Matayo 26

Luwomelo lwe khuuwaamba Yesu

(Mako 14.1-2; Luka 22.1-2; Yokana 11.45-53)

1Lwanyuma nga Yesu waamalile khukanikha bilomo bino byoosi, waloma baleekelwa beewe ari, 2#Luky 12.1-27“Mwaamanyile nga lwanyuma lwe bifukhu bibili, Kamayiiya kakalaangibwa Kamayiiya ke Khuubirakho katsya khubawo, n'Umwaana w'Omuundu aliweebwayo khumutsaangilila khu musalaba.”

3Lwanyuma basaayi bakhulu ni basakhulu be babaandu baabuusanila atweela mu lumako lw'omusaayi ufuura bukhulu ulaangiwa Kayafa. 4Ibweene iyo bekutila atweela isaambo yeesi kane bawambemo Yesu mu mbola busa bamwiire. 5Ne baloma bonyene na bonyene bari, “Ne sishaakha khuuba khu bifukhu bye Kamayiiya ta, inyalikha khuubawo shisaayumba mu baandu.”

Yesu bamuwakha kamafura i Besaniya

(Mako 14.3-9; Yokana 12.1-8)

6Ulwo Yesu n'aba nga ali i Besaniya mu ntsu ya Simoni uwe bikeenge, 7#Luka 7.37,38aabawo umukhasi uweetsa ni kyupa iye kamafura kakaawunya buulayi ke khukhwihakha, waakatsukha khu murwe kwa Yesu, nga Yesu wekhaale naalya.

8Ne baleekelwa ni baabona shino, bakhalala baloma bari, “Kamafura aka konekheele shiina? 9Kamafura kano kaandikulisiwilemo tsinusu tsingali busa tsiweebwa bataambi.”

10Yesu n'abona aryo, waabareeba ari, “Lwashiina mwikiitsa umukhasi uyu? Waakholele ise shishiindu shilayi naabi. 11#Maka 15.11Lwekhuuba bataambi kane mubaatsake ni nabo busheele, ne singene mubaatsake ni nase busheele taawe. 12Umukhasi yuno n'antsukhilekho kamafura kano kakaawunya buulayi khu mubili kwase, ashikholele khu khuŋoonaŋoona ise lwe khuusiikhiwa khwase. 13Ilala imbaboolela ndi, buli oosi isi kamakhuuwa kamalayi kano kane kaboolelwe mu shiibala shoosi, ni nasho sheesi umukhasi yuno akholile balishilomakho lwe khuumushebulila.”

Yuda afukiilila khuulya mu Yesu luwomelo

(Mako 14.10-11; Luka 22.3-6)

14Lwanyuma mutweela khwi khumi na babili ulaangiwa Yuda Isikalyoti, waatsya isi basaayi bakhulu, 15#Zek 11.12waabareeba ari, “Shiina sheesi kane muumbe ise ningene imbaaneyo Yesu isi muli?” Baryo baamubalila tsinusu tse ifeeza kamakhumi kataru baamuwa. 16Ni khukhwaama abweene awo, Yuda waaba nga aweentsa imbuka indayi iye khuumuwaanayo isi bali.

Yesu khu She angoloobe ni Baleekelwa beewe

(Mako 14.12-21; Luka 22.7-13,21-23; Yokana 13.21-30)

17Khu shifukhu shishinyoowa she Kamayiiya ke Kimikaati Kikikhasiila ta, baleekelwa beetsa isi Yesu baamureeba bari, “Kane khukhurekekhele ena esi ukana khuliila Kamayiiya ke Khuubirakho?”

18Yesu waabeelamo ari, “Ni mutsye mu shiriimba w'omusaani mutweela, mumulome muri, ‘Umuleekeli aloma ari isaawa yase indobore yoolile. Nase ingana khuliila mu ntsu yoowo Kamayiiya ke Khuubirakho ni baleekelwa baase.’ ” 19Nabo baleekelwa baryo baatsya, bakhola nga Yesu n'abaloma, baŋoonaŋoona Kamayiiya ke Khuubirakho.

20Ne antsye ni bwelabula, Yesu ni baleekelwa beewe liikhumi na babili, bekhala aasi khuulya. 21Ne ni baaba nga balya, Yesu waabaloma ari, “Ilala imbaboolela ndi, mutweela khwiinywe kane andyemo luwomelo.”

