1 Kɔ 7

Ənû ɨmbə̀ʼ ɨnamɨ

1Tɨ̀nîn, ɨ wo ənɨ ɨnû mbe nɨ mbə̀ nyaʼa ŋwaʼnɨ: Mə ghà ni zɨə bɔ̀ŋ ni tɨ mbaŋə̀ nam i. 2Àyɨə ɨchî nɨ ɨfabrɨ-ɨnû fə nɔʼɔ, zɨə kùʼ ni mbaŋə̀ mɔʼ mɔʼ berɨ i ɨwi, əyi mɔʼ mɔʼ bə̀ berɨ i ɨnom. 3Ɨnom ghɨ ənû ze nɨ ɨnom berɨ ghɨ̀ mbɨ i ɨwi. Əyi berɨ bɨ ghɨ̀ ənû ze nɨ əyi berɨ ghɨ̀ mbɨ i ɨnom. 4Chəi əyi berɨ ɨka ɨgun i ɨnyod. À yɨ ɨnom məd berɨ ɨka ɨgun ɨnyod məd. Chəi ɨnom bə̀ berɨ ɨka ɨgun i ɨnyod. À yɨ ɨwi məd berɨ ɨka ɨgun ɨnyod məd. 5Tɨ̀ wə̀d ton i nɨ naʼ i ɨnyod əmbɨ awɨ̂n, kɨrɨ ənɨ mbə̀ fə ben ni mbə bɨrɨ ghɨ əne ənɨ ɨkə nyumə̀, ɨmbə̀ʼ mbə̀ nɨŋ ə nyumə̀ kɔ̀ŋgɨ̀ ə Ŋwiə̀. Mbə mɨ fə màànɨ̀, mbə wɨrɨ fɔtɨ əsɨ ɨmbə̀ʼ tɨ Satàn numbɨ i əwən ənjìm ɨchî nɨ chəi mbə̀ə yɨmbɨ ɨnyod. 6Mə wɨə ghàə̀ ni mbə̀ ghɨ əne, kaʼi ni à yɨ mə̀ sobɨ sobɨ. 7Mə kə̀b ni wə̀d jìm yeʼ ɨghabɨ ə mɔ̌. Àyɨə wə̀d mɔʼ mɔʼ ə berɨ i ɨneʼe nɨ Ŋwìə̀ naʼi. Wə̀d mɔʼ ə berɨ i ɨkwɨ ɨneʼe, wɨ cherə bə̀ berɨ wi.

8Tɨ̀nîn, mə wɨə ghà əmbɨ ə bə̂d mbe nɨ chəi mbɨ namɨ bə̀ ghà əmbɨ mɨku əyi ni: zɨə bɔ̀ŋ ni mbɨ chub rɨ nam ɨchî nɨ mə̀ bə chubɨ. 9Àyɨə à mɨ yeʼ nɨ chəi ənɨ tɨ̀ mbɨ yimbɨ ə ɨnyod, mbɨ nam. Zɨə bɔ̀ŋ ni mbɨ nam chè ɨchî nɨ ɨnyod bɨrɨ nòm əbɔʼ məyi kɨ̀ əbɔʼ ə mbaŋə̀.

10Mə wɨə ghà əmbɨ ə bə̂d mbe nɨ fə namɨ ni: Tɨ əyi ghabrɨ i tɨ ənɨ i ɨnom. Kaʼi mɔ̌ ə ghàə̀, à yɨ Ə̀nùŋɨ̀sɨg ə ghàə̀. 11Àyɨə wɨ̀ mɨ ghàbrɨ̀ tɨ ənɨ i ɨnom, tɨ wɨ̀ wɨrɨ nam i. Wɨ̀ mɨ kə̀b nam, wɨ̀ berɨ maanɨ tàŋ wɨrɨ chubɨ mbɨ i ɨnom. Tɨ mbaŋə̀ saanɨ i ɨnamɨ mbɨ i ɨwi.

