2 CORINTIOS 11

Pawluź upa quśta

1¡Xanqaź anćhukki tshi qhaźtallami weth k'ark'arśkiśtan awantaki! Anćhukki werh qhaźtallamiź awantalla. 2Xalla ni weriź anćhukakiś k'aritatśki Yöśkiśtanź thonćha. Werhki anćhukakiś taqu onśinćha ni śalśki tshi luktaqźtanqaś śalźnasaćha, xalla ni luktaqaki Criśtućha, niźaśa werhki anćhuk tshi ana luktaqa paxñi mätaqaźtaqaś ni Criśtuźkin thëś pekućha. 3Niźaśa werhki anćhukakiśtan llakt'iźinućha, xalla ni śqoraki Evakiś añcha jiru quśtan millk'untichićha, xalla niźtaśaqaś anćhukmi millk'untisqatasaćha, niźaśa anćhuk ni Criśtuźkiś śuma quśtan pinsiśnakaki qatasaćha. 4Niźaśa anćhukki ćhhuluźchechi źoñimi Jesusiźkiśtan palxayan qhäśnataćha, xalla ni źoñiki ni werhnakaź palxayta taqunakkiśtan tshemataź khesaćha; niźaśa anćhukki ni Espíritu thapa quśtanź tanźa, xalla ni espirituki ni tuki tanźta Espirituźkiśtan tshemataćha, niźaśa ni Yöś śuma kintu tanźtikiśtanami tshemataćha. 5Niźaśa werhki anal ni chawkh apuśtulanakaź t'oqhźta khesaćha, ninakaki weth wiri thonchićha. 6Niźaśa werhki qhaźta phurh chïnmiźlani, xalla ni weth śiśnakkiśiki anaćha niźtit; xalla tinakaki thappacha anćhukakiś qhanan thëźtaćha.

7¿Niźaśa werhki ni Yöś śuma kintu maśinkanaki anapan ćhhulumi maychinćha nïki ana wali pächinx khesaya? Niźaśa werhki anćhuk paqhi khisqatśxapa amu quśśiś khissinćha. 8Niźaśa werhki anćhuk yanapśxapa niźaśa anćhuka manta päśxapa ni yaqha Yöś kirïchi źoñinakźkiśtan päś tanśinćha. 9Niźaśa werhki anćhukatan khikanaki upupchinćha, neqhśtan ana jëkhźkiśimi maśśinćha; niźaśa ni Macedinakiśtan thonchi Yöś kirïchi jilanakaź ni wethkiś phalhtiźiñi thächiki. Ans werhki anćhukakiś ana maśinś pekchinćha, xalla nuźupan tira päćha. 10Niźaśa werhki cheqpacha ni śuma Criśtu paxućha, niźaśa weriź Acaya yoqkiś maśintaki anaź jëkhmi wethkiśtan qhañasaćha. 11¿Qhaźtikiśtan werh niźta chiyuxo? ¿Ni ana anćhuk pekqux nuź chiyasaya? ¡Yöśki werh cheqpacha anćhuk pekñi śiśśa!

12Niźaśa werhki xaqhnuź päyinźlaxa, xalla nuźupanl päćha, ni wethtan śhikt'aś pekñi toskar źoñinakźtanaki, niźaśa ninakaki werh irataź paxqatś pekćha. 13Niźaśa ninakaki millk'untiñi toskar apuśtulunakaćha, niźaśa Criśtuź apuśtulanakaźtaqaś kuthźa. 14Xalla tïki anaćha iśpantichuka, ni Saxrapachaź Yöś anjilaźtaqaś kuthźa; 15Xalla niźtikiśtan ni Saxriź manta päñi źoñinakaki ni juchjiptayñiźtaqaś khïkhićha. ¡Xalla tinakaki ninakź pätikiśtan paxtaź khekićha!

Pawluki apuśtula khikan t'aqhiśi

16Niźaśa anćhukakiś wiltal chiyućha anax jëkhmi werh lukurataćha khikan pinsila; xalla nuź anćhukki pinsakiź nïki, tshi lukurataźtaqaś werh chïqatalla, niźaśa werhki tshi qoluk chipasaćha, 17xalla tuź chipkuśti tshi lukurataźtaqax khila, ana Yöś pekta taqunakax khila. 18¡Niźaśa wakchi źoñinakaki perśun ćhhultaqkiśtan chipćha, niźtaśaqaś werhmi chipaćha! 19Niźaśa anćhukki añcha śiśñi khïkhinćhukćha, ans anćhukki ni lukurat źoñinaka añcha thapa quś awantićha, 20niźaśa anćhukki ni anćhuk tsomanchi manta päxkhiñinaka kaśinćhukćha, ninakaki anćhuk ana susikchiś manta päqatćha niźaśa anćhuk q'otćha, niźaśa ninakaki anćhuk iñarćha niźaśa anćhuka yukhkiś tsxaxpćha. 21Niźaśa werhki ni chïś aśućha, ¡werhnakki niźta khïkhiśxapaki anaź acha źelhćha!