22Baleekelwa boosi kumutaambo kwabawaamba naabi, kila barakikha buli mutweela khuuloma bari, “Umukasya, umanyisa ise?”

23 # Zab 41.9 Yesu waabeelamo ari, “Uyo ukhotsele ni nase musowaani ndweela, niye unandyamo ise luwomelo. 24Umwaana w'Omuundu kane atsye nga ni shamuronebwakho. Ne nga she kumutaambo isi uyo umulyamo luwomelo! Shandibeele shilayi aba nga ukhasaalikha ta.”

25Lwanyuma Yuda abe uwe khumulyamo luwomelo wamuloma ari, “Ilala, umuleekeli, ulikho uloma uri niye ise?”

Yesu wamwiilamo ari, “Ee, niye iwe nga n'ulomele.”

She angoloobe Sh'Omukasya

(Mako 14.22-26; Luka 22.14-20; 1 Bakorinso 11.23-25)

26Baryo ni baaba nga balya, Yesu waabukula kumukaati, waakuloombela ikhabi, waakumenyulamo, waakuwa baleekelwa beewe, nga aloma ari, “Ni mubukule mulye, kuno nikwo kumubili kwase.”

27Lwanyuma waabukula shikhopo, waashiloombela ikhabi, waashibawa nga aloma ari, “Ni munywekho khu shino mweesi. 28#Luky 24.8; Yer 31.31-34Lwekhuuba kano niko kamafuki kaase, kakaŋaŋasa indakaano ya Wele, kakatsutsukha lwe bakali, lwe khukhwiyakhila bibyoonako. 29Imbaboolela ndi, ise s'indinywakho luundi khu byaano bye kumusabibu bino, khukhwaama shaleelo, khukhwoolesa khu shifukhu isho khweesi indinyweelakho bushaakha ni nanywe mu Buyiinga bwa Paapa wase.”

30Baryo ni baamala khukhweemba kumweenya, barura baatsya khu lukiingi lwa Zeyituni.

Yesu arumbura nga Petero n'akhamwikaane

(Mako 14.27-31; Luka 22.31-34; Yokana 13.36-38)

31 # Zek 13.7 Lwanyuma Yesu waaloma baleekelwa beewe ari, “Inywe mweesi shiilo shino kane mukhasikhane khulwase, lwekhuuba sharonebwa shiri; ‘Indikhupa umwaayi we kamasheese, ni kamasheese ke mwitaala koosi kalisalanila.’ 32#Mat 28.16Ne lwanyuma nindimala khulamusibwa, indibanyoowa ibweeni khuutsya i Galilaaya.”

33Kila Petero waamwiilamo ari, “Bano boosi bakhakhaasikhana khu lwoowo, ise singene ishikhole na khakyeekhe khoosi ta.”

34Ne Yesu waamuloma ari, “Ilala ikhuboolela ndi, mu shilo sheene shino, itwaaya inaba nga ishiili khukholyookha ta, iwe kane ube waantsikaanile kimiluundi kitaru uri, waakhumanya ise ta.”

35Ne Petero welamo ari, “Ikhaba nga kane shibe she khuufwila atweela ni nawe, singene ikhwikaanekho na khakyeekhe khoosi ta.” Ni baleekelwa babaandi nabo boosi baloma baryo.

Yesu ng'aali mu Getisemane

(Mako 14.32-42; Luka 22.39-46)

36Lwanyuma Yesu waatsya ni baleekelwa beewe mu shiifwo shishilaangibwa Getisemane, waabaloma ari, “Ni mwikhalekho ano, nga ise niintsyakho iyo khuloomba.” 37Warobolamo Petero, ni babaana ba Zebedaayo, waatsya ni nabo, warakikha khukhwiyembelela naabi, kumutaambo kwamuwaamba. 38Lwanyuma waabaloma ari, “Kumwoyo kwase kwetsuule bibyambaaso bye kumutaambo kukuntsolesa ni khuufwa. Ni muramekho ano, ne mube nga muli meeso ni nase.”

