Zefania 2

1Ni tigsi jigi yeŋ ni tigsi jigi yeŋ chivie tɛŋa, 2ni nye dila abe ni ge ate wa le dak diipo la a jam, dai dii dai ate nama ale chuiri a taam ase vɔtta la a paari, alege ate Naawen suipuurumu a jam ni zuk. 3Ni gisi Naawen nama baai meena ale yik nidek tɛŋka po la, nama baai ale a nye dii ate wa weeni la. Ni a gisi wayɔrisima, ni gisi yik m dek, dai dii dai ni le lik nidek Naawen suipuurumu danni.

4Ba le banti Gaza tɛŋka a basi ate Askelon a kaasi. Kantueŋ suŋsuŋ Asdod ale duak koruk ate Ekron ale basi ka le bo juijui la. 5Ku le bie a te nama baai ale bo nyakpiemu nɔi la Keret nuruba, Naawen wanni a ta ka chaab ale ni Keenan Filistia demma tɛŋka. <<Mi ale kaasi ni ate waai a kan tali.>>

6Tɛŋka ale bo nyakpiemu nɔi la juijui ate Keret demma a boro la ale chim ka naapeerisa jigi ale piisa zɔŋta. 7Ka Juda dem baai ale tali la ale kala ba soa ŋa. Dula jigini ba le nya wuyɔgsuk. Junɔi ba le duak Askelon yieŋa po. Naawen ba Wenni ale nya ba zuk, wa le ŋman te ba ba zumasuku.

8<<Mi wom Moab leetaŋa ale Ammon demma nye laka kama baai ale lɛ mi nuruma ale a nyigsi ba tɛŋka la. 9Naawen Dii Ale A Dɛ Tugurik Tɔŋdɔma Niŋ La Izirali Wenni ayen, <<Chekki ase mi ale boro la Moab tɛŋka ale nye ase ka Sodom la ate Ammon tɛŋka a nye ase Gomora la juijui ale ka wuuta ale yesa gola a kaasi taam wuu. Mi nuru baai ale tali vua la ale koalim ba, baai ale tali vua mi tɛŋka po la ale tuesi ba tɛŋka.>>

10Ka nnala ale ku jam ba jigi ba kanjantaŋa nyiŋ, ba ale lɛ ale nye Naawen Dii Ale A Dɛ Tugurik Tɔŋdɔma Niŋ La nuruma a la la nyiŋ. 11Naawen ale chim nyinyigsa a te ba ase wa nin kaasi tɛŋka wenaŋa meena. Tɛŋsa meena ale bo kunkɔŋni la ale puusi wa, waai meena wadek tɛŋ po.

12<<Nama Kus demma mɛ mi gebika ale basi ate ni nye diki.>>

13Wa le teeri wa nisaŋa a ta chaab ale wiilukku geŋsa demma a kaasi Assiria tɛŋka, a basi ate Niineve a kaasi chessi abe ka nye ase gɔi kosik la. 14Duŋ boari ale duak dula, ŋan nyeenta nna tɔgatɔga. Sagi po viuk ale viuk mɔnuŋ ale kali si zaŋŋa zuk, si kumsaŋa ale nuem va takpataŋa a nyini, tuataŋa nɔi tintana ale boro, ate nyunyoŋ chibsaŋa a nya peelim. 15Tɛŋ kaai ale jam boro fasiyaa la ale nna, kaai ale boro ate wari a kan daanika la. Ka jam weeni ka dek kama ayen, <<Ka mi, waai karo a gum mi po.>> Nya ka le kaasi dii ya, ate gɔi duŋsa a duak ka po. Baai meena ale va ka tɛŋ a taam la a nye ka a la kama ale a kpaanti ba naŋtaata.

Currently Selected:

Zefania 2: BWU

Highlight

Copy

Compare