HEBREOS 7

Jesusaki Melquisedec irata timlu chawkh jilirićha

1Ti Melquisedecki Salem wathź reytaćha, niźaśa ni tsewkta Yöś timlu chawkh jiliriśaqaśtaćha. Neqhśtan ni Abrahamź ni reynakź śultatunaka atipźku kuttiźkitan, Melquisedecki Abraham śali ulanchićha neqhśtan Yöś nïźkiś yanapila khichićha; 2neqhśtan Abrahamki ni Melquisedecźkiś ni kira śalźku thappacha kantanakkiśtan qhalukhiñikiś t'aqźinchićha. Xalla ni Melquisedec thüki, tuź khićha “śuma juchjiptayñi reyćha”, neqhśtan nïki Salem reyśaqaśtaćha, xalla nïki tuź khićha “śuma qamañchiś rey.” 3Xalla ni Melquisedecź mä ephki anapantaź śiśśuka niźaśa nïź achchi ephnakami; niźaśa nïź mathta thuñkiśtanami anapantaź śiśśuka niźaśa ana nïź tikhźta thuñimi; xalla niźtaśaqaś ni Yöś Machhki watay wata timlu chawkh jilirićha.

4Ni Melquisedec cheqan źoñi khitataćha anćhukki nïź cherźna, niźaśa ućhum achchi eph Abrahampachaź ni reynakź śultatźtan kira śalźku kanta ćhhultaqinakkiśtan qhalukhiñikiś thächiki. 5Xalla ni Moisés lïkiśiki ni timlu jilirinakaki Leví t'aqkiśtan oqhñinakaćha, xalla ti jilirinakaki ni wathźkiśtan qhalukhiñikiś thapa ćhhultaqkiśtan mayś wakiśićha, ni źoñinakaki ninakź qhuy źoñinakaćha niźaśa Abrahamźkiśtan oqhñinakaćha ninaka irata. 6Niźaśa Melquisedecki anataćha ni Leví t'aqkiśtan oqhñi, xalla ti jiliriki ni Abrahamź qhalukhiñikiś ćhhultaqinaka thäta tanśićha, xalla nuź Melquisedecki Abrahamźkiś Yöś yanapila khichićha; 7niźaśa anaź jëkhmi anaź khesaćha, ni upañaźtaki nïź jilaź yanapila khitapanćha. 8Xalla ti qamañkiśiki ni qhalukhiñikiś ćhhultaqkiśtan mayñi źoñinakaki tikhśñikamaćha; ans ni Yöś śuma kintu Khjirtikiśiki tuź khićha, ni Melquisedec tira źethñi źoñźkiśtanźtaqaś chïćha. 9Xalla tuź śaqaś chïchuka khesaćha, xalla ni Leví t'aqkiśtan oqhñi timlu jilirinakaki, anśiki ni qhalukhiñikiś ćhhultaqinakkiśtanź mayćha, ninakaki niźtaśaqaś ni Melquisedecźkiś qhalukhiñi ćhhultaqinakkiśtan pakchiśaqaśśa, xalla ni Abraham nïźkiś paktikiśtan. 10Xalla tïki tuźutaćha, ni Melquisedec Abraham śali ulantan ni Abrahamki nïź xañchikiś nïźkiśtan oqhñinaka chhichatćha, xalla ninakaki ni oraki ima mathtataćha.

Pukultan timlu jilirinaka

11Xalla ni Israel wathaki ni Leviki timlu jilirinakźkiśtan lï tanśićha. Xalla ni timlu jilirinakaki ni źoñinaka źkayi quśśiś khisqati attasaź nïki, anaź yaqha timlu jiliri thonñi wakiśtasaćha, ana ni Aarón t'aqkiśtan oqhñi ans Melquisedecźkiśtan oqhñi. 12Xalla ni timlu jiliri kampiyakiź nïki, ni lïśaqaś kampiyśtanćha; 13Xalla ni ućhum Yöś Tatźkiśtanaki ni Yöś śuma kintu Khjirtikiśiki, tuź khićha: Ni Jesusaki anataćha ni Aaronź t'aqkiśtan oqhñiki, ans Judá t'aqkiśtan oqhñitaćha, ni Judá t'aqkiśtanaki anapan timlu jiliri ulanśtanćha, niźaśa anapanź neqhśtan ulanchićha. 14Niźaśa ućhumnakki śumaź śiśśa ućhumnaka Jesús Tataki ni Judá t'aqkiśtan thonchićha, niźaśa Moisesaki ti t'aqkiśtan anapan ni timlu jilirinakźkiśtan chïkanaki chïchićha.

