2 Basesalonika 2
2
Khukhwiitsa khw'Omukasya
1 #
1 Ses 4.15-17
Ne ari be buulebe, bibiwaamba khu bilomo bye khukhwiitsa khw'Omukasya weefwe Yesu Kristo, ni khubuusanisibwila atweela is'ali, khubekontselela khuri, 2mulekhe khuyeŋaana wangu muryo mukhwaambaasa khweenywe, namwe khukhwisindukha kimyoyo kyeenywe ta. Nga bino bireerebwa lwe bye buŋoosi, namwe khuboolela, namwe ibaluwa, bibifwaana nga bibyaama isi Mwoyo Umukhosefu, namwe nga bibyaama isi khuli nga biloma biri shifukhu sh'Omukasya shayiitsa khaale. 3Mukhafukiilila umuundu yeesi khubawombesa na khafwiiti khoosi ta. Lwekhuuba shifukhu isho sishiliitsa ta, khurusakho nga bumiinyi bwanyoowele khukhwiitsa, n'umuundu uwe khukhwoneka nga bamalile khumurumbula, niye umuundu we khuhela. 4#Dan 11.36; Ezek 28.2Niye alikhaandisana luundi eniinise naabi khufuura buli shiindu shoosi shishilaangibwa shiri wele, namwe sheesi besaaya, nio ekhale Mwisaayilo Likhulu lya Wele, nga eyokesana ari niye Wele.
5Inywe si mushebulila muri, nga ise ni naba ni nanywe nababoolela bibiindu ibyo byoosi ta? 6Ne ari mwaamanyile muri iliwo shimuwaambiliile niye khubonekha, nio bari amanyikhe lubuula khu mbuka inyene. 7Lwekhuuba ari shimoonyo she kamaani ke bubwoonaki shiliwo shiraamba, ni nooyo ushiwaambiilila kane eloosele khukhola aryo khukhwoolesa ni balimurusawo. 8#Isay 11.4Nio lwanyuma balirumbula umuundu uwe bubwoonaki uyo, n'Umukasya Yesu Kristo alimuhesa nga araambisa kumuukha kwe mukhanwa mweewe, luundi amwiirire ilala ni khuumulikhamulikha khwe khukhwiitsa ni khubonekha khweewe. 9#Mat 24.24Khukhwiitsa khw'omuundu uwe bubwoonaki uyo khuliba khulwe buraambi bwe kamaani ka Sitaani, nga kabonekhela mu khukhola bye kamakaanga byoosi ni bye khukhwiyaangisa bye bubeeyi, 10ni khukhola bye bubwoonaki bwoosi, khuborosa ibo babaatsya khuhela. Babeene ibo balihela lwekhuuba baayikaana khukana bwa ŋali nio manya bawonesebwe. 11Ni lwe lomo yino, Wele abasiindikhila nibo khuborokha khwe kamaani khuraambile mu nibo nio akile bafukiilile bye bubeeyi.
12Ni shishaamamo babaakhalile nibo boosi kumusaango ibo babaakhafukiilila bya ŋali ta, ne bekhoyela bubwoonaki. 13Bebuulebe, shikhwakhila ifwe khusiima Wele busheele khu lweenywe, nga ni muli babaandu beesi niye akana naabi. Lwekhuuba khukhwaama makiboole, Wele abarobola inywe ari muwonesebwe khulwe khuwaanibwayo buraawa n'Umwoyo, ni khulwe khufukiilila mu bwa ŋali. 14Wele abalaangila inywe shino khuubirira mu Makhuwa Kamalayi keesi ifwe khwababoolela, ari nio munyale khunyoola shiriifwa sh'Omukasya weefwe Yesu Kristo. 15Ni nashiryo be buulebe, ni mwiimikhe ni kamaani, luundi muwandalalile mu byeesi khwabawa, nga khubaleekela khuubirira mu lomo namwe mu baluwa yeefwe. 16N'Umukasya weefwe Yesu Kristo umweene ni Wele Paapa weefwe uwakhukana ifwe, luundi wakhuwa ifwe khuwandalala khukhawawo ta, ni kumwiyikino kumulayi khulwe bubweela, 17abekhoyese kimyoyo kyeenywe, luundi abawandalase mu buli buraambi bulayi ni mu byeesi mukanikha.
The Bible in Lumasaaba © Bible Society of Uganda, 2016.