12Mə wɨə ghà əmbɨ ə̀bùʼ ə bə̂d ni: Mbaŋə̀ mɔʼɔ ze nɨ ben ə Kristo mɨ berɨ i ɨwi nɨ chəi wɨ̀ ben ə Kristo, əne əyi we bə̀ ben ni tə bɨrɨ chubɨ mbɨ məd, tɨ wɨ̀ saanɨ i ɨnamɨ mbɨ əyi we. À yɨə mɔ̌ ə ghàə̀, kaʼi Ə̀nùŋɨ̀sɨg. 13Əyi mɔʼɔ mɨ berɨ i ɨnom nɨ chəi wɨ̀ ben ə Kristo, əne mbaŋə̀ ze bə̀ ben ni tə bɨrɨ chubɨ mbɨ məd, tɨ wɨ̀ saanɨ i ɨnamɨ mbɨ ə mbaŋə̀ ze. 14Ŋwìə̀ wɨə ghɨ̀ ni mbaŋə̀ ze nɨ chəi zɨ̀ ben ə Kristo zeŋ ənjìm i ɨwi. Ɨ wɨə bə̀ ghɨ̀ə̀ ni əyi we nɨ chəi wɨ̀ ben ə Kristo bə̀ zeŋ ənjìm i ɨnom. Zɨə mɨ ton yeʼi əne, njɨ mbə bɔn bɨrɨ chubɨ rɨzeŋ. Àyɨə ɨchî nɨ zɨə yeʼ əne, mbə bɔn ə zeŋ. 15Wə̀d mɔʼɔ rəbɔʼ mbe nɨ chəi mbɨ ben ə Kristo mɨ kə̀b saŋ we nɨ ben ə Kristo, mbə̀ saŋ əməd wɨ̀ wo i. Ɨchî nɨ zɨə yeʼ əne, chəi mbɨ kod ɨnom kɨ əyi we nɨ ben ə Kristo ni wɨ̀ berɨ chubɨ mbɨ məd. Ŋwìə̀ fə tɔŋ əwən ni mbə̀ chub ənɨ əbɔrəbɔd. 16Əyi, à kyerɨ tɨ ənɨ ə ye ni kaʼi àwɔ̀ bɨrɨ chɨ e ɨnom rəŋgəʼ ə? Ɨnom, à kyerɨ tɨ ənɨ ə ye ni kaʼi àwɔ̀ bɨrɨ chɨ e ɨwi rəŋgəʼ ə?

Mbə̀ chub àmei ɨchî nɨ Ŋwìə̀ nyaʼa tɔŋ əwən

17Wə̀d mɔʼ mɔʼ chub àmei ɨchî nɨ Ə̀nùŋɨ̀sɨg ghɨ ni wɨ̀ chubɨ. Wɨ̀ bə̀ chub àmei ɨchî nɨ Ŋwìə̀ nyaʼa tɔŋ əməd. Wɔ̂ yɨ mɨ ɨkə we nɨ mɨə nàʼ əmbɨ ə bə̂d ɨŋga tɨfetɨ bə̂d Kristo rɨ̀jìm. 18Mbɨ wa nyaʼa fə nè wə̀d mɔʼɔ ənɨ ə nyùmə̀ we nɨ Ŋwìə̀ nyaʼa tɔŋ əməd ə? Tɨ wɨ̀ kəb i nɨ chɨ ɨnweenɨ mbe nɨ chwi ni mbɨ fə nè əməd. Chəi mbɨ wa nyaʼa kɨrɨ ne wə̀d mɔʼɔ ənɨ ə nyùmə̀ we nɨ Ŋwìə̀ nyaʼa tɔŋ əməd ə? Tɨ wɨ̀ kəb i ni mbɨ ne əməd. 19Mbɨ mɨ fə nè wə̀d kɨ̀ chəi mbɨ kɨrɨ ne əməd, ka əze yɨ i ənû ə mɔʼɔ. Ənû nɨ kuʼnɨ yɨ ni mbɨ nuŋ tɨkə rɨ Ŋwiə̀. 20Wə̀d mɔʼ mɔʼ chub àmei ɨchî nɨ Ŋwìə̀ nyaʼa tɔŋ əməd. 21Àwɔ̀ wa kɨə nyaʼə ə̀bòʼò ənɨ ə nyùmə̀ we nɨ Ŋwìə̀ nyaʼa tɔŋ əwe ə? Tɨ əze ə tɔb i əwe. Àyɨə à mɨ berɨ əpan nɨ jwɨ̀ rɨ ənɨ ə̀bòʼò, nɨŋ əpan ze jwɨ̀ e. 22Wə̀d we nɨ Ə̀nùŋɨ̀sɨg nyaʼa tɔŋ əməd ənɨ wɨ̀ nyaʼa ə̀bòʼò, fə sɨ ənɨ i ɨghəm ɨchî nɨ wɨ̀ yeʼ ənɨ ɨfɔtɨ mbɨ Ə̀nùŋɨ̀sɨg. À yɨə bə̀ əndəŋ əndəŋ ni wə̀d we nɨ nyaʼa ənɨ i ɨghəm ənɨ ə nyùmə̀ we nɨ Ə̀nùŋɨ̀sɨg nyaʼa tɔŋ əməd fə sɨ ə̀bòʼò ə Kristo. 23Ŋwìə̀ nyaʼa fə zon əwən ənɨ ɨkab nɔnɔʼ. Əne tɨ mbə̀ beŋ ənɨ ɨ̀bòʼò ə bə̂d mɨ̀sɔŋɨchù. 24Mbɨ bɔŋgɔb, wə̀d mɔʼ mɔʼ chub àmei ɨchî nɨ Ŋwìə̀ nyaʼa tɔŋ əməd.

