Baheburania 13
13
Isaambo ye khukhwikhoyesamo Wele
1Ni mwiloosele khuukanana nga be buulebe. 2#Rak 18.1-8; 19.1-3Mukhebililatsaka khukhwikhoyela bakyeni ta, lwekhuuba mu khukhola khuryo, babaandu balala bekhoyela bamalayika nga sibashimanyile ta. 3Ni mushebulile babaali mu bubowe, mufwanikhe nga nanywe bababowebwa atweela ni nabo, ni naabo bababirisibwa buubi; mufwanikhe nga nanywe babaali mu khubonabona.
4Bukhwaale bwaakha bureebwemo lukoosi ni babaandu boosi, ni bulili bwe bakhwaalikhe bwaakha khuuba nga sibulikho lisaanda lyoosi ta, lwekhuuba Wele alikhalila kumusaango be lukhobe ni bayeyani. 5#Maka 31.6,8; Yos 1.5Ni mube babaandu babaali ni bulamu bubukhalimo bulyaanga mu mapeesa ta, ne byeesi muli nabyo bibamalatsake, lwekhuuba Wele aloma ari: “S'indibalekha namwe s'indibaantsukha ta.” 6#Zab 118.6Nashiryo, khuloma akhali khukhwikanakana khuri,
“Umukasya niye umuyeeti wase,
s'indiiryakho shishiindu shoosi ta.
N'umuundu anyala khukhukholakho ise shiina?”
7Ni mushebulilatsake baraangilisi beenywe, babaakanikha Ilomo ya Wele isi muli. Ni mwaambaase ibyo bibyaama musaambo indayi iye buulamu bwaabwe, ni nanywe mulondelele khuufukiilila khwaabwe. 8Yesu Kristo arama shitweela busa, ingoloobe, shaleelo, ni biilo ni biilo.
9Mukhayilibwayilibwa ni khuuleekela khukhuubonekha nga khuukyeni isi muli ta. Shiba shilayi kimyoyo kyeefwe khuuwaangasibwa ni bubweela, ne akhuba lwe khuuwaamba kamakaambila kakawaamba khu biilyo ta, lwekhuuba abo babawaamba kamakaambila kano sibayeetebwa ni nako ta. 10Ifwe khuli ni shisheeso khweesi abo babesaaya mu weema bakhafukiilisibwa khuulya khubyakhwo ta.
11 #
Lev 16.27
Umusaayi ufuura bukhulu areera kamafuki ke bisolo mu shifwo shifuura bukhosefu lwe khurusawo bibyoonako, ne kimilaambo kyatso kyokhebwela ibulafu we tsiweema. 12Nashiryo Yesu naye aryo, atsiinisiwila ibulafu we kumulyaango kwe shiriimba nio areerere babaandu bukhosefu lwe kamafuki keewe. 13Aso, khakhutsye ibulafu we tsiweema is'ali, nga khwetyuukhile kumutaambo kweesi aba nakwo. 14Lwekhuuba ano sikhuli ni shiriimba shishimenyelawo ilala ta, ne khuweentsa shiriimba shishiitsya khubawo mu bulamu bubwiitsa.
15Nashiryo, khuubirira mu Yesu, khakhuwaaneyo busheele isi Wele khusaaya khwe khubuyila, nibyo bibyaano bye kiminwa kyeefwe, kikiruumbula lisiina lyeewe. 16Ne mukhebilila khukholatsaka bulayi, ni khukabanana ni basheenywe bye muli nabyo ta, lwekhuuba bino bili nibyo biwaanwa bibikhoyesa Wele.
17Ni muwulilatsake baraangilisi beenywe, mukholatsake byeesi babaloma. Nibo bababoolela inywe nga babaandu babaakhaabe ni she khukhwilomakho. Ni mubawulilatsake nio banyale khukhwoolelesa kumulimo ni kumwikhoyo, ne akhuba khubasitowelela ta, lwekhuuba shino mbaawo sheesi shibayeetakho ta.
18Ni mukhuloombelekho. Ifwe khwiyikina khuri, khuli ni bibyambaaso bikwalaafu, luundi khukana khwibirise ni lukoosi mu buli saambo yoosi. 19Ni musaambo ya buraawa, imbekontselela muloombe, nio inyale khukobosebwa isi muli khaangu.
20Ari inoomba Wele uwe lukoosi, uwabakobosa khukhwaama mu bafu khuubirira mu mafuki ke ndakaano ikhawawo, niye Umukasya Yesu, luundi, niye Umwaayi Umukhulu we kamasheese, 21abawe byoosi bibiili bilayi lwe khukhola byeesi akana. Luundi khali akholile mus'iinywe ibyo bibimwikhoyesa khulwa Yesu Kristo. Shiriifwa shibe isi niye, biilo ni biilo. Amiina.
Bilomo bimaliliisi
22Bebuulebe, imbaloomba mwikhalilikhe buurume bwase buno bububawandalasa, lwekhuuba naabaroneele mu biimbi.
23Ingana khubaboolela ndi yaaya weefwe Timosewo bamukangulula. N'aliba nga wolile, indiitsa ni naye khubabona.
24Ni mukhusheesele baraangilisi beenywe boosi, ni bakhosefu ba Wele boosi. Bebuulebe khukhwaama mu Itali babasheesa.
25Bubweela bube ni nanywe mweesi.
Currently Selected:
Baheburania 13: LPE
Highlight
Copy
Compare
Share
Want to have your highlights saved across all your devices? Sign up or sign in
The Bible in Lumasaaba © Bible Society of Uganda, 2016.
