Matayo 13

Lusimo lw'omumiitsi

(Mako 4.1-9; Luka 8.4-8)

1Khu shifukhu sheene isho, Yesu waarura mu ntsu, waatsya khu ndulo khwe inyaantsa wekhala aasi#13.1 Baleekeli mu biseela ibyo bekhalatsaka aasi nio baleekela babaandu. khuleekela kamatuuli ke babaandu. 2#Luka 5.1-3Ne kutuuli kwe babaandu bano ni kwamubuungililakho lukali, waaniina mwikhoŋolo waaliikhalamo, ne kamatuuli ke babaandu keemikha khu ndulo. 3Aryo Yesu waababoolela bibiindu bikali busa nga araambisa tsisimo, nga aloma ari: “Aabawo umulimi mutweela uwarura khuutsya khumiitsa bumiitso bweewe. 4Ne n'aba nga amiitsa bumiitso, bulala bwakwa khu ntsila, ni binywiinywi byeetsa byabulya. 5Bumiitso bubuundi bwakwa khu lwaanda akhali liiloba likali ta, lubaluba, bwaarura, ne lwekhuuba sibwaba ni liiloba lilimala ta, 6inyaanga ni yarura, bwaniaala. Lwekhuuba sibwaba ni kimilandila kimileeyi ta, buryo bwooma. 7Bumiitso bubuundi bwakwa mu mawa kakatsowa, karyo kaasindakilila bibyarura tsana. 8Bumiitso bubuundi bwakwa khu liiloba lilayi, bwaatsowa, bwaana bibyaamo, buulala bwaanakho shitoondo shitweela, bubuundi kamakhumi kasesaba, bubuundi kamakhumi kataru.”

9Yesu waabaloma ari, “Uli ni kamaru ke khuwulila, n'awulile.”

Shitsilililwa she tsisimo

(Mako 4.10-12; Luka 8.9-10)

10Lwanyuma baleekelwa beetsa isi Yesu, baamureeba bari, “Iwe shiina shikila ukanikha isi babaandu bano musimo?”

11Yesu naye wabeelamo ari, “Inywe mwawebwele khumanya bimoonyo bye Buyiinga bwe mwikulu, ne sishili shiryo isi babaandu babaandi ta. 12#Mat 25.29; Mako 4.25; Luka 8.18; 19.26Lwekhuuba buli umuundu yeesi ulikho ni shishiindu, balimuloselakho, ni naye aliiba ni bikali. Ne buli muundu yeesi ukhalikho ni shishiindu shoosi ta, balimurusakho ni khafwiiti akho abe kheesi ali nakho. 13Shino nisho shishikila ise nakanikha musimo: nio khulola balole, ne balekhe khubona ta, khurekeeresa barekeerese, ne balekhe khubimanya ta. 14#Isay 6.9,10Ne buŋoosi bwa Yisaaya umuŋoosi, bwolele isi muli, nga niye n'aloma ari,

‘Babaandu bano khuwulila kane bawulile busa, ne sibalibimanya ta.

Khulola kane balole busa, ne sibalinyala khubyofwaasa ta.

15Lwekhuuba kimyoyo kye babaandu bano kyasitowele,

ni kamaru kaawe kekalikhile,

naluundi bafunyikhilisile tsimoni tsaabwe.

Sibanyala khubona ni tsimoni tsaabwe ta,

namwe sibanyala khuwulila ni kamaru kaawe ta,

naluundi sibamanya ni kimyoyo kyaabwe ta.

Baba babanyalisile khukhola bino,

khali bashuukhile beetsa isiise,

Wele waabwe

ni nase nandibawonesele.’

16 # Luka 10.23,24 “Ne inywe nga Wele waabaweele ikhabi! Lwekhuuba tsimoni tseenywe tsibona, ni kamaru keenywe kawulila. 17Lwekhuuba ilala imbaboolela ndi, baŋoosi bakali busa, ni babaandu ba Wele bakwalaafu baakana naabi khuubona bibiindu bino inywe byeesi mubona, ne sibanyalisa khuubibona ta. Naluundi baakana naabi khuuwulila inywe byeesi muwulila, ne sibaanyalisa khuubiwulila ta.

Yesu asontsoola lusimo lw'omumiitsi

(Mako 4.13-20; Luka 8.11-15)

18“Aso, ari ni murekeerese sheesi lusimo luno lw'omumiitsi lumanyisa. 19Bumiitso bubwakwa khu ntsila nibo babaandu babaawulila ilomo iye Buyiinga, ne baalekha khukimanya ta. Umusiku wa Wele eetsa waawutula isho shishimiitsibwile mu myoyo kyaabwe. 20Bumiitso bubwakwa khu lwaanda nibo babaandu babaawulila ilomo, baakifukiilila buulayi ni kumwikhoyo mu myoyo kyaabwe. 21Ne lwekhuuba sibali ni tsiindi taawe, ilomo siyiikha mu myoyo kyaabwe mukari yaamalakho imbuka ta. Ne bukosi namwe kumutaambo ni biitsa lwe ilomo, babaandu bano bakhasikhana khaangukho. 22Bumiitso bubwakwa akari mu mawa nibo babaandu babaawulila ilomo, ne khukhwiyembelela khwe shiibala shino, ni khukhwiwotooma khwe buyiindifu, biryo bisindakilila ilomo byakihesa, yaalekha khwaanakho bibyaamo ta. 23Ne bumiitso bubwakwa khu liiloba lilayi nibo babaandu babawulila ilomo, bakimanya buulayi. Baryo ilala nibo baanakho bibyaamo, alala baanakho shitoondo shitweela, alala kamakhumi kasesaba, ni alala kamakhumi kataru.”