39Aryo wamawo waatsyakho aburaangisikho khafwiiti, wakwa aasi mafumala, waloomba ari, “Wo Paapa wase, noola shinyalikha, khayo shikhopo shino she butsiina shiindusiwekho. Ne akhuba nga ise ni ngana ta, ne nga iwe n'ukana.”

40Lwanyuma wakobolayo isi baleekelwa beewe, wabanyoola nga bakonele liilo. Waloma Petero ari, “Inywe simunyalile khuuba meeso ni nase khumalakho isaawa ndweela yonyene ta? 41Ni mube meeso, luundi muloombe, nio mulekhe khukwa mu khukhonjelesebwa ta. Kumwoyo ilala kukana, ne kumubili nikwo kumutoro.”

42Yesu welayo luundi kumuluundi kwe khabili, waloomba ari, “Wo Paapa, noola sishinyalikha shikhopo shino she butsiina khukhundusibwakho ta, khurusakho nga nashinyweele, sheesi iwe ukana shikholekhe.”

43Aryo n'akobola luundi isi baleekelwa beewe, waabanyoola ndi nga bakona liilo, lwekhuuba tsimoni tsaabwe tsaba tsaasitowele. 44Aryo waabalekha, welayo luundi waaloomba kumuluundi kwe khataru nga aloma bilomo byeene nibyo bitweela nga bikiboole.

45Lwanyuma waakobola isi baleekelwa beewe, waabaloma ari, “Mushikona luundi mushiwola? Bona ari isaawa yoolile, n'Umwaana w'Omuundu ari waawaanibwileyo mu mikhono kye babonaki. 46Ari ni mwinyukhe khutsye! Bona uyo unandyamo luwomelo ali aambi khukhwoola.”

Khuuwaambibwa khwa Yesu

(Mako 14.43-50; Luka 22.47-53; Yokana 18.3-12)

47Ne Yesu n'aba nga ashikanikha aryo, mutweela khu baleekelwa beewe liikhumi na babili ulaangiwa Yuda woola, nga ali ni lituuli lye babaandu bakali nga bali ni tsindima, ni tsisoonyi, baaba barumaniwile ni basaayi bakhulu ni basakhulu be babaandu. 48Ari uyo uwamulyamo luwomelo aba wabaweele khabonelo nga aloma ari, “Uyo yeesi kane ingwe mu shifuba,#26.48 Yino yaba ikhola iye Bayudaaya iye khuusheesa, nga umuundu anuuna uwashe khu lusaya. aba niye umweene uyo, mumuwambe.” 49Aryo Yuda weetsa burereefu isi Yesu, wamuloma ari, “Umuleekeli, mulembe!” Waamukwa mu shifuba.

50Yesu waamuloma ari, “Musaale, khola sheesi witsiliile khuukhola.”

Baryo basaani beetsa baakwa khu Yesu bamuwaamba. 51Ne bona mutweela khuubo babaaba ni Yesu winyusa kumukhono, waasowoolayo lurima lweewe, waarema umukulwa w'omusaayi ufuura bukhulu, waamukhalakho khukhuru.

52Yesu waamuloma ari, “Yisayo lurima lwoowo mu shiifwo shalwo, lwekhuuba abo boosi babaasowoolayo lurima, balihela ni lurima. 53Inywe mwaambaasa muri, ise shinyala khukhwikontselela Paapa, ni naye khaangu akho anyala khukhuntsakaanisa kamaye ke bamalayika kakaminyisa khwi khumi na kabili? 54Ni bibyaronebwa bikhosefu binyala byoolelela biryeena, bibiloma biri shino shaakha shibe shiryo?”

55 # Luka 19.47; 21.37 Mu saawa nyene iyo, Yesu waloma lituuli lilyeetsa ari, “Inywe muli nga babetsiliile umunuuli ni tsindima ni tsisoonyi khukhumaamba ise? Ne busheele nekhalatsaka mu Lisaayilo Likhulu, nga indeekela, ne nga simwamaamba ta. 56Ne bino byoosi byakholikhile nio bibyaronebwa bye baŋoosi byoolele.” Ne baleekelwa beewe boosi batitukha bamulekha.