Ənû ɨmbə̀ʼ məyi mbe nɨ chəi mbɨ namɨ mbɨ ənû ɨmbə̀ʼ mɨku əyi

25Tɨ̀nîn, ɨmbə̀ʼ məyi mbe nɨ chəi mbɨ kɨrɨ nam: chəi mə berɨ ɨkə rɨ əmbɨ Ə̀nùŋɨ̀sɨg nɨ gha ɨ nən. Àyɨə mə bɨrɨ naʼ mɨ ɨkɔndɨ ɨghabɨ wə̀d nɨ Ə̀nùŋɨ̀sɨg fə diirɨ əne ghɨ̀ mə yeʼ wə̀d nɨ tɨ̀ mbə ben ənû ze nɨ mɨə ghàə̀. 26Mə mɨ nèŋ ŋgəʼ ze nɨ yeʼ rɨ̀nîn, mə kɔndɨ ni zɨə bɔ̀ŋ ni wə̀d chub i ɨchî nɨ wɨ̀ yeʼ ə. 27À wa fə nam? Tɨrə̀ kə̀b e nɨ saanɨ ɨnamɨ. Chəi à kɨrɨ nam? Tɨrə̀ kə̀b e əyi. 28À mɨ nam, chəi à ghɨ ənû rɨbɔ̀ŋ. Wan əyi mɨ nam, chəi wɨ̀ ghɨ ənû rɨbɔ̀ŋ. Àyɨə bə̂d mbe nɨ namɨ bɨrɨ berɨ ŋgəʼ nɔnɔʼ ɨŋga ɨsɨg wɔ̂. Əne chəi mə kəb ni ŋgəʼ ze nyɨ ɨgwɨ nən.

29Mbɨ bɔŋgɔb, ənû nɨ mɨə ghàə̀ yɨ ni nyùmə̀ nɨ ɨsɨg wɔ̂ bɨrɨ nwìə̀ fə tiinɨ. Əne ɨ kɔ rɨ̀nîn, mbaŋə̀ te nɨ berɨ məyi chub ɨghabɨ ni chəi mbɨ kɨrɨ nam. 30Bə̂d mbe nɨə dìə̀ chub ɨghabɨ ni chəi mbɨə dìə̀, mbe nɨə ghaʼə chub ɨghabɨ ni chəi mbɨə ghaʼə, mbe nɨə zon ɨghɨ chub ɨghabɨ ni chəi mbɨ berɨ ɨghɨ, 31mbe nɨə fàʼə̀ mbɨ ɨghɨ rɨŋga ɨsɨg bə̀ chub ɨghabɨ ni chəi mbɨ berɨ ənû nɨ ghɨ̀ mbɨ mbɨwən, ɨmbə̀ʼ ɨghəm nɨ ɨsɨg wɔ̂ nɨ yeʼ rɨ̀nîn wɨə che i che.

