Tès 4
4
Ɨ chub ɨchî nɨ fîŋ Ŋwìə̀ bɨrɨ bɔ̀ŋ
1Mba bɔŋgɔb, ɨ wo ɨmbì, tɨ̀ nyaʼa fə chwi ɨchî nɨ tɨ̀ mbə̀ chubɨ ɨmbə̀ʼ ghɨ ni fîŋ Ŋwìə̀ bɔŋ ə. À yɨ rəsìʼ ni mbə mbɨə chub əne. Tɨ̀nîn tɨ̀ wɨə buʼ ɨbɔ bə̀ ghà ɨ nən ənɨ ɨkum Ə̀nùŋɨ̀sɨg Yeso ni mbə̀ wo ɨmbì ghɨ əne chè ɨchî nɨ mbə̀ nyaʼə bèə̀ ghɨ̀ə̀. 2Mbə fə kyerɨ ə tɨkə te nɨ Ə̀nùŋɨ̀sɨg Yeso nyaʼa naʼ ɨka ɨ na ni tɨ̀ chwi ɨ nən. 3Ənû ze nɨ Ŋwìə̀ kəbɨ yɨ ni mbə̀ chub ɨzeŋɨ zeŋɨ ɨmbə̀ʼ tɨ mbə̀ ni ə məyi kɨ̀ mbaŋə̀ əbəŋ əbəŋ. 4Wə̀d mɔʼ mɔʼ rəbɔʼ nən kyerɨ ɨchî nɨ yimbɨ i ɨnyod #4.4Ə zɨ ɨŋga ɨ̀ŋwàʼnɨ̀ mɔʼɔ ni “wɨ̀ berɨ kyerɨ ɨchî nɨ chubɨ mbɨ i ɨwi”. ənɨ ɨnə̂njɨ̀ nɨ zeŋɨ bə̀ fɔrɨ ənɨ ɨnə̂njɨ̀ nɨ kuʼnɨ. 5Tɨ̀ wə̀d mɔʼɔ rəbɔʼ nən feenɨ i ənû nɨ ni əyi kɨ̀ mbaŋə̀ əku ɨchî nɨ bə̂d mbe nɨ chəi mbɨ kyerɨ ə Ŋwiə̀ ə ghɨ̀ə̀. 6Tɨ̀ wə̀d mɔʼɔ rəbɔʼ nən chəkɨ i fîŋ wi aŋgɔb ənɨ ənû zɔ̂. Tɨ wɨ̀ nɨŋ i ɨwi wi aŋgɔb. Ə̀nùŋɨ̀sɨg bɨrɨ chə bə̂d mbe nɨə ghɨ̀ tɨkwɨrɨ ɨnû rɨbɔ̀ŋ tɔ̂ rɨjìm, àmei ɨchî nɨ tɨ̀ nyaʼa fə gha ɨ nən bə̀ patɨ əwən. 7Chəi Ŋwìə̀ nyaʼa tɔŋ əwa ni tɨ̀ yeʼ mbi bə̂d ɨmbə̀ʼ ghɨ ɨnyɔɔnɨ-ɨnû. Wɨ̀ nyaʼa tɔŋ əwa yeʼ ni tɨ̀ chub ɨzeŋɨ zeŋɨ. 8Chəi wə̀d mɔʼɔ we nɨ ton tɨkə tɔ̂ ton wə̀d mɨ̀sɔŋɨchù, wɨ̀ ton yeʼ Ŋwiə̀ we nɨə nàʼ e Əzwî ə Zeŋɨ ɨ nən.
