Efe 3

Ɨnû mbe nɨ Pɔ̂l nyaʼa ghɨ əmbɨ bə̂d mbe nɨ kaʼi mɨ̀Jû

1À yɨ ɨmbə̀ʼ ənû zɔ̂ nɨ Ŋwìə̀ fɔtɨ bə̂d ənɨ mbɨ mɔʼ nɨ mɔ̌, Pɔ̂l, yeʼ wə̀d ndəŋ ɨmbə̀ʼ mbə̀n mbe nɨ kaʼi mɨ̀Jû. Mə yɨə wə̀d ndəŋ ɨmbə̀ʼ ɨghəm nɨ mə wɨə ghà ɨkə̂n chɔ̀m ɨmbə̀ʼ ə Kristo Yeso. 2Mə kyerɨ ni mbə fə zu ɨmbə̀ʼ ə̀fàʼì ze nɨ Ŋwìə̀ chɔʼ əmɨ naʼ ɨ num. Wɨ̀ nyaʼa chɔʼ əmɨ ni mə̀ gha ɨmbə̀ʼ ɨ̀chɔ̀m we nɨ wɨ̀ ghɨ ənɨ ə nən. 3Ŋwiə̀ nyaʼa ghɨ̀ mə kyerɨ ɨnû mbe nɨ yeʼ ənə̀mə, ɨchî nɨ mə fə kəʼ ŋwàʼnɨ̀ ənɨ akə ɨŋgam. 4Mbə mɨ foŋ, mbə ɨtu bɨrɨ zeŋ ɨmbə̀ʼ ənû ze nɨ mə̀ kyerɨ dè ənû zɔ̂ nɨ yeʼ ənə̀mə ɨmbə̀ʼ ə Kristo. 5Chəi Ŋwìə̀ nyaʼa ghɨ ni tɨ̀ghə̀m rɨ bə̂d te nɨ nyaʼa fə che kyerɨ ənû zɔ̂ ɨchî nɨ wɨ̀ fə che ənjìm Əzwî tɨ̀nîn chwi əmbɨ mbi bə̂d tom zeŋɨ bə̀ chwi əmbɨ mbi bə̂d ɨ̀kə̀n. 6Ənû zɔ̂ nɨ yeʼ ənə̀mə yɨ ni, ənjìm ɨkə̂n chɔ̀m, bə̂d mbe nɨ kaʼi mɨ̀Jû fə sɨ mə̀jɨnəb mbɨ mɨ̀Jû. Mbɨ fə sɨ ɨsɨ ɨnyod tɨ ənɨ ə nyamnyod mɔʼ. Mbɨ fə bə̀ berɨ əbà ənɨ ənû ze nɨ Ŋwìə̀ nyaʼa che ənjìm ə Kristo Yeso kàʼ.

7Mə wɨə fàʼə̀ nɨ ghà ɨkə̂n chɔ̀m wɔ̂ ənjìm ɨ̀chɔ̀m Ŋwiə̀ we nɨ wɨ̀ che ənjìm ɨka məd nèʼ əmɨ əŋgu. 8Ka à bè yeʼi ni mə kə chè wɨ kwa rəbɔʼ bə̂d Ŋwiə̀ mɨ̀jìm, àyɨə Ŋwiə̀ nyaʼa ghɨ̀ ɨ̀chɔ̀m ənɨ ə num ni mə̀ gha əmbɨ ə bə̂d mbe nɨ kaʼi mɨ̀Jû ɨmbə̀ʼ mbɔ̂n ze nɨ chəi zɨ̀ bɨrɨ nɔ mì, nɨ tɨ̀ berɨ àmei ɨchî nɨ mbɨ kyerɨ ə Kristo. 9Wɨ̀ nyaʼa bə̀ chɔʼ əmɨ ni mə̀ ghɨ wə̀d jìm kyerɨ ənû zɔ̂ nɨ yeʼ ənə̀mə, nɨ Ŋwìə̀ we nɨ nyaʼa tekɨ ɨghɨjìm, nyaʼa nə̀m ɨŋga i fîŋ tɨ ənɨ wɨ̀ nyaʼa tekɨ ɨsɨg. 10Wɨ̀ nyaʼa ghɨ̀ əne, ɨmbə̀ʼ tɨ̀nîn, ənjìm ɨfetɨ bə̂d Kristo, ɨzwî ka ka mbe nɨ yeʼ ɨkaŋ fɔrɨ mɨfɔ̂n mɨ̀mə̌d mbe tɨ mbɨ zə ɨwe Ŋwiə̀ ənɨ mɨnə̂njɨ̀ nɔnɔʼ. 11Əzɔ̂ yɨ ənû nɨ wɨ̀ nyaʼa fə taŋɨ bɔŋ wɨ̀ nyaʼa sɨə tekɨ ɨsɨg. Wɨ̀ fə chè ənjìm ə Kristo Yeso a Ə̀nùŋɨ̀sɨg ghɨ̀ ənû rəŋgu. 12Ənɨ ɨfɔtɨ mbɨ Kristo bə̀ fɔrɨ ənjìm ɨbenɨ we nɨ tɨ̀ nuŋ ɨgwɨ məd, tɨ̀ fə berɨ ɨka nɨ wò əsɨ ə Ŋwiə̀ nɨ chəi ɨbɔɔ. 13Əne mə wɨə buʼ ɨbɔ ni tɨ tə fîŋ bɔd i, ɨmbə̀ʼ ɨghəm nɨ mə wɨə zəə ŋgəʼ ɨmbə̀ʼ əwən. Ɨnû mbɔ̂ jìm yɨ ɨmbə̀ʼ weerɨ əwən.

