FILIPENSES 3

Xalla ni źoñi chimpiśkiśtan niźaśa lïkiśtan

1Weth q'ay Jilanaka, anćhukki Yöś Tatźtan kuntintupanź khella. Xalla ti weriź khjirtikiśtan wilta khjirśki anal xayraśućha, xalla ti khjirtaki anćhukalta añchaź wakiśićha. 2Niźaśa anćhukki ti pakuźchechi źoñinakźkiśtanź kuytaśa, niźaśa ni ana śuma lanqśñi źoñinakźkiśtanami, ni xañchi potźku chimpiñinakźkiśtanami; 3niźaśa ućhumnakćha cheqpacha chimpitanakaki, ni Espirituź yanapta Yöś amtiñinakami, niźaśa ućhumnakki Jesucriśtuźta khisku kuntintućhumćha, niźaśa ućhumnakki ana ni xañchiź pektakamkiś tasniñćhumćha. 4Ans wethtaź ni xañchikiś taski źelhćha. Anaź jëkhmi wethkiśtan tshan ni xañchikiś tasnasaćha: 5Niźaśa weth mathtikiśtan towqu thuñkiśtan werh chimpuchićha, niźaśa werhki Israelź lhokhkiśtan oqinćha, niźaśa werhki Benjaminź t'aqkiśl wakiśućha, niźaśa werhki hebreo źoñćha niźaśa hebreo źoñź matćha. Xalla ni judiu źoñinakź lï thaxinśkiśiki, werhki fariseo t'aqkiśtantaćha; 6niźaśa werhki ni lïkiś añcha thapa quśtantaćha, neqhśtan werhki ni Yöś kirïchi jilanaka tanśxapa qhurintaćha; ni lï patxparu juchjiptayśxapa, xalla ni lïki ana aqchukapantaćha. 7Wethkiś tuki thappacha tinakaki añchaź walatćha, xaśiki Criśtuź khen wethkiś tinakaki anaź ćhhulxapami wakiśićha. 8Xalla tinakaki ni Jesucriśtu Tata paxźku ana wakiśiñil nayućha, niźaśa ni Criśtuź khen ni lïnaka thappacha apt'ichinćha, neqhśtan werhki ni Criśtuźtan khiśxapa thappacha ni lïnaka khjuchiźtaqal nayućha 9niźaśa ni Jesucriśtu wathźkuki; xalla tïki anaź werh perśuna juchjiptayś lïki, ans Criśtuź thapa quśkiśtanćha, niźaśa ni juchjiptayśki Yöś thapa quśkiśtanćha. 10Werhki Criśtul paxśpekućha, niźaśa nïź jakatatta aśi niźaśa nïź t'aqhiśitanakal paxśpekućha; niźaśa ni irata tikhśl pekućha, 11niźaśa werhki ni tikhśinaka jakatatñil cherś pekućha.

Ućhumnakki ni irantiś imaśipanź irantićha

12Werhki ana thapa kumlichinćha khiś pekućha, niźaśa werhmi anaćha ch'uwa quśśitki; ans werhki tirapan Criśtu śalśxapa qhurućha, ans ni Jesucriśtućha tuki werh śalchiki. 13Jilanaka, werhpacha ana kumlichinćhal khiwćha; ans werhki tshil pawućha: Ni wirkin ekliñinaka cheqpachal thatźnućha, niźaśa ni uśhka thonñinakźkin quś thäwućha, 14xalla ni irantiśkin irantiśxapaki, neqhśtan ni tsewkta Yöśki Jesucriśtuź qharkiśtan ućhumnak qhawźa nïź onanś tanźnaxu.

15Thappacha ni thapa quśtan thurt'ichi jilanakaki, ućhumnakki xalla tuź pinsasaćha. Niźaśa anćhukkiź tshiqhutñiź pinst'asaź nïki, Yöśki ti pinsitanakamiź thëźnakićha. 16Niźaśa ućhumnakki ni ućhumnakaź irantita qamañan xaru qamśtanćha.

Ućhumnakki tsewkta źoñinakćhumćha

17Jilanaka werh irataź qamalla, niźaśa anćhukki ni śuma qamañchiś źoñinakźkiśtanź yateqa. 18Werhki anćhukakiś xalla ti qhaźwilta chïtuqalćha, niźaśa werhki anśiki anćhukakiś qäkan wiltal chïźkućha, niźaśa wakchi źoñinakaź ni Criśtuź tikhźta kuruśhxapa ćhhaxwqatkan qamćha, 19xalla ni źoñinakź tukuśinski añcha t'aqhiśinskinź khekićha; niźaśa ninakź yöśki ninakź perśun phuchhśxapaćha, niźaśa ninakaki ni aśśuka pächikiśtan tshantiź ayt'aśśa. Neqhśtan ninakaki ti yoq ćhhultaqinakkiśtanqaś pinsićha. 20Ans ućhumnakki tsewkta yoq źoñinakćhumćha, niźaśa ućhumnakki ni tsewktan liwrïñi Jesucriśtu Tata thonñiź thewźa, 21xalla nïki ti ućhumnaka ana wakiśiñi xañchi turkakićha nïź aśśiś xañchi irata khexu. Xalla nïki thappacha ni ćhhultaqinaka irpiś chawkh aśtan päkićha.

Currently Selected:

FILIPENSES 3: CHIPBO

Highlight

Compare

Copy