Khuurakikha 13

Iburamu ni Loti baawukhana

1Baryo Iburamu n'umukyelama weewe Sarayi, nga baarurire i Misiri, bawaamba kumukhoosi kwe kumubiimbi kwe Mwaalo wa Kanaani. Loti naye waatsya ni nabo.

2Iburamu aaba ali umusaani umuyiindifu naabi, nga ali ni tsikhaafu, kamasheese, ni tsimbusi, atweela ni feetsa, ni zaabu biikali naabi. 3Kila akyeendaanaka busa mu mubiimbi kwe Mwaalo ukwo. Lwanyuma weetsa i Beseli, mu shifwo mumwaba lisari lyeewe khuunyoowa, akari a Beseli ni Ayi. 4Weetsa mu shifwo sheene mweesi aaba makiboole, mweesi oombekha shisheeso. Abweene awo, Iburamu weesaaya Umukasya.

5Loti uwaba nga akyeenda ni Iburamu, naye aaba ni kamasheese, ni tsimbusi biikali naabi, atweela ni be muungo mweewe ni baakulwa. 6Liiloba lyeesi baamenyakho lyaalekha khuubamala boombi buulayi ta, lwekhuuba bye buyiindifu byaabwe boombi byaba biikali naabi. 7Abalukhawo khuulomana akari e babaayi be bibyaayo ba Iburamu, ni babaayi ba Loti. Khu mbuka iyo, ba Kanaani ni ba Perizi nibo babaaba bamenya mu shibala isho.

8Kila Iburamu alomela Loti ari, “Ifwe khuli baalebe. Nashiryo, ikhabawo khuulomana akari aase ni nawe ta, namwe ikhabawo khuulomana akari e babaayi boowo ni babaayi baase ta. 9Bona iliwo liiswa liikali naabi lyeesi iwe unyala waakhalawo khuuyila. Nashiryo lekha khwaawukhane. Iwe siinga ukhalawo khuutsya khu lubeka lutweela, nase kane ikhalewo khuutsya khu lubeka luluundi.”

10 # Rak 2.10 Aryo kila Loti enyusa tsimoni tseewe, waalolelela buulayi, waabona nga litila lya Yorudaani lyoosi lili liilayi naabi, khuulola luubeka lwa Zowari, nga lilimwo kameetsi buulayi, nga libonekha nga kumukuunda kw'Omukasya, namwe nga liiswa lye Misiri. (Bino byoosi byakholekha nga Umukasya ashiili khuhesa biriimba Sodoma ni Gomora ta.) 11Aryo kila Loti eroborera umweene litila lya Yorudaani lyoosi, waakyeenda waalola kwe bwaamanyaanga. Musaambo iyo, Loti ni Iburamu baawukhana. 12Iburamu niye waarama mu shibala sha Kanaani. Ne Loti waatsya waamenya mu biriimba bye mu mubiimbi, woombekha lisari lyeewe mu shifwo shishikhaaba aleeyi ni Sodomu ta. 13Khu mbuka iyo, babaandu ba Sodomu baaba baabi naabi, nga booneka naabi isi Umukasya.

Iburamu atsya i Heburoni

14Lwanyuma lwa byoosi nga Iburamu ni Loti baamalile khukhwaawukhana, Umukasya waakanikha isi Iburamu ari: “Khukhwaama mu shifwo mweesi weemile awo, yinyusa tsimoni tsoowo ulole kwe ngaaki, ulole imwaalo, ibwaamanyaanga ni bukwaanyaanga. 15#Bur 7.5Liiswa lyoosi lyeesi ubona, ikhaalikhuwe iwe ni babetsukhulu boowo. Likhaabe lilyaabwe biilo ni biilo. 16Indi khuutsya khuukhuwa iwe babetsukhulu baakali naabi, babaakhafwaane busa nga lifukhuulu lye khu shibala. N'umuundu yeesi ukhaanyalise khuubala liifukhuulu, niye uulinyala khuubala babetsukhulu boowo. 17Nashiryo yinyukha ukyeende, wilikuuse mu shibala shino shoosi, mu buleeyi ni mu bubalaayi bwasho bwoosi. Lwekhuuba indi khuutsya khuushikhuwa iwe shoosi!”

18Aryo Iburamu waasaambula kamasari keewe, weetsa waamenya aambi ni kimisaala kye kamaani kya Mamure, mu Heburoni. Ibweene iyo isi ombekha shisheeso she khukhwisaayilakho Umukasya.

Currently Selected:

Khuurakikha 13: LPE

Highlight

Copy