Lusimo lwe kumusiru

24Yesu waababoolela lusimo luluundi nga aloma ari, “Buyiinga bwe mwikulu bufwaananisibwa n'umuundu uwamiitsa bumiitso bulayi mu mukuunda kweewe. 25Ne babaandu ni baaba nga baakonele mu shilo shitweela, umusiku weetsa waamiitsa bumiitso bwe kumusiru akari mu bilime bino waatsya. 26Ne iŋaano yino ni yamala khuurura, yaanakho bibyaamo, ni kumusiru kwa tsana kwabyoneka. 27Babakaanisi b'omweene mukuunda baamwiitsayo, baamuloma bari, ‘Musakhulu, iwe siwamiitsa bumiitso buulayi mu mukuunda kwoowo? Ne ari kumusiru kuno kwaamile waheena?’ 28Naye umweene mukuunda waabaloma ari, ‘Umusiku niye uwakhola bino.’ Babakaanisi tsana baamureeba bari, ‘Ari ukana khutsye khukukhuulake?’ 29Naye waabeelamo ari, ‘Taawe, lwekhuuba ni kane mube nga mukhuulaka kumusiru, munyala mwakhuulilamo ni ŋaano nayo. 30Lekha byoosi bitsowele atweela khukhwoolesa khu mbuka iye khuukyesa. Ni khu mbuka nyene iyo, indiloma babakyesa banyoowe bakhuulake kumusiru, bakubowake kimirwe, bakwoshe. Ne lwanyuma, imbalome babuusanise iŋaano, bakibuunge mu shiirara shase.’ ”

Lusimo lwe khamiitso Kaladaali

(Mako 4.30-32; Luka 13.18-21)

31Yesu luundi ndi waababoolela lusimo, nga aloma ari; “Buyiinga bwe mwikulu bufwaananisibwa ni khamiitso kaladaali,#13.31 Khano nikho khamiitso khakhafuurayo bufwiiti khu shiibala. kheesi umuundu abukula, wakhamiitsa mu mukuunda kweewe. 32Nakho ikhaba nga khali khafwiiti lukali khufuura bumiitso bubuundi bwoosi khu shiibala, ne ni khaatsowa, khekyelamo kusaala kuboofu khufuurisa kimisaala kikiindi kyoosi. Khamiitso khano khamamwo kusaala khweesi binywiinywi bye mu ngaaki biitsa byombekhamo biiswi mu sakya tsakwo.”

Lusimo lwe kamamela

(Luka 13.20-21)

33Yesu waababoolela lusimo luluundi nga aloma ari: “Buyiinga bwe mwikulu bufwaananisibwa ni kamamela keesi umukhasi aabukula, waakatubaasa mu ndubi tsitaru tse buufu bwe ŋaano, khukhwoolesa buufu bubwakaandiwa ni bwasiila.”

Shitsilililwa she tsisimo tsa Yesu

(Mako 4.33-34)

34Yesu araambisatsaka tsisimo nga n'aba akanikha isi kamatuuli ke babaandu. Mbaawo shishiindu shoosi sheesi abakanikhayo akhali khuraambisa tsisimo. 35#Zab 78.2Shino ashikhola aryo, khukhwoolelesa sheesi Wele alomela mu muŋoosi, nga aloma ari,

“Indiraambisa tsisimo nga inganikha isi babaandu,

indibaboolela bibiindu bibyaba byabisibwa khukhwamila ilala khu khubuumbibwa khwe shiibala.”

Yesu asontsoola lusimo lwe kumusiru

36Lwanyuma nga Yesu warurirewo isi lituuli lye babaandu lyaba, wenjila mu ntsu, baleekelwa beewe beetsa is'ali, bamuloma bari, “N'ukhusontsoole ifwe lusimo lwe kumusiru kukwaba mu mukuunda kwe ŋaano.”

