Yaalika 4

1Nya fi le nala dii yaa, m dek nɔŋŋoa! Aao, fi le nala dii yaa! Fi ninaŋa garuk nyaara nyaaraŋa po a nyaksi ale ka yaalika. Fi zuisaŋa a nye ase bua boari ale nyini Gilead Guuku zuk a siŋ la. 2Fi nyinaŋa a peenti ase ka piisa ate ba che ŋa kɔbta a sugri la. Kunyi an bɛ ya, ŋa meena a magsi ka chaab chappi. 3Fi nɔngbanvaataŋa a nye ase ka garucha mɔnuŋ la, ti le nala dii ase fi nin boro a biisi. Fi tapayaasaŋa a nyaksi kama garuk nyaara nyaaraŋa po.

4Fi ŋinni a nye ase ka Deevid kiani la a vili ale solisi, ale ŋiri baŋ ase ŋanchɔgsinta tusidi ale yik du a gilim la. 5Fi biisaŋa a nye ase ka walisa la, kab yibsa ale za wupuuta po a dɛ la. 6Mi ale bo zauŋ kunuŋ guuku zuk, ŋan baai nyum ale masa la guuku zuk, ate saluik vayɔgsummu a ga fuk ate legini a muriŋ bɛ. 7Fi nala ka meena, m nɔŋŋoa. Kaasuŋ a ka fi jigi ya.

8Va mu a nyini Lebanon, m pok fiaga, va mu a nyini Lebanon. Nyini Amana guuku zuk a siŋ, a nyini Senir guuku ale Yermon guuku zuk a siŋ, juijui ate gbeŋmaŋa ale yɔŋma a boro la. 9Fi zu mi suinummu kama, m dek tua, m pok fiaga. Fi zu mi suinummu kama ale fi ninaŋa ale chiak nya mi bunyi la, ale fi ŋinni baŋ yeŋ dekki.

10Fi yaalika a peenti ka m sui, m dek tua, m pok fiaga. Fi yaalika a ta suipeentik yega a gaam daam, ate fi kpaamu nyummu a gaam ŋan baai nyum ale masa la. 11Fi nɔngbanvaataŋa a lɔnsi ka masim ase samparima la, m pok fiaga, biisim ale siita ale bo fi giŋgeluŋku tɛŋ. Fi gattaŋa nyummu a nye ase ka Lebanon la.

12Fi a nye ase ka kaduk kaai ale suk, m dek tua, m pok fiaga, fi ka bulik kaai ale ligi, vili dii ale ligi. 13Fi tiisaŋa a nye ase yɔn gilima ti boari la, a yɔni yɔn maŋsa, ale a nye ase kpa buui nyum ale masa la, 14yaase ŋan baai meena nyum ale masa la. 15Fi ka kaduk po bulik, vili dii ate nyiam a buli a nyini Lebanon a siŋ a jam.

16Vaari yiti, wiiluk geŋ viowa, a jam, yeseok geŋ viowa. Fuk m kadukka zuk ate ka nyummu a waaŋ jigi meena. Basi ate m nɔŋku a jam jo wa kadukka po a lam ka yɔn maŋsaŋa.

Currently Selected:

Yaalika 4: BWU

Highlight

Compare

Copy