Zakaria 2

1Mi yaa zak nya wenŋmazuk ale nuru ale ta jamagsim wa nisa po a za mi niŋ! 2Mi yaa bek wa ayen, <<Fi a cheŋ ka be?>> Wa yaa tulisi mi ayen, <<Mi a cheŋ m magsi ka Jerusalem, a nya ka labsimu ale ka woglimmu ale ka diila.>>

3Ate Wen maarɔ waai ale a biisi ale mi la yaa cheŋ, ate maarɔ wa choa a tu wa, 4a weeni wa ayen, <<Chali cheŋ, ga weeni nidoabili paalika ayen, <Jerusalem tɛŋka a kan ta parisa a gilim ka, dii nyiŋla nuruba ale duŋsaŋa ale piisi dii a bo ka po la nyiŋ. 5Ate mi dek ale chim ka bolim parik a gilim ka,> Naawen ale weeni dila, <Ate mi ale chim ka zula a bo ka po.>

6<<Ni jam! Ni jam! Ni chali nyini wiiluk geŋka tɛŋka po.>> Naawen ale a weeni ayen, <<Dii nyiŋla mi basi kama ate ni waaŋ jigi meena.>> Naawen ale a weeni.

7<<Jam Zayon! Ni chali be, nama baai ale bo Babilon tɛŋka po la.>> 8Diila Naawen Dii Ale A Dɛ Tugurik Tɔŋdɔma Niŋ La ale weeni ayen, <<Wa dan zuli mi a tom mi a ta chaab ale tɛŋ kpieŋ sii ale kɔlim fu la. Diila waai a dan tiri fu, wa tiri ka wa numbinni. 9Mi ale zak nisa ba zuk ate baai ale jam chim ba yɔm la ale ŋman cheem a namsi ba. Ate nama ale seba ayen Naawen Dii Ale A Dɛ Tugurik Tɔŋdɔma Niŋ La ale sum tom mi.

10<<Zayon Liewa, nuem abe fi te ate fi sui a peenti. Dii nyiŋla mi cheena kama ayen m bo ale fu.>> Naawen ale weeni. 11<<Tɛŋsa yegayega ale gum chaab ale Naawen dai dila danni, ate ba ale chim mi nuruba. Mi ale bo ale ni ate ni ale miŋ ayen Naawen Dii Ale A Dɛ Tugurik Tɔŋdɔma Niŋ La a sum tom mi ka ni jigi. 12Juda tɛŋka ale chim ka Naawen nitalim a bo tuilum tɛŋka zuk abe wa ŋman lueri Jerusalem. 13Nuru meena abe zaani Naawen niŋ dii nyiŋla wa nyini ka wa boka jigini a cheena.>>

Currently Selected:

Zakaria 2: BWU

Highlight

Copy

Compare