Yaalika 2

1Mi a nye ase ka Saaron wupuuta, ase vaasa po wupuuta.

2Nna ase wupuuta ale bo munsa po la, mi nɔŋku ka dila dɔklieba suŋsuŋ.

3Nna ase yɔna tiib ale bo gɔnni tiisa po la, mi nɔŋku ka dila nidoa paaluk suŋsuŋ. Mi a yaali ayen m kali ka wa yɔgsummu po, ate wa yɔnaŋa a masa a te mu. 4Wa ta mi cheŋ ka ŋandiinta tigini dɔk labsuku, ate wa tiktiwa ale bo mi zuk la a chim yaalika. 5Pai yɔn kosa a te mu pagrim, pai yɔna a yɔk m suinummu, diila yaalika a basi kama ate m cha. 6Mi kpagli ka wa gala nisaŋa, ate wa juga nisaŋa a gbaari mu. 7Puulim te mu, Jerusalem lieba, ni pɛ walik doataŋa ale walik saaŋa nyiŋ ayen ni kan kaasi ti yaalika.

8Wom de! M nɔŋŋoa! Nya! Wa le nna cheena, a yɔk zi a gaam guutaŋa, a chali a va guutaŋa zuima. 9Mi nɔŋku a nye ase kab la yaase walik duok la. Nya! Wa le la a za ti parika ŋaaŋ, a va tuokpattaŋa a nya, a va nansuiŋku a chuiri a nya. 10Mi nɔŋku a jam biisi ale mi kama ayen, <<Yiti, m nɔŋŋoa, m sambuliyaa, jam va mu. 11Nya! Ŋootaŋa a taam kama, ŋmottaŋa a basi nika ale taam. 12Wupuuta yaa le na nyini tɛŋka, yiila yika daaŋa a jam kama, nangbaŋsa kumsa ate ti a wom ti tɛŋka po. 13Kinkaŋka a boro a piilim kinkama yɔnika, ti sii ale a melim la busumka nyum masika a waaŋ jigi meena. Vaari yiti, jam, m nɔŋŋoa, m sambuliyaa, va mu jam.

14Mi nangbaŋka ale bo piuŋku zuk vɔrumu po la, a bo sukka jigi guutaŋa chiak la, sak mu fi nimbidiaka, basi ate m wom fi lueluku, ale ku masa kama, ate fi nimbidiaka a ta mariŋka. 15Yik suemkpattaŋa a te ti, suemkparuk bisaŋa ale a kaasi kaduksaŋa la, ti ti sii ale a nye puutaŋa la.

16Mi nɔŋku ka mi ate mi chim wa, wa bo ka wupuutaŋa po a dɛ. 17Ate vanni a ga vienti ate yisuŋtaŋa a bɛ, viriŋ, m nɔŋŋoa a nye ase kab la yaase walik paalik ale bo gu tii ale churinti la zuk la.

Currently Selected:

Yaalika 2: BWU

Highlight

Compare

Copy