Tès 5
5
Mbə̀ tekɨ ɨnyod wòm nyùmə̀ we nɨ Ə̀nùŋɨ̀sɨg bɨrɨ wɨrɨ yeʼe
1Mba bɔŋgɔb, chəi əton nɨ ŋwaʼnɨ ɨ nən ɨmbə̀ʼ nyùmə̀ kɨ̀ ɨmbə̀ʼ ɨni mbe nɨ Ə̀nùŋɨ̀sɨg bɨrɨ wɨrɨ yeʼe, 2ɨmbə̀ʼ ɨghəm nɨ mbə̀ fə kyerɨ ə kwàʼ ɨchî chɔ̀m ni əni ze nɨ Ə̀nùŋɨ̀sɨg bɨrɨ wɨrɨ yeʼe bɨrɨ yeʼ àmei ɨghabɨ ɨchî nɨ ɨjɨ ə yeʼe ɨzimɨ. 3Ənɨ bə̂d ə ghàə̀ ni, “Tɨ̀ wɨ a ənɨ əbɔrəbɔd, chəi əton nɨ bɔ ənû ə mɔʼɔ,” ŋgəʼ rɨbɔ̀ŋ bɨrɨ saʼ nyɨ ɨgwɨ mɨ̀mə̌d àmei ɨghabɨ ɨchî nɨ əyi ə zu rɨbuʼ ənɨ wɨə nombɨə. Chəi bə̂d bɨrɨ vɨ rɨŋga ŋgəʼ ze. 4Àyɨə mba bɔŋgɔb, chəi mbən ə ghɨ̀ ɨnû rɨbɔ̀ŋ ɨghabɨ ə bə̂d mbe nɨ yeʼ ɨŋga ɨsɨ firɨ, nɨ əni ze ə bɨrɨ saʼ yeʼe ɨgwɨ nən ɨchî nɨ ɨjɨ ə yeʼe. 5Mbə̀n mɨjìm mbɨə ghɨ̀ ɨnû nɨ kuʼnɨ àmei ɨchî nɨ bə̂d ə ghɨ̀ əziə ənɨ ɨsɨ ə zeŋə. Ka tɨ yɨ a bə̂d nɨ chəi tɨə ghɨ̀ ɨnû nɨ kuʼnɨ ɨghabɨ mbe nɨə ghɨ̀ ɨnû ɨzimɨ kɨ̀ ɨŋga ɨsɨ firɨ. 6Əne tɨ rɨ̀ gwenɨ a ɨchî nɨ bə̂d cherə ə gwenə nɨ chəi mbɨ kyerɨ ɨnû nɨə chèə̀, àyɨə tɨ chub ɨkyèʼe kyerɨ ɨnû nɨə cheə bə̀ yimbɨ a ɨnyod. 7Bə̂d mbe nɨə gwenə, mbɨə gwen ɨzimɨ, mbe nɨə nɔə beə, mbɨə nɔə beə ɨzimɨ. 8Àyɨə ɨchî nɨ tɨə ghɨ̀ ɨnû nɨ kuʼnɨ, tɨ̀ yimbɨ a ɨnyod, zɨ̀ fîŋ ɨgun ə Kristo bə̀ ghaʼ mbə bɔŋgɔb àmei ɨghabɨ ɨchî nɨ sɔgyɨ̀ zɨ ə parɨwa ətənɨ nɨ kən ɨgɔ̂. Mbə̀ nùŋ ɨkɔndɨ wòm ɨchî nɨ Ə̀nùŋɨ̀sɨg bɨrɨ chɨ əwa rəŋgəʼ àmei ɨghabɨ ɨchî nɨ sɔgyɨ̀ zɨ ɨdəm ətənɨ nɨ kən ətu. 9Chəi Ŋwiə̀ nyaʼa chɔʼ əwa ɨmbə̀ʼ zɨ ŋgəʼ ɨgwɨ na. Wɨ̀ nyaʼa chɔʼ əwa yeʼ ni tɨ̀ bɨrɨ jwɨ rəŋgəʼ ənjìm a Ə̀nùŋɨ̀sɨg Yeso Kristo, 10nɨ nyaʼa kwɨ ɨgwɨ mba ɨtu ɨmbə̀ʼ kɨ̀ tɨ wɨ ɨkǎ kɨ̀ tɨ fə kwɨ, tɨ̀ we tɨ rɨ chubɨ mbɨ məd. 11Əne mbə̀ timbɨ mbə bɔŋgɔb, ghɨ̀ ni ɨbenɨ wə̀d mɔʼ mɔʼ təm kàànɨ. Mbə̀ ghɨ əne àmei ɨchî nɨ mbə̀ə ghɨ̀ rɨ̀nîn.
