Filipai 4

1Dila nyiŋ, m suata, nama baai ate mi a yaali ale poli ayen m nya ni la, m suipeentik ale m naam zutɔk, ni le ni zaani dii giŋgiŋ ale Naawen la ale la, m dek doaba.

2Mi a saalim ti toama Yuodia ale Sintiki ale a va Naawen la ayen ba ta nɔiyeŋ ale chaab. 3Mi ale fi abe ale maa chaab a tom ale chaab la, mi a saalim ayen fi a maari nipooma de, dii nyiŋla, mi ale bala ale maa chaab mɛ a nam ase ti ale sak nuruba Wen wieŋa la. Kelement mɛ ale baai meena ale va tama ŋaaŋ la, a nye ka dila dekdega. Wen be ŋmarisi ba yueŋa a nyo ŋanvuta yue gbaŋka po kama.#4:3 Yiila 69:28

4Nama baai ate ti Naawenni soa ni la, ni basi ate ni suiniimaŋa a kasim peenti nna yegayega ti Naawenni nyiŋ. M be ŋman a weeni ni kama ayen ni basi ate ŋa peenti nna yegayega. 5Ku kan beni ate Naawen ŋman pilim jam. Dila nyiŋ ku a fɛ ate ni seba nidek taka ale nuruba. 6Ni kan basi ate wie a daani ni, alege ni puusaŋa meena po ni a te Wen jiam ate wa pai ŋan baai meena ate nama a yaali la a te ni. 7Ni dan a nye dila, Wen le basi ate suiyɔgni dii ate nuru biik an baga miŋ di kiri a chak la a jam ni suiniima po. Nama baai ate Yeezu Kirisita soa la, a dan ta suiyɔgni de, wabiok an baga a jam ni jigi ya.

8Ku kpeglimka, m suata, wa dii ale ka wensie la, wa dii ale ta zula la, wa dii ale magsi la, wa dii ale welema la, wa dii ale nala la, wa dii ale ta mariŋka la, wari a dan ŋmasi nala ale magsi pimpauk ni be poli ŋala wie. 9Ase mi ale jam bo ale ni diipo la, ni wom mi sinsaŋŋa kama ale nya m tuimaŋa me ale jam ka diila. Ni ba a poli mi sinsaŋŋa wie abe ni a tom ni tuimaŋa ase dila la. Ni be a tom dila, ate Wen dii ale a te suiyɔgni la, le boro ale ni.

10Ti Naawen dii ale bo ale mu la, a basi kama ate m sui peenti nna yegayega, dii nyiŋla ni ŋman sak mu kama ayen ni popola a diem bo ale mu kama. Ni jam a liŋ maari mu kama ate ku beni, alege ate yɔgyɔgla de ni yaa ŋman nya suik ayen ni maari mu. 11Mi kan weeni nama kama ayen ka ŋanta ale posim mu. Ku dan poom ka dii mi jigi, mi a poli kama ayen ŋan baai ate mi a diem ta la a zuak kama a te mu. 12M seba m dek yikka kama ase nyeboka a nin baasa. M be seba m dek yikka kama ase nyeboka a nin pagra mɛ. Juijui meena ate mi boro la m seba kom taka kama ale chakta mɛ taka. 13Mi baga a nye wari meena kama Kirisita nyiŋ waai ale a te mu pagrim la. 14Alege ku nala ka nna yegayega ale ni ale maari mu daani kaai po ate m boro la.

15Nama Filipai demma, ni seba kama ayen diipo ate mi liŋ sak nuru baai le jam bo Masidoniya po la, Wen wamaŋsaŋa wie alege basi dula la nama nyiini ale maari mu suiku po. Nama mɛ ale nya maarika mi jigi. 16Mi ale jam bo Tesalonika po la, ni tom tiirim ŋanta a te mi kama a paari dii choa. 17Mi kan potim a yaali ka ni tiirimu alege mi a yaali ka Wen le wa te ni nyuen tii a magsi chaab ale ni tiirimu ate ni te mi la. 18Ni tiirim buui ate ni pai te Epaforodaitus ate wa ta jam a te mi la, a deri gaam mi ale a yaali diila kama. Nama ale nye diila a basi kama ate Wen sui a kasim peenti nna yegayega. Kula a nye se ka Juuma ale yik duŋsaŋa a kaabi a te Wen la.#4:18 Kaabka 1:9 19Mi Wenni ale te ni ni ŋan yaalinta meena a magsi chaab ale wa zula jigsika Yeezu Kirisita nyiŋ. 20Wen dii ale ka ti Ko la, a ta zula kama yegayega a ta a cheŋ diipo meena wuu. Ku be nye dila.

21Mi a puusi Wen nuruma baai ale Yeezu Kirisita ale ka bunyi la. Ti suataŋa baai ale bo ale mi dela jigini la, mɛ a puusi ni. 22Wen nuruma baai mɛ ale bo tɛŋka de po la, a puusi ni ale baai meena ale a tom Siiza yenni po la, mɛ a puusi ni.

23M be ŋman a saalim ayen ti Nyɔnɔwa Yeezu Kirisita ŋmanteka a bo ale ni meena.

Currently Selected:

Filipai 4: BWU

Highlight

Copy

Compare