Yesu ng'aali mu moni tse Lukhobo

(Mako 14.53-65; Luka 22.54-55,63-71; Yokana 18.13-14,19-24)

57Abo babaawaamba Yesu baamuyila w'omusaayi ufuura bukhulu, ulaangiwa Kayafa, ibweene iyo yeesi baleekeli be kamakaambila ka Musa, ni basakhulu baaba babusaniile. 58Ne Petero waamuloondakho inyuma aleeyikho, khukhwoolela ilala mu lwaanyi lw'omusaayi ufuura bukhulu, naye wenjila mukari, wekhala atweela ni baliindi, ari nio abone bibyaamamo.

59Basaayi bakhulu nibe mu lukhobo boosi bakhakakho khuweentsa bujulisi bwe bubeeyi khu Yesu nio banyalise khuumwiira. 60Ne baalekha khunyoola ta, ikhaba nga aabawo bajulisi bakali bebubeeyi babeetsa.

Ne ibumaliliso, aabawo babili babeetsa, 61#Yok 2.19baaloma bari, “Umuundu yuno aloma ari, ‘Ise inyala khusaambula lisaayilo lino likhulu lya Wele, luundi nalyombekhela mu bifukhu bitaru.’ ”

62Umusaayi ufuura bukhulu wenyukha weema khu ngaaki, waaloma Yesu ari, “Iwe s'uli ni she khukhwiilamo ta? Lomo shiina yeesi basaani bano bareera khukhutsuntsumilisa iwe?” 63Ne Yesu wasila busa.

Umusaayi ufuura bukhulu kila amuloma luundi ari, “Ikhulomela ni shishitsubo mu Wele Umulamu, n'ukhuboolele noola iwe Kristo, Umwaana wa Wele?” 64#Dan 7.13Yesu wamwiilamo ari, “Ee, shiili nga iwe n'ulomele. Ne imbaboolela inywe mweesi ndi khukhwaama shaleelo shino, mulibona Umwaana w'Omuundu nga wekhaale khu mukhono kumulayi kw'Omunyali wa byoosi, luundi nga etsila khu namufweeli we mwikulu.”

65 # Lev 24.16 Lwanyuma umusaayi ufuura bukhulu winuulaka bikwaaro byeewe nga aloma ari, “Oyu wafwotsoole Wele, ari khukanila shiina bujulisi bubuundi? Bona ari mwawuliile bukholomi bweewe. 66Ari inywe mwaambaasa muryeena?”

Nabo belamo bari, “Akhila khuufwa.”

67 # Isay 50.6 Lwanyuma bamufuutsila kamare mu moni, bamukhupa bifuusi, babaandi bamukhupa tsiimbi, 68nga bamuloma bari, “Iwe uli Kristo, khola buŋoosi! Naanu niye ukhupile?”

Petero ekaana Yesu

(Mako 14.66-72; Luka 22.56-62; Yokana 18.15-18,25-27)

69Khu mbuka yino Petero aba wekhaale ibulafu mu lwaanyi. Aabawo umwakaanisi umukhaana weetsa is'ali, wamuloma ari, “Ni nawe waba ni Yesu umu Galilaaya.”

70Ne Petero niye wekaanila mu moni tse babaandu boosi nga aloma ari, “Ise naakhumanyakho sheesi iwe uli khukanikhakho ta!”

71Ne Petero n'arura khukhwoola mu mulyaango, umukhaana ukuundi umwakaanisi wamubona, waalomela babaandu ari, “Umusaani uyu naye aba atweela ni Yesu we Nazareesi.”

72Petero wekaana luundi nga etsuba, waaloma ari, “Umusaani uyo ise simumanyakho ta!”

73Lwanyumakho luundi, abo babaaba beemile awo beetsa isi Petero, baamuloma bari, “Ilala iwe uli mutweela khu nibo, lwekhuuba isaambo yeesi ukanikhamo ikhwokyesanisa.”

74Ulwo Petero waarakikha khukhwoona ni khukhwitsuba, nga aloma ari, “Umusaani uyo ise simumanyakho ta.”

Ni khaangu akho, itwaaya yakholyookha. 75Ni abweene awo, Petero washebulila byeesi Yesu aamuloma ari, “Itwaaya inaba nga ishiili khukholyookha ta, iwe kane untsikaane kimiluundi kitaru.” Aryo, waarura ibulafu, waalila naabi kamasika.

Currently Selected:

Matayo 26: LPE

Highlight

Copy

Compare