Matayo 11

Yesu ni Yokana Umubatisa

(Luka 7.18-35)

1Nga Yesu waamalile aryo khuleekela baleekelwa beewe liikhumi na babili, waarura mu shiifwo isho waatsya khuleekela naluundi ni khuboolela mu biriimba bye Galilaaya.

2Ne Yokana Umubatisa nga ali mu mapuusu n'awulila byoosi byeesi Kristo aba ali khukhola, warumanayo baleekelwa beewe isi Yesu, 3ari batsye bamureebe bari, “Iwe niye uyo abe isi khuliindilila uli khukhwiitsa, namwe khuliindilileyo ukuundi?”

4Yesu wabeelamo ari, “Ni mutsye muboolele Yokana Umubatisa byeesi muwulile ni byeesi muboone. 5#Isay 35.5,6; Isay 61.1Baabofu babona, babaalemala bakyeenda, abo babaali ni bulwaale bwe bikeenge bawonesebwa, bamiinyi bekukha mu maru baawulila, baafu balamusibwa, ni Kamakhuuwa Kamalayi kaboolelwa isi bataambi. 6Ne ali ni khabi umuundu yeesi ukhantsikanakana ise ta.”

7Ne baleekelwa ba Yokana Umubatisa ni baaba nga batsya, Yesu wakanikha isi kamatuuli ke babaandu bibiwaamba khu Yokana mweene, nga aloma ari, “Inywe ni mwatsya isi Yokana mu mubiimbi, shiina sheesi mwatsiililila khubona? Khubona lukholo luluteengasibwa ni mbewo? 8Ne mwatsiililila khubona umuundu ufwaana aryeena? Umuundu ukwaarire tsingubo tsitsinyenanyena? Bona ibo babakwaara tsingubo tsitsinyenanyena bali mu lwaanyi lw'omuyiinga. 9Ne ilala mwatsiililila khubona shiina? Khubona umuŋoosi? E e, ilala imbaboolela ndi niye afuurira ilala umuŋoosi. 10#Mal 3.1Yokana oyu niye isi bibyaronebwa bikhosefu bilomakho biri, ‘Indirumana umurume wase iburaangisi woowo, ulikhuŋoonaŋoonela intsila yeesi ulikyeendelakho.’

11“Ilala imbaboolela ndi, mu baandu boosi babasaalikha khu shiibala khuno, mbaawo na mutweela ufuura Yokana Umubatisa ta. Ne khurusakho uyo ufuura bukyeekhe mu Buyiinga bwe mwikulu niye umukhulu khufuura Yokana mweene. 12#Luka 16.16Khukhwamila ilala khu bifukhu bya Yokana Umubatisa khukhwoolesa shaleelo, Buyiinga bwe mwikulu babwinjilamo ni khurekana, ni naabo babarekana nibo babuwaamba ni kamaani. 13Bitabo bye baŋoosi ni kamakaambila ka Musa bikanikha khu Buyiinga bwe mwikulu khukhwoola khu Yokana Umubatisa. 14#Mal 4.5; Mat 17.10-13; Mako 9.11-13Ne muba nga mumukana khufukiilila, Yokana uyo niye Eliya abe isi mwaliindilila. 15Uyo uuli ni kamaru ke khuuwulila n'awulile.

16“Ari babaandu be kumuboolo kuno imbakyelaase na shiina? Bafwaanana nga babaana babekhaale mu khatale, nga balaangana ni bashaawe bari, 17‘Ifwe khwabakhupila kimilele ni inywe mwaalekha khukana khushiina ta, ifwe khwabakhupila tsimuungu ne inywe mwaalekha khwantsuwa ta.’

18“Yokana Umubatisa eetsa nga abuya intsala nga s'alya biilyo namwe nga s'anywa iviini ta, ne babaandu boosi baloma bari, ‘Ali ni shisaambwa shiibi.’ 19Ne Umwaana w'Omuundu n'etsa nga naalya, naluundi nga anywa, babaandu tsana baloma bari, ‘Ali ni kumukhabyo naluundi umumeeli, umusaale we babuusanisi be kumusolo ni babonaki babaandi.’ Ne kamakyesi ka Wele kokyesanisibwa ni nebyo bibyaama mu makyesi keeneko.”

Kumutaambo isi biriimba bibikhafukiilila ta

(Luka 10.13-15)

20Aryo Yesu waarakikha khukhwikiitsa biriimba mweesi aakholela bye kamakaanga bibifuura bukali, ne byaalekha khukhwibiiyisa ta. Kila aloma ari: 21#Isay 23.1-18; Ezek 26.1—28.26; Yow 3.4-8; Amos 1.9,10; Zek 9.2-4“Nga she kumutaambo isi iwe Korazini! Nga she kumutaambo n'isi nawe Besusaida! Lwekhuuba bye kamakaanga bibyakholewela mwiinywe biba nga bibyakholewela i Tuulo ni Sidoni, khali bebiiyisa bibyoonako byaabwe khaalekho, bekhala nga bakwaarire bitsina, behanyakakho likokhe, khukhwokesanisa bari bebiiyisile bibyoonako. 22Ne ari imbaboolela ndi Wele aliwaambila Tuulo ni Sidoni shiisa khu shifukhu she khuukhalilakho kimisaango khufuurisa inywe.

23 # Isay 14.13-15; Rak 19.24-28 “Ni nawe Kaperunaumu, wakana khukhwiniinisa wamweene mwikulu? Ulikhisibwa aasi i makoombe. Lwekhuuba bye kamakaanga bibyakholewela mwiiwe biba nga bibyakholewela i Sodoma, khali shiriimba isho shishiiliwo khukhwoolesa ni shaleelo. 24#Mat 10.15; Luka 10.12Ne ari imbaboolela ndi, Wele aliwaambila shiisa shiriimba isho Sodoma khu shifukhu she khuukhalilakho kimisaango khufuurisa inywe.”

Yiitsa isiindi uwole

(Luka 10.21-22)

25Mu saawa iyo, Yesu waaloma ari, “Paapa, Umukasya we mwikulu ni shiibala. Ikhusiima, lwekhuuba bibiindu bino byoosi wabibisa babaandu be kamakyesi ni baleekele. Ne wabibimbulila ibo babaali babusheele busa. 26Niabweene Paapa wamweene washisiima uryo.

27 # Yok 3.35; Yok 1.18; 10.15 “Paapa wase waayimaambisa ise bibiindu byoosi. Naluundi mbaawo umuundu yeesi umanyile Umwaana ta, khurusakho Paapa yenyene. Naluundi mbaawo umanyile Paapa ta, khurusakho Umwaana yenyene, ni babaandu boosi beesi Umwaana akana khubabimbulila bibiwaamba khu Paapa.

28“Aso, inywe mweesi babaaluwile, luundi babaasitowelelwe ni mwiitse is'ise, ni nase kane imbawe inywe khuuwola. 29#Yer 6.16Ni muyile shisutwa shase, mushitwiikhe, muryo mwiyikile khwiise, lwekhuuba ise ndi umukwalaafu luundi umuwolu mu mwoyo, ni nanywe mulinyoolela kimyoyo kyeenywe shiwolelo. 30Lwekhuuba shisutwa shase sishili shisiro ta, naluundi shili shishaangu.”

Currently Selected:

Matayo 11: LPE

Highlight

Copy

Compare