1 Kɔ 16
16
Ənû nɨ chob ɨkab ɨmbə̀ʼ weerɨ bə̂d Ŋwiə̀ ə Jèrusalèm
1Tɨ̀nîn, mə kəb gha ɨmbə̀ʼ ənû nɨ chob ɨkab ɨmbə̀ʼ weerɨ bə̂d Ŋwiə̀. Mbə̀ ghɨ̀ ənû ze nɨ mə̀ nyaʼa ghǎ əmbɨ rɨfetɨ bə̂d Kristo te nɨ yeʼ ə Gàlesià. 2Ənû ze yɨ ni: ɨni Sɔndè jìm, wə̀d mɔʼ mɔʼ rəbɔʼ nən chɨ ɨnun ɨkab mɔʼɔ rəbɔʼ we nɨ wɨ̀ fàʼi, nùŋ, ɨmbə̀ʼ ənɨ mə̀ yeʼe, tɨ mbə̀ wɨrɨ chob ə ɨkab we. 3Ənɨ mə̀ yeʼe, mə bɨrɨ ŋwaʼnɨ ɨmbə̀ʼ bə̂d mbe nɨ mbə̀ chɔʼɔ, əne tom mɨ̀mə̌d nɨ mbɨ wo nàʼ ɨkab we nɨ mbə̀ chob ə Jèrusalèm. 4Zɨə mɨ chwi ni mə̀ bə wò, mbɨ bɨrɨ yen mbɨ num.
Pɔ̂l nyaʼa taŋ ni tə bɨrɨ wò ə Kɔrèn
5Mə bɨrɨ yeʼe əsɨ nən ənɨ mə̀ fə che ə Màsèdonià, ɨmbə̀ʼ ɨghəm nɨ mə fə tekɨ ni mə bɨrɨ chè ə Màsèdonià. 6Ɨghə̀m mə bɨrɨ chubɨ mbɨ nən ənɨ ɨkə nyùmə̀, kɨ̀ mə bè chub əwɔ ənɨ ə nyùmə̀ we nɨ ɨfə ə kɔ əku, ɨmbə̀ʼ mbə̀ weerɨ chà əmɨ əsɨ ze nɨ mɨə wòə̀. 7Mɨ rɨka kə̀b əmɨ nɨ zə əwən tɨ̀nîn ənɨ mɨə chèə̀. Mə̀ kàŋ kə̀b chubɨ mbɨ nən ənɨ əgha nɨ tɔ saarɨ, əne yɨ əwù ze nɨ Ə̀nùŋɨ̀sɨg benɨ. 8Àyɨə rɨ̀nîn, mə bɨrɨ kɨrɨ chub ə Efesùs pè əni ə Pentekɔ̀s, 9ɨmbə̀ʼ ɨghəm nɨ əpan ə chɔ̀m ə fə jwɨ̀ ɨ num ni mə̀ faʼ ə̀fàʼì ə kyeŋ, àyɨə chəi bə̂d mɨ̀nɔnɔʼ kəbɨ ni mə faʼ ə̀fàʼì ze.
10Timotì mɨ yeʼe, mbə̀ zə ni wɨ̀ chub ɨchî chɔ̀m əkaʼ nən. Məd wɨə fàʼ əmbɨ Ə̀nùŋɨ̀sɨg ɨchî nɨ mɔ̌ ə bə̀ fàʼə̀. 11Tɨ wə̀d mɔʼɔ təənɨ i əməd. Mbə̀ weerɨ əməd ni wɨ̀ yèn ənɨ əbɔrəbɔd ənɨ wɨə wɨrɨə bə̀ndɨ̀ə̀ yeʼe əsɨ num. Mə wɨə wòm əməd ni wɨ yeʼe mbɨ ə bɔŋgɔb cherə mbe nɨ ben ə Kristo.
12À yeʼ ɨmbə̀ʼ wa aŋgɔb Àpolòs, mə̀ wɨə nyaʼə kàŋə̀ ghà ɨ bɔ ni məd mbɨ ə bɔŋgɔb cherə yeʼe əsɨ nən. Chəi wɨ̀ kə̀b nɨ yeʼe tɨ̀nîn, àyɨə wɨ̀ bɨrɨ yeʼe ənɨ ə nyùmə̀ we nɨ wɨ̀ berɨ əpan.