9Tɨ̀nîn chəi tɨ̀ berɨ əton nɨ wɨrɨ ŋwaʼnɨ ɨ nən ɨmbə̀ʼ ɨchî nɨ mbə̀ berɨ ghaʼ mbə bɔŋgɔb. Ŋwìə̀ ziə fə chwi ɨ nən ni mbə̀ ghaʼ bɔŋgɔb. 10À yɨ rəsìʼ ni mbə kàŋ ghaʼ mbə bɔŋgɔb mɨ̀jìm mbe nɨ yeʼ ɨŋga ɨsɨ jìm mbe rɨ ə Màsèdonià. Àyɨə tɨ̀ wɨə buʼ ɨbɔ ɨ nən, kyɨə bɔŋgɔb, ni mbə̀ wo ɨmbì ghɨ əne tɨ̀nîn chè ɨchî nɨ mbə̀ nyaʼə bèə̀ ghɨ̀ə̀. 11Mbə̀ kywɨ ənywɨ ghɨ ɨnû jìm ɨmbə̀ʼ chub ənɨ əbɔrəbɔd. Tɨ mbə̀ zɨ ə mbə mɨchû ɨŋga ɨnû bə̂d cherə. Wə̀d jìm zɨ e ətu àmei ənɨ e ə̀fàʼì bə̀ fàʼ ənɨ mbi ɨbɔ ɨchî nɨ tɨ̀ nyaʼa gha ɨ nən. 12Mbə ghɨ əne ɨmbə̀ʼ bə̂d mbe nɨ kaʼi bə̂d Kristo wumnɨ əwən fɔrɨ ɨmbə̀ʼ tɨ mbə̀ kəb ə ni bə̂d cherə naʼ ɨghɨ mbe nɨ mbə̀ kəbɨ.
Ɨnû ɨmbə̀ʼ ɨchî nɨ Ə̀nùŋɨ̀sɨg bɨrɨ wɨrɨ yeʼe
13Mba bɔŋgɔb, tɨ̀ kə̀b ni mbə̀ kyerɨ rəsìʼ ɨmbə̀ʼ bə̂d mbe nɨ fə kwɨ, ɨmbə̀ʼ tɨ mbə kən ə ɨghabɨ ə bə̂d nɨ chəi mbɨ nuŋ ɨkɔndɨ ni mbə bɨrɨ chubɨ mbɨ ə Ŋwiə̀. 14Tɨ̀ ben ni Yeso nyaʼa kwɨ wɨrɨ zwemə. Tɨ̀ bə̀ ben ni Ŋwìə̀ bɨrɨ wɨrɨ nɨŋ bə̂d mbe nɨ nyaʼa ben Yeso bɔŋ kwɨ ni mbɨ chub mbɨ Yeso. 15Ənû zɔ̂ nɨ tɨə ghà ɨ nən yɨ ənû nɨ Ə̀nùŋɨ̀sɨg ziə nyaʼa ghǎ. Wɨ̀ nyaʼa ghà ni ka mbà mbe nɨ yeʼ ɨkǎ ənɨ ə nyùmə̀ we nɨ Ə̀nùŋɨ̀sɨg wɨrɨ yeʼe bɨrɨ be wò a ɨmbì mbe nɨ fə kwɨ. 16Ənɨ ə nyùmə̀ we nɨ Ə̀nùŋɨ̀sɨg ziə bɨrɨ swiʼ rɨkaŋ, bə̂d bɨrɨ zu ɨŋgam ka ka, zu gɨ̂ aŋgɨrə̀ kyeŋ bə̀ zu tàŋ Ŋwìə̀. Bə̂d mbe nɨ nyaʼa ben ə Kristo bɔŋ kwɨ bɨrɨ be zwemə. 17Mbe nɨə zwemə, Ŋwìə̀ sɨ nɨŋ mba mbe nɨ yeʼ ɨkǎ nɨ sɨ buʼ ɨgwɨ ɨsɨg ni tɨ̀ wo fɔtɨ mbɨ mɨ̀mə̌d ɨŋga pàʼ əne bòmnɨ̀ mbɨ Ə̀nùŋɨ̀sɨg ɨŋga ɨfə. Əne tɨ̀ bɨrɨ sɨə chubə mbɨ Ə̀nùŋɨ̀sɨg koŋ. 18Əne mbə nəərɨ wə̀d mɔʼ mɔʼ mbɨ ɨŋgam wɔ̂.
Currently Selected:
Tès 4: mgo
Highlight
Copy
Compare
Share
Want to have your highlights saved across all your devices? Sign up or sign in
© 2013, Cameroon Association for Bible Translation and Literacy