Niźaśa ni yaqha źoñinakat ana eqhsku chïchićhax nïki, werhmiśaqal ana eqhsnaćha, qhaźtami tïki tshi lukurataźtaqast khećhani. 22¿Ninakaki hebreo źoñinakaqaya? Werhmi niwkhtitśaqaśśa. ¿Ninakaki Israel źoñinakaqaya? Werhmi niwkhtitśaqaśśa. ¿Niźaśa ninakaki Abrahamźkiśtan oqhñinakaqaya? Werhmi niwkhtitśaqaśśa. 23¿Ninakaki Criśtuź manta päñinakaqaya? Werhki ninakźkiśtan tshantitćha, xalla tuź chïkuki tshi lukurat źoñiźtaqal chiyućha. Niźaśa werhki ninakźkiśtan tshanti lanqśinćha, niźaśa werhki ninakźkiśtan tshanti karsilkiś chawkhtittaćha, niźaśa ninakźkiśtan tshanti xwattittaćha, niźaśa werhki wakchi wilta tikhśmaya źelaytućha. 24Niźaśa ni judiu źoñinakaki taxśnuku wilta werh chephqhalu sanqu laśu xwatta mutchinćha. 25Niźaśa chheph wilta werh tuñźtan xwatchićha, niźaśa tshi wiltaki werh maśtan ćhakhchićha. Niźaśa chheph wilta ni weriź oqhta walsanakaki qhaśkiś qatśićha, niźaśa weriź qhaśkiś tikhśmaya khen tshi nöxźtan tshi wëntiźtan ni chawkh qot mora watchinćha. 26Niźaśa wakchi wilta oqhchinćha xalla nuź oqhkan ni pujuran t'aqhiśiś watchinćha, niźaśa thañ źoñinakźkiś wakt'ichinćha, niźaśa weth źoñinakźkiś niźaśa yaqha wathchiś źoñinakźkiśimi t'aqhiśiś watchinćha. Niźaśa ni chawkh watharan llakinaka watchinćha, niźaśa ni xochiranami niźaśa ni qotaranami, niźaśa ni toskar jilanakź llaki thäta watchinćha. 27Niźaśa werhki ni lanqśnaka niźaśa ch'amanaka watchinćha; niźaśa werhki qhaź wilta ana thxaxchi qhantatchinćha; niźaśa werhki ćhherkiśtan qhaśkiśtan t'aqhiśśinćha; niźaśa qhaź wilta ana lulhchi źelhchinćha; niźaśa werhki śkiti upaź khen ni sakkiś t'aqhiśśinćha.

28Niźaśa werhki ti ćhhultaqkiśtan niźaśa yaqha ćhhultaqkiśtan śapurul llakiśhućha, niźaśa thappacha ni Yöś kirïchi jilakźkiśtan llakt'iźinućha. 29Niźaśa tshïsuñaź läkhenaki werhśaqal läkhiwćha; niźaśa yaqha jila ujkiś thxotsqatanaki werhkil llakiśhućha. 30Niźaśa chipchukat źelhćhax nïki, werhkil chipaćha ni weriź upaquśhta ćhhultaqinakkiśtanaki. 31Ni Jesús Tatź Yöś Ephki wiñayxapa śuma quśśiś aytita khiś wakiśićha, nïkiź werh cheqpacha chïñi śiśśa. 32Niźaśa weriź ni Damasco wathkiś źelanaki, ni Aretas reyki irpiñi źoñi uchchićha, xalla ni źoñiki werh tanqatśxapa ni chawkh watha luśh śananakkiś cheqśñi źoñi uchchićha; 33Niźaśa werhki ni chawkh watha muyuntita uykiśtan tshi wintankiśtan niźaśa tshi kanaśtikiś śhujuntaćha, xalla nuź ni irpiñïź qharkiśtan atipchinćha.

Currently Selected:

2 CORINTIOS 11: CHIPBO

Highlight

Compare

Copy