Kristo ə ghaʼ bə̂d

14Mə mɨ kɔndɨ ənû ze nɨ Ŋwiə̀ nyaʼa fə taŋɨ, mə chìndɨ̀ ɨtu ɨnywɨ ɨfě Mbǎʼ 15we nɨ ɨnəbɨ jìm we nɨ yeʼ ɨkaŋ mbɨ we nɨ yeʼ ɨgwɨ ə si nɨŋ ɨkum rɨ ɨbɔ. 16Mə wɨə kɔ̀ŋgɨ̀ ə Ŋwiə̀ ni, ɨchî nɨ wɨ̀ berɨ mbɔ̂n ze nɨ ka zɨ bɨrɨ nɔ mi i, ɨ we tɨ wɨ̀ ghɨ̀ tə fîŋ kaanɨ ənjìm ɨka we nɨ Əzwî əməd ə nàʼə̀. 17Mə wɨə bə̀ kɔ̀ŋgɨ̀ə̀ ni ə ɨbenɨ ghɨ ni Kristo chub ɨŋga tə fîŋ fɔrɨ ni mbə̀ ghaʼ ə Ŋwiə̀ bə̀ ghaʼ mbə bɔŋgɔb. Mbə mɨ ghɨ əne, mbə bɨrɨ yeʼ ɨghabɨ əzed nɨ ɨghaŋ nyɨ ə si, bə̀ yeʼ ɨghabɨ ə nəb nɨ mbɨ bɔm ɨgun əchɨ. 18Mə wɨə kɔ̀ŋgɨ̀ ə Ŋwiə̀ ni mbə̀nə mbɨ ə bə̂d Ŋwiə̀ mɨjìm berɨ ɨka nɨ kyerɨ ni Kristo ə ghaʼ əwən əndan. 19Mə wɨə kɔ̀ŋgɨ̀ ə Ŋwiə̀ ni mbə̀ kyerɨ ni ɨchî nɨ Kristo ghaʼ əwən ə chè ɨchî nɨ tɨ̀ bə̂d kyerɨ. Mbə mɨ kàŋ kyerɨ ɨchî nɨ wɨ̀ ghaʼ əwən njɨ mbə mɨ̀chì bɨrɨ sɨ yeʼ ɨghabɨ mɨchî Ŋwiə̀.

20À yɨə Ŋwìə̀ naʼ ɨka we nɨə fàʼ ɨŋga na. Məd we nɨ tɨ̀ wɨ̀ ghɨ̀ ɨnû nɨ nɔʼ chè mbe nɨ tɨ̀ rɨ̀ biirɨ, kɨ̀ mbe nɨ tɨ̀ kɔndɨ. 21Tɨ̀ghə̀m rɨ bə̂d rɨ̀jìm te nɨ yeʼ ɨŋga ɨfetɨ bə̂d Kristo mbɨ ə bə̂d mbe nɨ yeʼ ənɨ ɨfɔtɨ mbɨ Kristo Yeso wumnɨ Ŋwiə̀ koŋ koŋ! À yɨ əne.

Currently Selected:

Efe 3: mgo

Highlight

Copy

Compare