Buraambi 8

1Ni Saulo abawo, wafukiilisana ni nabo khukhwiiribwa khweewe.

Saulo akubyeenga baafukiilisi ba Kristo

Ni khu shifukhu sheenesho, aabawo khuukubyeengebwa khukali isi baafukiilisi ba Kristo mu Yerusalemu. abo boosi babaaba bafukiilisi basalanisibwila mu byaalo bye Yuda, ni mu Samariya, akhali baarume bonyene nibo babaarama. 2Babaandu babesaaya Wele basiikha Sitefano, luundi baamulilila lukali. 3#Bur 22.4,5; 26.9-11Ne Saulo waakhakakho khuubona ari ahesa baafukiilisi ba Kristo, nga enjila mu buli intsu, nakhweesamo baafukiilisi, basaani ni bakhasi, waabara mu mapuusu.

Filipo aboolela Kamakhuuwa Kamalayi mu Samariya

4Ari baafukiilisi abo babaasalanisibwila oosi oosi baatsya nga baboolela Ilomo ya Wele. 5Filipo waatsya mu shiriimba shikhulu she mu Samariya, waaboolelayo bibiwaamba khu Kristo. 6Kamatuuli ke babaandu ni kaawulila Filipo, naluundi ni kaabona bye kamakaanga byeesi aakhola, baamurekeeresa ni kumwoyo mutweela. 7Bakali khu nibo babaabamo kimisaambwa kimibi kyabaruramo, nga kililila angaaki, ni babaandi babaakataala, ni baaleme, baawonesebwa. 8Aryo aabawo kumwikhoyo mukali mu shiriimba isho.

Simoni umufumu

9Aabawo umusaani mutweela lisiina lyeewe bari Simoni, uwaba nga akholatsaka bye bufumu mu shiriimba, naluundi nga waayiyangisa be linaambo lya Samariya boosi, nga aloma ari niye umuundu umukhulu naabi. 10Babaandu boosi khukhwaama khu we aasi khukhwoola khu we angaaki baamurekeelesatsaka naabi, nga baloma bari, “Umusaani yuno niye kamaani ka Wele kakalaangibwa kamaani kamakhulu.” 11Baamurekeelesatsaka baryo lwekhuuba mu mbuka ndeeyi abeeyangisatsaka lwe khukhola bye bufumu byeewe. 12Ne babaandu ni baamala khufukiilila kamakhuuwa kamalayi ke Buyiinga bwa Wele, ni lisiina lya Yesu Kristo byeesi Filipo ababoolela, boosi babatisibwa, basaani ni bakhasi beene. 13Ni Simoni mweene naye wafukiilila, nga waamalile khubatisibwa, wabetsaka atweela ni Filipo. Aryo nga wabonatsakile bye khubonelakho ni bye kamakaanga bikali bibyaba bikholebwa ni baarume, welaliila busa.

14Baryo baarume babaaba mu Yerusalemu nga baawuliile bari babaandu be Samariya baafukiiliile Ilomo ya Wele, baabarumanila Petero ni Yokana. 15Ne bano ni boolayo, baabaloombela bari bafukiilisi bafune Umwoyo Umukhosefu, 16lwekhuuba Umwoyo aba ashiili khubeekhakho na mutweela khu nibo ta, ne baaba babatisibwa busa mu lisiina ly'Omukasya Yesu. 17Lwanyuma Petero ni Yokana babarakho kamakhono kaawe, bafuna Umwoyo Umukhosefu. 18Ne Simoni tsana uwaba umufumu n'abona ari Umwoyo Umukhosefu abaweebwa lwe khureewakho kamakhono ke baarume, wabawa tsinusu, 19nga aloma ari, “Nase ni muumbe kamaani kano, nio nase buli muundu isi kane indatsakekho kamakhono kaase, afune Umwoyo Umukhosefu.”

20Ne Petero waamwiilamo ari, “Iwe wamweene ni tsinusu tsoowo ni muhele, lwekhuuba waambaasa uri kane ukule shiwaanwa sha Wele nga uraambisa tsinusu! 21Iwe s'uli ni bufunisi namwe ni kumukabo mu bwakaanisi buno ta, lwekhuuba kumwoyo kwoowo shikuli kumukwalaafu mu moni tsa Wele ta. 22Aso ni wibiiyise buubi bwoowo buno, uloombe Umukasya, nio manya nga shinyalikha akhwiyakhile shishambaaso shino shishiili mu mwoyo kwoowo. 23Lwekhuuba ise imbona nga iwe uli ni libuba libiririfu, luundi uli umubowe we bubwoonaki.”

