s'alifuurira ilala khuubakwaarisa, inywe babaali ni khuufukiilila khufwiiti?

31“Ni nashiryo, mukheyembelela nga muloma muri, ne khunalya shiina? Namwe muri khunanywa shiina? Namwe muri khunakwaara shiina ta? 32Lwekhuuba bibyeene ibyo nibyo byeesi Banaambo baweentsa, ni Paapa weenywe uuli mwikulu waamanya ari mubikana. 33Ne ni munyoowe muweentse Buyiinga bweewe ni bukwalaafu bweewe, ni na bino byoosi alibibalooselakho nabyo. 34Nashiryo, mukheyembelela bye kumukaamba ta, lwekhuuba shifukhu she kumukaamba shiri ni bye khukhwiyembelela byasho. Buli shifukhu shiri ni bisiro byasho bibishimala.

Currently Selected:

Matayo 6: LPE

Highlight

Copy

Compare