Jɔɔn 1
1
1A nyini piilimka jam ka Wanni. Wanni abe jam bo ale ka Wen. Wanni abe jam ka Wen. 2Wanni a jam bo ale ka Wen a nyini piilimka. 3Wen a va ka wa zuk a nye tɛŋzuk jaab meena ale ŋan baai meena ale bo wenŋmazuk ale tɛŋzuk la. Jaabuui meena Wen a va ka wa nyiŋ a nye. 4Nyuvuri dii ale kan ta kpeglimka la, a bo ka Wanni jigi. Nyuvunni de ale ta bolim a jam tɛŋzuk ayen nuru meena a nya. 5Wa nyuvunni a nye se ka bolim ate ba toati ate bu a nya legi po diila. Legini an baga a kpimsi bolimu.
6Nuru wanyi ale jam boro. Wa yuei jam le Jɔɔn ate Wen a tom wa. 7Wa jam kama ayen wa sak nuruba bolimu wie, ate ba nya suik a wom abe ba ta siaka. 8Daa Jɔɔn a jam le bolimu, alege ka Wen ale tom wa ayen wa jam a sak nuruba bolimu wie.
9Wala a jam le bolim maŋka dek buui ale jam tɛŋka meena po, ayen waai meena a baga a nya suik a bo bu jigini. 10Nyuvuri Wanni a jam bo ka tɛŋzuk de. Wen a va ka wa nyiŋ a nye tɛŋzuk de, alege tɛŋka meena demma a jam zɛ wa. 11Wa jam ka wadek tɛŋka demma jigi alege ba zɛri wa. 12Alege baai ale a tuesi wa ale ta siaka ale wa la, wa te ba ka suik ate ba chim Wen bisa. 13Baai ate ba an biak ba ale ziim yaase nyiŋ lam yaalika yaase nurubiik yaalika, alege ka Wen yaalika la.
14Nyuvuri Wanni a jam chim ka nurubiik a bo ti po, ale ŋmantiik ale wensie. Wa nyiini ale wa Kowa Biik. Ate ti nya wa zulaŋa ale wa nalimu ate wa tuesi wa Kowa jigi la. 15Jɔɔn a jam sak nuruba wa wie ale a kaari a weeni ayen, <<Mi a weeni ni nuruwa de wie kama. Wa bo ka mi ŋaaŋ a saŋ cheena. Wa liŋ boro kama ale ge ate ba biak mi. Ka dila ale soa ate wa chim kpagi a gaam mi la.>> 16Wa ŋmantiika ale zuak la nyiŋ ate wa baga a ŋman te ti meena. Wa abe le kasim a niak ti kama diipo meena. 17Wen ale basi ate Moosis a pai wa Sinsaŋŋa a te nuruba alege ka Yeezu Kirisita nyiŋ ate Wen a sak ti wa ŋmantiika ale wa wensieŋa. 18Nuru waai an diem nya Wen ya, alege wa bi yeŋka nyini waai ale bo wa jigi la, wala a sak ti wa wie kama.
19Dai yeŋ po Juuma kpaŋŋa ale jam bo Jerusalem tɛŋka la a yaa tom ba kaabteerɔma ale Livaiba gela ayen ba cheŋ a ga bek Jɔɔn ayen, <<Fi ka wana?>> 20Jɔɔn an jam zɛri ba tulisika alege weeni ba a lagri ayen, <<Daa mi ale Kirisitawa.>> 21Ba yaa ŋman bek wa ayen, <<Fi be ka wana? Fi ka Elaja?>> Jɔɔn yaa weeni ayen, <<Mi daa wala.>> Ba yaa ŋman bek wa ayen, <<Ka fi ale Biisiteerɔwa?>> Ate wa tulisi ayen, <<Aaya.>> 22Ba yaa weeni wa ayen, <<Be weeni ti fi ale ka waai la, ate ti ŋman cheŋ baai ale tom ti la jigi, ba a yaali kama ayen ti weeni ba wari. Fi abe ka wana?>> 23Jɔɔn yaa weeni ba ayen, Wen biisiteerɔwa Azaya a jam weeni ayen, <<Mi ka lueluk kuui ale a kaari sagni po a weeni ayen, <Teenti Naawen suiku ate wa jam.> >> (Azaya 40:3)
24Ba yaa tom Farisiiba Jɔɔn jigi, 25ate ba bek wa ayen, <<Fi dan kan daa Kirisitawa yaase Elaja yaase Biisiteerɔ, be ka boa ate fi a te soka?>> 26Jɔɔn yaa weeni ba ayen, <<Mi a te ka nuruba soka ale nyiam alege waai ate ni zɛ la a za ni suŋsuŋ. 27Wala a bo ka mi ŋaaŋ a cheena. Mi pɔsima ale m nin chim waai ale wa domsi kali wa niŋ a yeeri wa nuensaŋa a te wa.>> 28Wieŋa de meena a nye ka Betani tɛŋka po, Jɔɔn a jam a te nuruma soka ka Jodan benni kunkɔŋi dindila.