24Aryo Simoni tsana naye welamo ari, “Inywe ni munoombele isi Umukasya, nio bilomo bino byeesi mulomele bilekhe khukhukholekhakho na shitweela ta.”

25Baryo Simoni Petero ni Yokana ni baamala khuumanyisa ni khuuboolela Ilomo y'Omukasya, baakobolayo i Yerusalemu, nga baboolela Kamakhuuwa Kamalayi mu byaalo bikali bye mu Samariya.

Filipo n'umu Esiyopiya

26Malayika w'Omukasya waaloma Filipo ari, “Yinyukha utsye wikhilile imwaalo we shiibala khukhwoola khu ntsila iyikhilila khukhwaama i Yerusalemu, khuutsya i Gaza, intsila iye kumubiimbi.” 27Aryo Filipo wenyukha, waatsya. Ne n'aba nga atsya, waakanana umusaani umu Esiyopiya umwomole. Aaba umuundu umukhulu, nga niye umukhulu we libiikhilo lye tsinusu mu buyiinga bwa Kandake, umuyiinga umukhasi uwe Esiyopiya. Umusaani yuno aaba weetsile i Yerusalemu khukhwisaaya. 28Ne n'aba nga akobolayo ingo, nga wikhaale mu likaali lyeewe lyeesi tsiŋwaaŋwa tsikhweesa, aaba asoma mu shitabo sh'omuŋoosi Yisaaya. 29Umwoyo waloma Filipo ari, “N'utsye isi likaali ilyo, ube aambi ni nalyo.” 30Filipo waatima, waatsya aambi ni likaali, waawulila umusaani nga asoma mu shitabo sha Yisaaya umuŋoosi. Filipo waamureeba ari, “Byeesi usoma uli khubimanya?” 31Umwomole watsana wamwiilamo ari, “Inyala indyeena khuubimanya khurusakho nga iliwo umuundu uuli khukhusontsoola?” Aryo walaanga Filipo ari aniine ekhale ni naye mu likaali.

32 # Isay 53.7,8 Shisiintsa sheesi umwomole aaba ali khuusoma khukhwaama mu byaronebwa bikhosefu nisho shino,

“Aayiliwa nga lisheese ni liyilibwa khukhwiiribwa,

nga khasheese ni khakhaniaaka ta nga bakhabekakho bubwooya,

naye aryo s'aloma ilomo yoosi ta.

33Bamubirisa buubi, balekha khumwokyesanisa bwa ŋali ta.

Naanu unyala wasontsoola bibiwaamba khu shikuuka sheewe?

Lwekhuuba buulamu bweewe bwarusibwa khu shiibala.”

34Kila umwomole areeba Filipo ari, “Nakhwikontseleele imboolele, naanu isi umuŋoosi alomakho bilomo bino? Elomakho umweene namwe aloma khu muundu ukuundi busa?” 35Kila Filipo waarakikhila khu byaronebwa bikhosefu byeene bino, waamuboolela kamakhuuwa kamalayi kakawaamba khu Yesu. 36Ne ni baaba nga bali khu ntsila batsya, boola mu shiifwo shishiilimo kameetsi, umwomole waaloma ari, “Bona kameetsi, shiina ndi shishindobesa khubatisibwa?” 37Filipo waamuloma ari, “Noola ufukiilila ni kumwoyo kwoowo kwoosi, unyala waabatisibwa.” Naye umwomole waamwiilamo ari, “Ifukiilila ndi Yesu Kristo niye Umwaana wa Wele.”

38Aryo umwomole waalakila likaali khukhwiimikha. Niye ni Filipo boombi beekha mu meetsi, Filipo wamubatisa. 39Ne ni baama mu meetsi, Umwoyo w'Omukasya khaangukho wayila Filipo. Umwomole walekha khumubonakho luundi ta, ne weloosela ni lukyeendo lweewe nga ekhoya. 40Ne Filipo lwanyuma waabonekhela mu Azoto, waabira mu biriimba byoosi nga aboolela kamakhuuwa kamalayi khukhwoolesa n'ola i Kayisaliya.

Currently Selected:

Buraambi 8: LPE

Highlight

Copy

Compare