37Yesu naye wabeelamo ari, “Umuundu uwamiitsa imiitso indayi mu mukuunda niye Umwaana w'Omuundu. 38Ni kumukuunda nikwo shiibala shoosi, ni bumiitso bulayi nibo babaana be Buyiinga. Ni kumusiru nibo babaana b'omusiku wa Wele. 39N'umusiku uwamiitsa kumusiru kweene niye Sitaani. Likyesa nilyo intsakamo ye shiibala, ni babakyesa nibo bamalayika. 40Nga kumusiru ni kubuusanisibwa, kwokhebwa ni kumulilo, ni nasho shiliiba shiryo nga intsakamo ye shiibala yoolile. 41Umwaana w'Omuundu alirumana bamalayika beewe khuutsya babuusanise buli muundu yeesi abe ukhola bye bubwoonaki bamukhuule, bamuruse mu Buyiinga bweewe. 42Ni babaandu bano babaakhola biibi, balibatuuma mu sheeso she kumulilo, mu bweenemwo nimwo mumuliba khulila, ni khukhwilumaka kameeno lwe butsiina bukali. 43Ne babaandu ba Wele babaakhola bye bukwalaafu bamwekhamwekhe nga inyaanga mu Buyiinga bwa Paapa waabwe. Inywe noola muli ni kamaru ke khuwulila ni muwulile.”

Lusimo lwe buyiindifu bubwabisibwa

44Yesu weloosela nga aloma ari: “Buyiinga bwe mwikulu bufwaananisibwa ni she buyiindifu shishaba shaabisibwa mu mukuunda. Ne umuundu mutweela n'ashinyoola, waashibisa luundi. Ni lwe khukhwikhoya khuukali, atsya waakulisa byoosi byeesi ali nabyo, lwanyuma waakobola waakula kumukuunda ukwo kwoosi.”

Lusimo lwe shishiindu shishabisibwa

45Yesu ndi luundi waaloma ari: “Luundi Buyiinga bwe mwikulu bufwaananisibwa n'umuundu umukulisi abe uweentsa shishiindu she lisuno shilayi naabi. 46Ne lwanyuma lwe khuunyoola shitweela she lisuno isho, atsya waakulisa ibyo byoosi abe byeesi ali nabyo, waakobola waakula she lisuno shilayi isho.”

Lusimo lwe khatiimba khe khuulobelamo tsinyeeni

47Yesu ndi waaloma ari: “Luundi ndi Buyiinga bwe mwikulu bufwaananisibwa ni khatiimba khe khuulobelamo tsinyeeni kheesi batuuma mu nyaantsa. Nakho kharyo khawaamba tsinyeeni tsa buli saambo yoosi. 48Khatiimba khano ni khetsula, balobi bakhakhweesa, bakharusa ibulafu khu ndulo khwe inyaantsa khu lwoomu. Baryo bekhala aasi, baloondakamo tsindayi, batsira mu shiindu, ne tsitsiili tsiimbi batsituumaka. 49Ni nasho shiliiba shiryo, nga intsakamo ye shiibala yoolile. Bamalayika baliitsa bangalakemo babaandu babaakhola biibi khubarusa mu baandu babaakhola bye bukwalaafu. 50Baryo babaakhola biibi ibo, babatuume mu sheeso she kumulilo. Mu sheeso iyo niyo iliiba khulila ni khukhwilumaka kameeno lwe butsiina bukali.”

Bikhale ni bishaakha

51Lwanyuma Yesu wareeba baleekelwa beewe ari, “Bilomo bino byoosi mwabimanyile bulayi?” Nabo bamwiilamo bari, “Ee, khwabimanyile.”

52Aryo kila abaloma ari, “Nashiryo buli muleekeli yeesi uwe kamakaambila ka Musa uleekebwela wekyela umuleekelwa mu Buyiinga bwe mwikulu, afwaanana nga umuundu umweene intsu, wuutsya warusa khukhwaama mwibikhilo lyeewe bibiindu byoosi bishaakha ni bikhale byeene.”

Babaandu be Nazareesi bekaana Yesu

(Mako 6.1-6; Luka 4.16-30)

53Aryo Yesu n'amala khuukanikha tsisimo tsino, waarura mu shiifwo isho waatsya. 54Ne nga wolele mu shiriimba she waabwe, waatsya waarakikha khuuleekelela mu ntsu iye khukhwisaayilamo, ni nabo boosi bababaamo beyaanga naabi. Lwekhuuba baaloma bari, “Oyu kamakyesi kano koosi akamisa waheena, ni kamaani kano ke khuukhola bye kamakaanga bino? 55Umweene uyu s'ali niye umwaana w'omubeetsi we tsimbaawo? Maayi weewe s'ali niye Malyamu, ni babandaaye beewe sibali nibo Yakobo, ni Yusufu, ni Simoni, ni Yuda? 56Ni bakooko beewe nabo sibamenya mu shiriimba shino? Kale oyuno amisa eena bibiindu bino byoosi?” 57#Yok 4.44Baryo babaandu ibo boosi bamwikaana lw'ebyo byeesi aba nga akhola.

Ne Yesu wabeelamo ari, “Umuŋoosi bamuwa shiriifwa buli aandu aandi oosi, khuurusakho abo be mu shiriimba sheewe ni be muungo mweewe.” 58Ibweene iyo Yesu s'akholayo bye kamakaanga bikali ta, lwekhuuba babaandu sibaabamo ni khuufukiilila khwoosi ta.

Currently Selected:

Matayo 13: LPE

Highlight

Copy

Compare