15Niźaśa xalla tïki tshant qhanaćha ni ew timlu jiliri thonchiźlax nïki, ni Melquisedec irataćha, 16xalla ti timlu jiliriki anataćha ni źoñiź amtita lï patxparu, ans tshi ana aqchuk aśśiś źetkiśtan thonatćha. 17Yöśki xalla nïźkiśtan tuź khichićha:

“Amki watay wata thurñi

timlu chawkh jilirimćha,

xalla ni Melquisedec irata.”

18Xalla ni tukita irpiś lïki ana wakiśiñi niźaśa upa aśśiś khen t'oqhźtaćha, 19niźaśa ni Moisés lïki anapan źkayi quśśiś khisqatchićha, neqhśtan ućhumtaki ni lïkiśtan khen tshan khjusa lïchiśćhumćha, xalla nïźtan ućhumnakki Yöśkin makhatićha.

Ni tshan khjusa timlu jiliri

20Yöśki tshi tawqźtan ti thurt'ichićha. Ni yaqhap timlu jilirinakaki anataćha tshi tawqźtan thurt'itaki, 21ans ni Jesús Tatźkiśtanaki tshi thurt'iś taqu źelhchićha, xalla ni Yöś śuma kintu khjirtikiśiki, tuź khićha:

“Ni Yöś Tataki tshi tawqźtan

thurt'ichićha, ni thurt'itikiśtan

anapanź kephsnakićha: ‘Amki

watay wata thurñi timlu

chawkh jilirimćha.’ ”

22Xalla niźtikiśtan Jesusaki, ni tukita tawqkiśtan tshan khjusaź palt'iźinćha. 23Niźaśa ni tukita timlu jilirinakaki tamataćha, neqhśtan ninakź tira źetawk khen ni tikhś ninaka aqatćha; 24ans ni Jesusaki ana tikhśićha, niźaśa nïź timlu jilir lanqśki anapanź jëkh źoñźkinami thatźnakićha. 25Xalla niźtikiśtan Jesusaki nïź qharkiśtan ni Yöśkin makhatñi źoñinaka watay watxapaź liwriyasaćha, xalla nïki ti źoñinakźkiśtan Yöśkin watay wata qamśxapa palt'iźiñićha.

26Xalla nuź ni Jesusaki ućhumnakaź pektaćha timlu chawkh jiliri irpiñićha. Xalla nïki źkayi quśśiś, ana ujchiś, niźaśa ana khjuchiraraćha, niźaśa nïki ni uj päñi źoñinakźkiśtan t'aqsićha, niźaśa nïki ti tsewkta laram pachkiśtan tshan tsewkta yoqkin uchśtaćha. 27Niźaśa nïki anaćha ni yaqha timlu jilirinaka irata, ni jilirinakaki uywanaka konñitaćha niźaśa śapuru wilana thxotqatñitaćha, tuki perśun ujnakkiśtan thxotñitaćha, neqhśtan wath źoñinakź ujkiśtan thxotñitaćha. Ans Jesusaki perśunpacha tshi wiltaqaś niźaśa watay watxapa wilana thxotsićha. 28Niźaśa ni Moisés lïki ni ujchiś źoñinaka ni timlu chawkh jilirinaka irpiñi uchcha; ans ni Yöś tshi taqu thurt'itaki ni lï xarutaćha, niźaśa Yöśki nïź Machh timlu jiliri uchchićha, xalla ni jiliriki watay watxapa źkayi quśśiś uchśtaćha.

Currently Selected:

HEBREOS 7: CHIPBO

Highlight

Compare

Copy