2 Kɔ 10
10
Pɔ̂l nyaʼa ghàm ɨ chwi ni ə̀fàʼì əməd ə kuʼ
1Mɔ̌ Pɔ̂l, wɨə nɨŋ ɨkum Kristo we nɨ nyaʼə bɔtɨ ɨnyod bə̀ bɔtɨə fîŋ buʼ ɨbɔ ɨ nən. Bə̂d mɔʼɔ rəbɔʼ nən mbɨə ghà ni mə wɨə swi ɨnyod ənɨ mə yeʼ ɨfě nən, àyɨə mə berɨ ɨka fîŋ ənɨ chəi əmɨ mbɨ nən. 2Mə wɨə buʼ ɨbɔ ni ənɨ mə̀ yeʼe əsɨ nən, tɨ mbə̀ nyeŋ əmɨ mə̀ ghamə mbɨ ɨka fîŋ. Mə kyerɨ ni mə we tɨ̀ mə ghàm mbɨ ɨka fîŋ əbɔʼ bə̂d mbe nɨ kɔndɨ ni tɨ̀ wɨə ghɨ̀ ɨnû ɨchî nɨ bə̂d mɨ̀sɔŋɨchù ə ghɨ̀ə̀. 3Ka à bè yeʼi ni tɨ̀ wɨ ɨŋga ɨsɨg, àyɨə chəi tɨə màʼə̀ bid ɨchî nɨ bə̂d mɨ̀sɔŋɨchù ə màʼə̀. 4Ka ɨghɨ bid mbe nɨ tɨə zɔ̀ŋə̀ mbɨ rɨwən yɨ i ɨghɨ bid bə̂d mɨ̀sɔŋɨchù. Mbɨ yɨ ɨghɨ bid Ŋwiə̀ nɨ berɨ ɨka nɨ chəkɨ ɨsɨ mbe nɨ bə̂d pə̀n məd ka əŋgu. 5Tɨ̀ wɨə nɨŋ ɨghɨ bid mbe nimnɨ ɨnû mɔʼɔ mbe nɨ bə̂d ə tàŋ ɨmbə̀ʼ mbɨwən. Tɨ̀ wɨə bə̀ nɨŋə nimnɨ ɨnû jìm mɔʼɔ mbe nɨ mbɨ nɔ nɨ kən ni tɨ bə̂d kyerɨ ə Ŋwiə̀. Tɨ̀ wɨə nɨŋ ɨghɨ bid mbe baŋə tɨkɔndɨ rɨjìm, sɨ ghɨ̀ ni tɨ zuunɨ ə Kristo. 6Ənɨ mbə̀ fə chwi ni mbə mbɨə zuunɨ ə Kristo, tɨ̀ bɨrɨ sɨ zɨ ɨchə ɨgwɨ ə bə̂d mbe nɨə chəi mbɨə zuunɨ əməd.
7Mbə mbɨə neŋ ɨghɨ àmei əsaŋ əsaŋ. Wə̀d mɔʼɔ mɨ kyerɨ ni tə yɨə wə̀d Kristo, wɨ̀ bə kyerɨ ni tɨ̀ yɨə bə̀ə bə̂d Kristo ɨghabɨ ə məd. 8Ka à bè yeʼi ni mə wɨə goŋ ɨgɔ̂ əku ɨmbə̀ʼ ɨka we nɨ Ə̀nùŋɨ̀sɨg naʼ ɨ na, chəi mɨ ətu ə bɨrɨ nìd. Ɨka we yɨ ni tɨ̀ ghɨ mbə təm kàànɨ̀, kaʼi nɨ ghɨ ni tə fîŋ bɔd. 9Tɨ zɨə chub i ɨghabɨ ni mə wɨə fàŋ əwən mbɨ ɨ̀ŋwàʼnɨ̀, 10ɨmbə̀ʼ ɨghəm nɨ bə̂d mɔʼɔ mbɨə ghàə̀ ni, “Ɨ̀ŋwàʼnɨ̀ mbe nɨ wɨ̀ ŋwaʼnɨ mbɨə kà əku bə̀ tɔə, àyɨə ənɨ wɨ̀ yeʼ əkaʼ na, ɨ wɨə bɔrə, chəi ɨŋgam məd ə bə̀ yim mɨnib.” 11Tɨkwɨrɨ bə̂d tɔ̂ berɨ kyerɨ ni ɨnû mbe nɨ tɨ̀ ŋwaʼnɨ nɨ chəi əwa rɨmbin, tɨ̀ bɨrɨ ghɨ̀ ənɨ tɨ̀ yeʼ mbɨ nən.