Tɨkə te nɨ sɨ nwìə̀
12Mba bɔŋgɔb, tɨ̀ wɨə buʼ ɨbɔ ɨ nən ni mbə naʼ ɨwumnɨ əmbɨ ə bə̂d mbe nɨə fàʼ rɨ̀kǎ ɨ nən, chà əwən bə̀ kəərɨ əwən. 13Mbə̀ wumnɨ mɨ̀mə̌d bə̀ chwiə ni mbə ghaʼ mɨ̀mə̌d ɨmbə̀ʼ ɨnû jìm mbe nɨ mbɨə ghɨ̀ ɨ nən. Mbə̀ chub ənɨ əbɔrəbɔd mbɨ mbə bɔŋgɔb.
14Mba bɔŋgɔb, tɨ̀ wɨə buʼ ɨ bɔ ɨ nən ni mbə̀ patɨ mɨgwed, nɔɔrɨ ɨka mbe nɨə bɔ ɨnû, weerɨ mbe nɨə kəb ə̀wèèrɨ̀, bə nyiʼə ghàm əmbɨ ə wə̀d jìm. 15Mbə̀ zə ni tɨ wə̀d mɔʼɔ rəbɔʼ nən wi i ɨbə ɨgwɨ ɨbə, àyɨə mbə kywɨ ənywɨ ghɨ̀ ɨ̀chɔ̀m ənɨ wə̀d mɔʼ mɔʼ bə̀ ghɨ̀ ənɨ ə wə̀d jìm.
16Mbə̀ chub ənɨ ɨghaʼi ənɨ mɨ̀nyùmə̀ jìm, 17kɔŋgɨ ə Ŋwiə̀ ənɨ mɨ̀nyùmə̀ jìm, 18bə̀ nàʼ məben-əwe əmbɨ ə Ŋwiə̀ ɨmbə̀ʼ ɨnû jìm. Mbɔ̂ yɨ ɨnû mbe nɨ Ŋwiə̀ kəbɨ rɨ nən ɨchî nɨ mbə̀ yeʼ ənɨ fɔtɨ mbɨ Kristo Yeso.
19Tɨ̀ mbə̀ kən ə ə̀fàʼì ze nɨ Əzwî ə Zeŋɨ ə fàʼ ɨŋga nən. 20Tɨ mbə̀ təənɨ ə mɨkə̂n mbe nɨ bə̂d ə ghàə̀, 21àyɨə mbə̀ zweʼrɨ mɨkə̂n mbe jìm, yim mbe nɨ bɔŋɨ, 22ton tɨkwɨrɨ ɨnû jìm mbe nɨ rɨka bɔŋ i.
23Ŋwìə̀ ziə we nɨə nàʼ əbɔrəbɔd ghɨ ni mbə̀ zeŋ màànɨ̀. Ŋwìə̀ ghɨ ni Əzwî mbɨ tə fîŋ fɔrɨ tə nyamnyod ghɨ ɨnû nɨ kuʼnɨ ɨmbə̀ʼ tɨ wə̀d mɔʼɔ zə i ənû rɨbɔ̀ŋ ɨgwɨ nən ənɨ ə nyùmə̀ we nɨ a Ə̀nùŋɨ̀sɨg Yeso Kristo bɨrɨ wɨrɨ yeʼe. 24Məd we nɨ tɔŋ əwən wɨə ghɨ̀ ɨnû mbe nɨ wɨ̀ kaʼi. Wɨ̀ bɨrɨ ghɨ̀ ɨnû mbɔ̂.
25Mba bɔŋgɔb, mbə̀ kɔŋgɨ ə Ŋwiə̀ ɨgwɨ na.
26Mbə̀ chaʼrɨ bə̂d Kristo mɨjìm kwàʼ ɨchî chɔ̀m. Mbə̀ chaʼrɨ əne chwi ɨghaʼi we nɨ yeʼ əkaʼ bə̂d Kristo.
27Mə wɨə ghà ɨ nən ɨfě Ə̀nùŋɨ̀sɨg ni wə̀d mɔʼɔ foŋ ə̀ŋwàʼnɨ̀ zɔ̂ əmbɨ ə bə̂d Kristo mɨ̀jìm.
28A Ə̀nùŋɨ̀sɨg Yeso Kristo ghɨ ɨ̀chɔ̀m ənɨ ə nən.
Currently Selected:
Tès 5: mgo
Highlight
Copy
Compare
Share
Want to have your highlights saved across all your devices? Sign up or sign in
© 2013, Cameroon Association for Bible Translation and Literacy