13Mbə̀ we əwən. Mbə̀ nùŋ fîŋ nɨ kaanɨ ɨgun ə Kristo. Tɨ mbə̀ bɔ ə. Mbə̀ təm kàànɨ̀. 14Mbə̀ ghɨ ɨnû jìm ənɨ ɨghaʼi.
15Mbɨ bɔŋgɔb, mbə̀ nyaʼa fə kyerɨ ə ni ɨnəbɨ Stefanàs yɨə nyaʼə ɨnəbɨ rɨtu nɨ nyaʼa ben ə Kristo ə Àkàiyà. Mɨ̀mə̌d nyaʼa fə sweŋ ə ɨnyod nɨ faʼ əmbɨ ə bə̂d Ŋwiə̀. Əne mə wɨə buʼ ɨ bɔ ɨ nən ni, 16mbə̀ zuunɨ bə̂d ɨghabɨ mbɔ̂, bə̀ zuunɨ wə̀d jìm we nɨə fàʼə̀ bə̀ nwìʼ ɨnyod mbɨ na ənɨ ə̀fàʼì zɔ̂. 17Mə nyaʼa kàŋ ghaʼ əku ənɨ Stefanàs mbɨ Fɔtunatùs fɔrɨ ə Àkàikùs nyaʼa yeʼe, ɨmbə̀ʼ ɨghəm nɨ mbɨ nyaʼa faʼ ə̀fàʼì ze nɨ, à kɨ nɨ mbə̀ nyaʼa əgha mbɨ num, njɨ mbə nyaʼa fàʼ. 18Mbɨ nyaʼa ghɨ̀ mɨ fîŋ zùtɨ̀ ɨchî nɨ mbɨ nyaʼa bə̀ ghɨ tən zùtɨ̀. Zɨə bɔ̀ŋ ni bə̂d kyerɨ ni mɨ̀mə̌d mbɨə fàʼ ə̀fàʼ ə chɔ̀m.
19Tɨfetɨ bə̂d Kristo te rɨ əbà əbeŋ ze rɨ ə Esià chàʼrɨ̀ əwən. Àkwilà mbɨ Priskà #16.19Ɨ mbɨə tɔŋ əməd ɨŋga ɨ̀ŋwàʼnɨ̀ mɔʼɔ ni Prìsilà. mbɨ ɨfetɨ bə̂d Kristo we nɨə nyɨ ɨŋga nəb mɨ̀mə̌d bə̀ chàʼrɨ̀ əwən kwàʼ ɨchî chɔ̀m ənɨ ɨkum Ə̀nùŋɨ̀sɨg. 20Bə̂d mɨjìm mbe nɨ ben ə Kristo chàʼrɨ̀ əwən. Mbə̀ chaʼrɨ wə̀d mɔʼ mɔʼ kwàʼ ɨchî chɔ̀m. Mbə̀ chaʼrɨ əne chwi ɨghaʼi we nɨ yeʼ əkaʼ bə̂d Kristo.
21À yɨə mɔ̌ Pɔ̂l kaŋ ŋwaʼnɨ ə̀chàʼrɨ̀ zɔ̂ ənɨ mɨ əbɔ. 22À mɨ yeʼ nɨ chəi wə̀d mɔʼɔ ghaʼ Ə̀nùŋɨ̀sɨg, ndɔ̀n yɨ zɨ məd.
A Ə̀nùŋɨ̀sɨg, yeʼe!
23Ə̀nùŋɨ̀sɨg Yeso ghɨ ɨ̀chɔ̀m ənɨ ə nən.
24Mə ghaʼ mbə̀n mɨ̀jìm ɨchî nɨ tɨ̀ yeʼ ənɨ ɨfɔtɨ mbɨ Kristo Yeso. À yɨ əne.
Currently Selected:
1 Kɔ 16: mgo
Highlight
Copy
Compare
Share
Want to have your highlights saved across all your devices? Sign up or sign in
© 2013, Cameroon Association for Bible Translation and Literacy
