Matayo 28

Khulamukha khwa Yesu

(Mako 16.1-10; Luka 24.1-12; Yokana 20.1-10)

1Lwanyuma lwa Sabato, bwaba kumutikhinyi mu mamilimili khu shifukhu shishinyoowa mu sabiiti, Malyamu Magadalena, ni Malyamu ukuundi tsana, baatsya khubona iŋani.

2Aabawo khuunikina khukali khwe shiibala, lwekhuuba malayika w'Omukasya ekha khukhwaama mwikulu, weetsa khu ŋani waayilingisa libaale, waalikhalakho. 3Imbonekha yeewe yaba nga khuumulikha khwe kamaani, ni bikwaaro byeewe byaba byakhosa nga kamararara. 4Baliindi baarya naabi lwa malayika yuno, banikina bafwaana nga babafwiile.

5Malayika waaloma bakhasi ari, “Mukharya ta, lwekhuuba naamanyile ndi, mulikho muweentsa Yesu isi baatsaangilila khu musalaba. 6Ne s'ali ano ta, waalamukhile nga n'aloma. Ni mwiitse mubone esi alisibwa. 7Nio ari mutsye khaangu muboolele baleekelwa beewe muri, ‘Waalamukhile mu bafu, ne bona waabaraangilile khuutsya i Galilaaya. Ibweene iyo niyo yeesi mulimubonela.’ Bona ari naababooleele.”

8Baryo bakhasi baarura khaangu khu ŋani nga bariire naabi, ne nga betsuule kumwikhoyo mukali, baatima baatsya khuuboolela baleekelwa beewe. 9Khaangukho Yesu umweene waabakanana, waabaloma ari, “Mulembe.” Baamwiitsayo, baamutiila khu bikyele, luundi baamwisaaya. 10Lwanyuma Yesu waabaloma ari, “Mukharya ta. Ni mutsye muboolele bayaaya baase, batsye i Galilaaya, ibweene iyo niyo yeesi balimbonela.”

Tsilomo tsy'omuliindi

11Bakhasi ni baaba nga batsya, batweela khu baliindi baatsya mu shiriimba, baboolela basaayi bakhulu ibyo byoosi bibyaba byabelewo. 12Baryo ni babuusana atweela ni basakhulu bakhala kamakyesi, baawa basilikhale tsinusu tsingali, 13nga babaloma bari, “Muloma muri, ‘Baleekelwa beewe beetsile mu shilo nga ifwe khwakonele, bamwiiba.’ 14Lwekhuuba kamakhuuwa kano ni kalyoola wa gafana, ifwe khulimuwooyawooya, mulekhe khukwa mu bukosi bwoosi ta.” 15Baryo baliindi bayila tsinusu, bakhola nga ni babalakila. Kamakhuuwa kano kasalanila mu Bayudaaya boosi, ni khukhwoolesa shaleelo.

Yesu abonekhela baleekelwa beewe

(Mako 16.14-18; Luka 24.36-49; Yokana 20.19-23; Buraambi 1.6-8)

16 # Mat 26.32; Mako 14.28 Baryo baleekelwa liikhumi na mutweela baatsya i Galilaaya khu lukiingi lweesi Yesu abaloma khuutsyakho. 17Ne ni baamubona, baamwisaaya, ne babaandi baamwikanakana. 18Lwanyuma Yesu weetsa isi bali, waabaloma ari, “Ise nawebwile bunyala bwoosi, mwikulu ni khu shiibala. 19#Bur 1.8Nashiryo, ni mutsye mukaluse kamanaambo koosi mukekyelise baleekelwa, nga mubabatisa mu Lisiina lya Paapa nily'Omwaana, nily'Omwooyo Umukhosefu. 20Nga mubaleekela khuuwaamba byoosi byeesi nabalakila inywe. Mwilala, nase ndi atweela ni nanywe, bifukhu byoosi khukhwoolesa khu ntsakamo iye kumuboolo.”

Currently Selected:

Matayo 28: LPE

Highlight

Copy

Compare