Wamagsima 1

1Deevid biika Solomon, Izirali naawa wamagsimaŋa ale nna. 2Wamagsimaŋa de kiri ale ŋa te nuruba yam ale sinsaga, abe ŋa maari ba ate ba miŋ yam wie. 3A ta va wamagsimaŋa de zuk, nuruba ale tuesi sinsaga ŋaai ale ta yik m dek, ale wayɔrisima ale dii ale chim wensie ale chekki la. 4Sinsaŋŋa de ale basi ate waai ale jɔk po yiila la a seba. Ŋa le te bi paalukku wie miŋka yam. 5Basi ate baai ale ta yam la a wom wamagsimaŋa de ate ba nya yam yegayega. Abe baai ale miŋ ku kiri la a nya ganika, 6ate ku sak ayen waai meena a baga miŋ yam ale wamagsima ale sunsuelima ale yam wie ale watɔgma kama.

7Naawen yɔgsum chalika ale wie miŋka piilimka, ka betta nyiini ale a zɛri yam ale sinsaga.

8Be wom, m biiga ase fi ko ale a sak fu, kan zɛri fi mawa sinsaga. 9Fi ale a zamsi dii a nyini ba jigi la ale lik fu ale niaka abe ku lik fi nyiŋka ale zula.

10M biiga wabanyeerisa a daa paasi fu, cheem ŋaaŋ a te ba! 11Da dii dai ba ale weeni ayen, <<Jam a gum ti po. Te ate ti suk a ko a waai! Te ate ti gu a yik a waai ale kan seba wari nɔi po la. 12Te ate ti yik ba a nɛ vuta, ase boosuk ale nɛ ku nuruba diila. Te ate ti nɛ ba bunyi, ase baai ale a siŋ kum vɔrup po la. 13Poli ŋanti baai yega ate ti za ti nya la. Ti za ti pai ŋantaŋa de a basi ka ti yieŋa po. 14Jam a gum ti po, jam ate ti pai ŋa meena a chari a te chaab.>>

15M biiga, kan a cheŋ ale ba. Zaani niŋniŋ a nyini ba suitaŋa po. 16Ba kpabi kama ayen ba tom tuimbaata. Ba a nye ka a wuli ayen ba ko nuru. 17Ase nuim a dan nya baruk ale ku bari, bu a yalima kama ale ku. 18Alege daa nuruma de. Ba gu doa a limisi ka badek. Ba a bari ka badek nyuvooŋa. 19Baai nina ale muni ale ligra ale ka diila ale la. Ku a zu ka ba nyuvooŋa.

20Yam a nuem ka suitaŋa po. Yam a kum ka peelim jigi meena. 21Yam a wi ka nuru boanni ale bo suiduoku po la ale baai ale tigsi za tɛŋ kpieŋka tuoku la.

22<<Ku le paari ka disa po betta, ate nama ale basi ni betta tuimaŋa? Ka disa po ate nama baai ale koosi a la nuruba la ale basi ni laataŋa ate betta mɛ a kisi yam wie miŋka? 23Jam de a jam wom mi m le kpiiri m yam chiika a basi fi zuk ate fi ta yam. 24<<Mi kasim a wi fu kama, alege fi kan jam. M cheŋ paari fu kama, alege fi kan cheem a nya mu. 25Fi banti m le sak fu diila kama ale zɛri dii ate m ta a sak fu la. 26Dila nyiŋ m le la fu ase fi nin bo daanika po! M le nye fu a la ase kaasuŋ ale jam bag fu la. 27Ase kaasuŋ ale jam bag fu ase va pagrik la, ate daanika a gilim fu, ate fi daanika ale fi namsika a paari fu.

28<<Ba dan kum a yaali maarika, m kan wom ba. Ba nina a dan poom muni a gisi mu, ba a kan nya mu. 29Dii nyiŋla ba zɛri ka wie miŋka ale an yaali ba sak zula ale Naawen. 30Ba zɛri m le sak ba diila kama ale an poom wom m sinsaŋŋa ate m pai a sak ba la. 31Dila nyiŋ, ba ale nya ba nyeka biem tutuna, abe ba ŋman nam ba biem nyeka nyiŋ. 32A jɔk po yiila nyama a cheem basi mi kama ale a cheŋ kum jigi. Betta a kaasi ka badek sebchakka nyiŋ. 33Alege baai ale a wom mi la ale ta suiyɔgni, ate yɔgsum a kan chim daanika a te ba.

Currently Selected:

Wamagsima 1: BWU

Highlight

Compare

Copy