Matayo 19

Yesu aleekela khu bye khuuwoona umukhasi

(Mako 10.1-12)

1Ulwo nga Yesu waamalile khuuloma aryo, waarura i Galilaaya, waatsya mu shaalo she Yuda, injelekha we luluutsi Yorudaani. 2Kamatuuli makali ke babaandu kamulondelela, naye wabawonesela ibweene iyo.

3Bafarisaayo beetsa is'ali khuumukhakilisa. Baamureeba bari, “Shifukiilisibwa mu makaambila keefwe umuundu khuuwoona umukhasi weewe nga amufunisa buli lomo yoosi?”

4 # Rak 1.27; 5.2 Yesu wabeelamo ari, “Simwasomatsakakho bibyaronebwa bikhosefu bibiloma biri, ‘Iburakikhilo, umubuumbi aabuumba boombi umusaani n'umukhasi?’ 5#Rak 2.24Nio ndi waaloma ari, ‘Lwe lomo yino, umusaani alilekha paapawe ni maayiwe, etubaase n'umukhasi weewe, ni nabo boombi bekyele kumubili mutweela?’ 6Ni nashiryo, sibaba bashiili babili ta, ne baba bekyelile kumubili mutweela. Aso, sheesi Wele aba watubaasile atweela, umuundu yeesi akhawukhanisa ta.”

7 # Maka 24.1-4; Mat 5.31 Bafarisaayo baamureeba bari, “Ne lwashiina Musa aalakila ari, umusaani awe umukhasi weewe buurone bwe khumuwoona nio amuwoone?”

8Yesu wabeelamo ari, “Musa aabafukiilisa khuuwoona bakhasi beenywe lwekhuuba kimyoyo kyeenywe sikileekikhila ta. Ne khukhwaama makiboole sishaba shiryo ta. 9#Mat 5.32; 1 Kor 7.10,11Ne imbaboolela ndi, buli umuundu yeesi uwoona umukhasi weewe, khurusakho khulwe buyeyani, ne wakhwa ukuundi, aba wayeyanile.”

10Kila baleekelwa beewe bamuloma bari, “Noola bili biryo by'omuseetsa n'umukhasi, shiba shilayi khulekha khukhwa ta.”

11Yesu wabeelamo ari, “Sibali boosi babanyala khufukiilisa bilomo bino ta, khurusakho isi ibo bababiweebwa. 12Lwekhuuba iliwo tsilomo tsikhali ndweela tsitsireesa basaani balekha khukhwa ta. Baliwo babaandu babaakhakhwa ta, lwekhuuba basaalikha baryo; baliwo babaandi babaakhakhwa ta, lwekhuuba bayomolebwa ni babaandu, baliwo babaandi babaakhakana khuukhwa ta lwe Buyiinga bwe mwikulu. Uyo unyala khukhola shino, n'afukiilile khuleekelwa khuno.”

Yesu awa babaana bafwiiti tsikhabi

(Mako 10.13-16; Luka 18.15-17)

13Shifukhu shitweela, babaandu baareera babaana bafwiiti isi Yesu bari abarekho kamakhono keewe, luundi abaloombele. Ne baleekelwa beewe baarafuyila abo babaabareera.

14Ne Yesu waaloma ari, “Ni mubalekhe babaana bafwiiti beetse isi indi, mukhabashinjilila ta, lwekhuuba Buyiinga bwe mwikulu buli bwe babafwaana nga bano.” 15Aryo lwanyuma nga wabareerekho kamakhono keewe, waarurayo, waatsya.

Umusaani umuyiindifu

(Mako 10.17-31; Luka 18.18-30)

16Lwanyuma abonekhawo umusaani umuyiindifu uweetsa isi Yesu, waamureeba ari, “Umuleekeli, ikhole bilayi shiina, nio ifune buulamu bubuukhawawo ta?”

17Yesu wamwiilamo ari, “Lwashiina undeeba ise khwiibyo bibiwaamba khu bilayi? Aliwo mutweela yenyene niye uli Umulayi. Ne noola ukana khukhwinjila mu bulamu, wulilatsaka kamakaambila.”

18 # Luky 20.13; Maka 5.17; Luky 20.14; Maka 5.18; Luky 20.15; Maka 5.19; Luky 20.16; Maka 5.20 Umusaani tsana waamureeba ari, “Niko kali?”

Yesu waamwiilamo ari, “Ukheera ta, ukhayeyana ta, ukheeba ta, ukhaapa umuundu washoowo liyino ta. 19#Luky 20.12; Maka 5.16; Lev 19.18Yiisatsakamo paapawo ni maayiwo lukoosi, luundi ukanatsake umwesanwa woowo, nga iwe ni wikana wamweene.”

20Umusaani tsana yuno waamwiilamo ari, “Ibyo byoosi naabiwaambatsaka, ne shiina shishiindi shishindaambakho?”

21Yesu naye waamwiilamo ari, “Noola ukana khuuba umukwalaafu, tsya, ukulise ibyo byoosi byeesi uli nabyo, ukabile bataambi bibyaamamo, ulwo kane ube ni buyiindifu mwikulu. Lwanyuma wiitse unondelele.”

22Ne umusaani yuno n'awulila shino, waatsya nga mukhalafu naabi, lwekhuuba aba ni buyiindifu bukali naabi.

23Lwanyuma Yesu waalomela baleekelwa beewe ari, “Ilala imbaboolela ndi shiliiba shihangafu naabi umuundu umuyindifu khukhwinjila mu Buyiinga bwe mwikulu. 24Luundi imbaboolela ndi, shili shangukho iŋamya khuubirira mu mwanya kwe mpiso, khufuurisa umuundu umuyindifu khukhwinjila mu Buyiinga bwa Wele.”

25Ne baleekelwa ni baawulila shino, beyaanga busa nga bareeba bari, “Ari naanu unyala khuwonesebwa?”

26Yesu wabalolelela, waabaloma ari, “Isi babaandu shino sishinyalikhana ta, ne isi Wele bibiindu byoosi binyalikhana.”

27Lwanyuma Petero wamwiilamo ari, “Bona ifwe khwalekha byoosi, khwakhulondelela iwe, ne khulifuna shiina?”

28 # Mat 25.31; Luka 22.30 Yesu waabaloma ari, “Ilala imbaboolela ndi, mu muboolo kumushaakha nga Umwaana w'Omuundu wekhaale khu shitsoloŋo she shiriifwa, ni nanywe mumuliba nga munondelela, mulikhala khu bitsoloŋo liikhumi na bibili, nga mukhalila bikuuka liikhumi na bibili bye ba Isiraeli kumusaango. 29Na buli muundu yeesi uwalekha tsinusu, namwe babandaaye, namwe bakooko, namwe paapawe, namwe maayiwe, namwe babaana, namwe kimikuunda khu lwase, alifuna kimiluundi shitoondo khufuurisakho, luundi asikhile buulamu bubuukhawawo ta. 30#Mat 20.16; Luka 13.30Ne bakali babaali baakiboole ari, baliiba bamalilisi, ni bamalilisi ari, baliiba baakiboole.”

Currently Selected:

Matayo 19: LPE

Highlight

Copy

Compare