1 TIMOTEO 3
3
1Xalla tïki cheqpachapanćha.
Yöś kirïchi źoñinaka irpiñiźkiśtan
Niźaśa tshïsuñaki ni Yöś kirïchi źoñinakat irpićhax nïki, śuma lanqśñiź lanqźa. 2Xalla ti lanqśiś jilaki anaź jëkhmi aqasaćha. Xalla ni jilaki tsha mätaqchiśqaś khiśtanćha, niźaśa ch'uwa qamañchiś khiśtanćha, niźaśa muspa khïkhichi śuma rispitta khiśtanćha. Niźaśa thonśñi źoñinaka qhawśñi khiśtanćha, niźaśa thaxinśxapami walxa khiśtanćha; 3xalla ni irpiñiki ana likhñi khiśtanćha, niźaśa ana ni qichasñi źoñinakźtan munaśñi, ans oqśñi quśśiś khiśtanćha, llanu quśśiś khiśtanćha, niźaśa ni päśnakkiś ana quś thäñi khiśtanćha. 4Niźaśa ni irpiñiki nïź qhuy źoñinaka śuma irpiśtanćha, niźaśa nïź matinakaki śuma kaśñi niźaśa śuma quśśiś khiśtanćha; 5xalla ni perśun qhuy źoñinaka ana irpi atñiśti, ¿xaqhnuźt ni Yöś kirïchi jilanaka irpasaxo? 6Niźaśa ni irpiñi źoñiki ana uśhka Yöś kirïchi khiśtanćha, anax nïpacha mit quśśiś khisku Saxraźtaqaś ujkiś thxotsla. 7Niźaśa ni irpiñiki Yöś ana kirïchi źoñinakźkiś śuma źoñi khita khiśtanćha, ana źoñźkiś aśi khiśxapa niźaśa ana ni Saxriź chalkiś tansxapaki.
Ni diaconononaka xaqhnuź khiśtantaya
8Xalla niźtaśaqaś ni Yöś kirïchi źoñinaka irpiñiki, śuma quśśiś ana taqu kerhñi khiśtanćha, niźaśa ana likhñi, niźaśa ana päs kanśnakkiśqaś quś thäñi khiśtanćha. 9Niźaśa ninakaki ućhum cheqpach tawqkiś kirïtala xalla ni tawqkiśpan quś thäśtanćha, niźaśa ch'uwa quśśiś qamśtanćha. 10Tuki ninakaki llakinakźtan yanźta khiśtanćha, xalla neqhśtan ninakźta ana moq'u źelan ninakaki ni irpiś manta päsaćha. 11Niźtaśaqaś ninakź mätaqaki śuma quśśiś khiśtanćha, niźaśa ana inapanqaś chïchiñi khiśtanćha, ans thappachkiś werarapan chïñi khiśtanćha. 12Niźaśa ni diacononakaki, tsha mätaqchiśqaś khiśtanćha, niźaśa nïź okhalami, qhuy źoñinakami śuma irpi śiśtanćha. 13Niźaśa ni diacononakaki śumaź lanqźnakiź nïki, xalla nïki cheqan śuma źoñi khitaź khekićha, niźaśa nïź thapa quśśiś khen niźaśa Jesucriśtuź khen śumaź qamakićha.
Ni weraraki ućhum Yöś tawqkiśtan thonćha
14Werhki waxillal am cherśñi oqaćha; ans werhki ti kartaqal khjirźkućha 15niźaśa werhki qataź nïki, anćhukki tshi Yöś kirïchi źoñinakaźtaś qamakićha, niźaśa ni źethñi Yöś kirïchi jilanakaźta, ti jilanakaki ni werar tawqkiśtanpanź thurt'ićha. 16Niźaśa ni weraraki ućhum Yöś tawqkiśtan thonñiki añcha paqhićha, xalla ni werar taqukiśtanaki anapanź teqinaśśuka:
Criśtuki źoñi irata xañchichiś
thonchićha, niźaśa nïź Espirituźtan
atipchićha, neqhśtan anjilanakaź
chertataćha.
Xalla ti chertaki thapa chawkh
wathanakqhuñik maśintataćha,
ti yoqkiś źelhñi źoñinakaki nïźkiś
kirïchićha, neqhśtan tsewkta
qhankin tanźtaćha.
Currently Selected:
1 TIMOTEO 3: CHIPBO
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Chipaya © Sociedad Bíblica Boliviana, 2004.