12Chəi tɨ̀ bɨrɨ tɔ mɨg ta rɨtəb kɨ̀ bè mɨ̀g à ɨnyod mbɨ mɨ̀mə̌d mɔʼɔ mbe nɨə goŋ ɨgɔ̂ ni mbə mbɨə fàʼə̀ chè bə̂d cherə. Mbɨ yɨ ɨneŋ, ɨmbə̀ʼ ɨghəm nɨ ɨ mbɨə mɨ̀g ə ɨnyod mbənə mbənə. Ɨ mbɨə bə̀ mɨ̀g tə rɨtəb mbənə mbənə. 13À yeʼ ɨmbə̀ʼ əwa, chəi tɨ̀ bɨrɨ goŋ ɨgɔ̂ chè ɨchî nɨ tɨ̀ berɨ nɨ goŋ. Àyɨə tɨ̀ mɨ kəb goŋ, tɨ̀ bɨrɨ goŋ pè ənɨ ɨ̀nə̀rɨ̀ ə̀fàʼì we nɨ Ŋwìə̀ naʼ ɨ na, bə̀ goŋ əkaʼ nən. 14Chəi tɨ̀ nyaʼa chè ɨ̀nə̀rɨ̀ ənɨ tɨ̀ nyaʼa yeʼe əsɨ nən. Tɨ̀ yɨə bə̂d rɨtu nɨ nyaʼa yeʼe əsɨ nən mbɨ ɨkə̂n chɔ̀m ɨmbə̀ʼ ə Kristo. 15Chəi tɨ̀ bɨrɨ goŋ ɨgɔ̂ ɨmbə̀ʼ ə̀fàʼì ze nɨ bə̂d cherə faʼi. À ɨkɔndɨ yɨ ni ɨchî nɨ ə ɨbenɨ ə kwiə, a ə̀fàʼì əkaʼ nən ə bɨrɨ bə̀ sɨə nɔʼə wò ɨmbì, 16ɨmbə̀ʼ tɨ we tɨ̀ rɨ̀ bə̀ ghà ɨkə̂n chɔ̀m wɔ̂ ɨŋga ɨbeŋ cherə. Tɨ̀ rɨka kəb a nɨ goŋ ɨgɔ̂ ɨmbə̀ʼ ə̀fàʼì ze nɨ mbɨ faʼ ɨŋga ɨsɨ ə̀fàʼì wə̀d cherə.
17Ə zɨ ɨŋga Ə̀ŋwàʼnɨ̀ ə Ŋwiə̀ ni,
“Wə̀d mɔʼɔ mɨ kə̀b goŋ ɨgɔ̂,
wɨ̀ goŋ yeʼ ɨmbə̀ʼ ənû ze nɨ Ə̀nùŋɨ̀sɨg ghɨ̌.”
18Chəi Ə̀nùŋɨ̀sɨg ben wə̀d we nɨ gha ni tə fàʼ chè bə̂d cherə. Ɨ wɨə benɨ yeʼ we nɨ məd ziə ghà ni wɨ̀ fə fàʼ ɨchî chɔ̀m.
Currently Selected:
2 Kɔ 10: mgo
Highlight
Copy
Compare
Share
Want to have your highlights saved across all your devices? Sign up or sign in
© 2013, Cameroon Association for Bible Translation and Literacy