32Chəi mə̀ kə̀b ni mbə̀ nwìʼ ɨnyod. Mbaŋə̀ ze nɨ chəi zɨ namɨ zɨə kɔn ɨmbə̀ʼ Ə̀nùŋɨ̀sɨg, ɨchî nɨ tɨ̀ wɨ̀ ghɨ̀ ni fîŋ Ə̀nùŋɨ̀sɨg bɔ̀ŋ ə. 33Àyɨə mbaŋə̀ ze nɨ namɨ zɨə kɔn ɨnû rɨŋga ɨsɨg, ɨchî nɨ tɨ̀ wɨ̀ ghɨ̀ fîŋ ɨwi məd bɔ̀ŋ. 34Əne tɨkɔndɨ məd ə ghàbrə̀. Əyi nɨ chəi wɨ̀ namɨ kɨ̀ əyi rɨ kyerɨ mbaŋə̀ wɨə kɔn ɨmbə̀ʼ Ə̀nùŋɨ̀sɨg, ɨchî nɨ chub ɨzeŋɨ zeŋɨ ənɨ ə nyamnyod bə̀ fɔrɨ ənɨ əzwî. Əyi nɨ namɨ wɨə kɔn ɨnû rɨŋga ɨsɨg, ɨchî nɨ tɨ̀ wɨ̀ ghɨ̀ fîŋ ɨnom məd bɔ̀ŋ. 35Mə wɨə ghà ənû zɔ̂ ɨmbə̀ʼ weerɨ əwən, kaʼi ni mə kə̀b ton ni tɨ mbə̀ ghɨ̀ə̀ mbə ɨnû. Mə wɨə kə̀bə̀ yeʼ ni mbə̀ chub ɨchî nɨ kuʼnɨ. Mə wɨə bə̀ kə̀bə̀ ni tɨ əghɨ ə mɔʼɔ ə ghabrɨ i tə rɨkɔndɨ ɨchî nɨ mbə̀ə fàʼ əmbɨ Ə̀nùŋɨ̀sɨg.

36Mbaŋə̀ mɔʼɔ mɨ kɔndɨ ni chəi tɨə ghɨ̀ ɨnû ɨchî nɨ kuʼnɨ əmbɨ wi əyi kwirɨ, wɨ̀ mɨ yeʼə nòm əku ɨchî nɨ zɨə berɨ nɨ yeʼ əne, wɨ̀ ghɨ̀ ənû ze nɨ wɨ̀ kəbɨ. Wɨ̀ nam. Kaʼi ənû rɨbɔ̀ŋ nɨ nam. 37Àyɨə mbaŋə̀ mɔʼɔ mɨ fə tekɨ ɨŋga i fîŋ, nɨ chəi mbɨ nyeŋ əməd, àyɨə ɨ we tɨ̀ wɨ̀ yimbɨ i ɨnyod ɨchî nɨ wɨə nòmə̀, əne fə nùŋ ɨŋga i fîŋ ni chəi tə bɨrɨ nam wi əyi kwirɨ, mbaŋə̀ ze fə ghɨ̀ ənû nɨ kuʼnɨ. 38Əne mbaŋə̀ ze nɨ nam wi əyi kwirɨ fə ghɨ̀ ənû nɨ kuʼnɨ. Ze nɨ ton i nɨ nam, fə ghɨ̀ ənû nɨ bɔŋ chè.

39Əyi berɨ chubɨ mbɨ i ɨnom ənɨ ə nyùmə̀ we nɨ ɨnom məd kɨrɨ i ɨkǎ. Àyɨə ɨnom məd mɨ fə kwɨ, ɨ wɨ tɨ̀ wɨ̀ nam mbaŋə̀ mɔʼɔ ze nɨ wɨ̀ ghaʼi, àyɨə mbaŋə̀ ze berɨ yeʼ wə̀d Kristo. 40Ənɨ mɨ ɨkɔndɨ, mə kyerɨ ni wɨ̀ bɨrɨ ghaʼ chè əbɔ əwù ze nɨ chəi wɨ̀ wɨrɨ nam. Mə kɔndɨ ni Əzwî ə Ŋwiə̀ ə zɨ ɨŋga num, əne à yɨ əzɨ əwən ə ghɨ ni mə̀ gha əne.

Currently Selected:

1 Kɔ 7: mgo

Highlight

Copy

Compare