29Vari le veenti la Jɔɔn yaa nya ale Yeezu a duŋ wa nyiŋ, ate wa weeni ayen, <<Ni nya Wen Pabiika a cheena waai ale vɔŋ tɛŋka demma meena biemu a te ba.#1:29 Piilimka 22:8 30Mi a liŋ weeni ni ayen, <Nuru ale bo mi ŋaaŋ a cheena. Wa poom liŋ a boro kama ale ge ate ba biak mi. Ka dila ale soa ate wa chim kpagi a gaam mi la.> 31Mi poom a liŋ zɛ wa le ka waai la, alege mi liŋ dɛ ka wa niŋ a jam dela ayen m te nuruma soka ale nyiam ate m baga a pai wa a sak Izirali demma.>> 32Jɔɔn ŋman weeni ba ayen, <<Mi nya Wen Chiika ale ka nyini wenŋmazuk ase nangbaŋ la a siŋ a jam kali Yeezu zuk. 33Mi jam zɛ wa le ka waai la, alege Wen dii ale tom mi ayen m jam a te nuruba soka la a liŋ weeni mi kama ayen, waai ate nama a nya ale Wen Chiika a jam a wari wa zuk la, wala ale wa te ni soka ale Wen Chiika. 34Mi nya wieŋa de meena kama. Wensie ate mi a weeni ni ayen wa sum ka Wen Nidoabinni.>>
35Vari ale veenti la, Jɔɔn ale wa ŋaaŋviirɔma baye a yaa ŋman jam bo dula jigini, 36ate Jɔɔn a nya Yeezu ale wa cheŋ a taam. Jɔɔn yaa weeni ba ayen, <<Ni nya Wen Pabiika.>> 37Wa ŋaaŋviirɔma bayewa ale wom dii ate wa weeni la, ba yaa deri basi wa ale cheŋ ga va Yeezu. 38Ba le jam a vi Yeezu ŋaaŋ la, wa yaa cheem nya ba ale ba va wa ŋaaŋ la ate wa yaa bek ba ayen, <<Ka wana ate nama a gisi?>> Ba yaa weeni wa ayen, <<Arabi, fi yenni bo ka bɛ?>> (Arabi kiri ale Sagrɔ.) 39Wa yaa weeni ba ayen, <<Ni va mu a jam nya.>> Ba yaa va wa a ga nya wa le bo juijui la. Ba jam ga paari wa boka jigini ka wenbalinni baŋ bunaansi a bo dula ale wa. 40Nuruma bayewa wanyi a jam ka Andiru, Simon Piita suok. Wa jam va ka Yeezu. 41Dii ate Andiru de niŋ nye la, wa nya ka wa suoku Simon Piita a weeni wa ayen, <<Tama a nya Waai Ate Wen A Lueri La ate ba a wi wa ayen Kirisitawa la.>> 42Wa yaa ta Simon a cheŋ Yeezu jigi. Yeezu yaa nya wa a weeni ayen, <<Fi le Simon, Jɔɔn nidoabinni. Ba ale wi fi yuei ayen ka Sifas.>> Di kiri ale Piita.#1:42 Piita kiri ale piuŋ.
43Vari ale ŋman veenti la Yeezu yaa cheŋ Galili. Wa yaa nya Filip, a yaa weeni wa ayen, <<Jam va mu.>> 44Filip a jam nyini ka Beteseida. Andiru ale Piita mɛ a jam nyini ka dula. 45Filip yaa nya Natani a weeni wa ayen, <<Tama a nya waai ate Moosis a ŋmarisi wa wie Sinsaŋŋa po la, ale waai ate Biisiteerɔma a ŋmarisi wa wie la, wala ale Yeezu Nazaret denɔwa, Josefi nidoabinni.>> 46Natani yaa bek Filip ayen, <<Ti baga a nya wamaŋ Nazaret tɛŋka po?>> Filip yaa ŋman weeni wa ayen, <<Jam a nya.>> 47Ba le jam ga moata Yeezu la, wa yaa weeni baai ale jam bo ale wa la, ayen, <<Ni nya Izirali denɔwa de waai ale cheena mi jigi la, wa ka wensie nyɔnɔ.>> 48Natani yaa bek wa ayen, <<Fi nye ka sɛ a seba mi?>> Yeezu yaa weeni wa ayen, <<Fi ale poom kala kiŋkaŋka tɛŋ la, mi nya fu kama ale ge ate Filip a wi fu.>> 49Natani ale wom dii ate Yeezu a weeni la, wa yaa weeni wa ayen, <<M Sagrɔ, fi sum ka Wen Nidoabinni. Fi ale Izirali Naawa.>> 50Yeezu yaa weeni wa ayen, <<Fi ta siaka ale mi kama mi ale weeni ayen m nya ale fi kali kiŋkaŋka tɛŋ la? Fi ale nya wakperikaliisa a gaam nya kude.>> 51Dula jigini Yeezu yaa weeni wa ayen, <<Wensie ate mi a weeni ni ayen ni le nya wenzuk ale ku lagri ate Wen maarɔma a nyini wenŋmazuk nna ase ba a siŋ Saalɔbiika zuk la ale ŋman pilim a jueli.>>
Currently Selected:
Jɔɔn 1: BWU
Highlight
Share
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation