Chiinika 9
9
1Naawen a jam biisi ale Moosis Sinai Gɔi Kosikka po chiik kaai ale dɛ niŋka la bena ŋayewa po ate ba jam basi Ejipiti tɛŋka la ŋaaŋnyiŋ. Wa jam weeni ayen, 2<<Basi ate Izirali demma a dɛ Gaambasika Tigini diipo ale magsi la. 3Ni de di diipo ale magsi la junɔi chiika de daa pi ale ŋanaansiwa danni a ta va di ŋmarisika ale di buusaŋa ale ka diila.>>
4Dila nyiŋ Moosis yaa jam weeni Izirali demma ayen ba dɛ Gaambasika Tigini, 5ate ba nye dila Sinai Gɔi Kosikka po junɔi chiik kaai ale piilim la, ka daa pi ale ŋanaansiwa danni. Izirali demma a jam nye ka dii meena ate Naawen a jam weeni Moosis la.
6Alege ba gela an jam bag a dɛ Gaambasika Tigini dai dila danni, dii nyiŋla ba jam taŋ ka badek ale kpio. Ba yaa jam Moosis ale Aaron jigi dai dila danni 7a weeni Moosis ayen, <<Tama a taŋ kama dii nyiŋla ti tiri ka kpio, alege ka boa ale a kasi tama ate ti an baga a te Naawen ti tiirimu ale Izirali dem mbala diipo ale magsi la?>>
8Moosis yaa tulisi ba ayen, <<Ni limisi ate m bek Naawen a wom wa le ta dii wa weeni ni la.>>
9Ate Naawen a jam weeni Moosis ayen, 10<<Weeni Izirali demma ayen, <Ase ni wanyi yaase ni ŋaaŋbisa a dan daŋ badek ba le tiri kpio la nyiŋ, yaase ba bo nyeerim po, ba diem baga dɛ Naawen Gaambasika Tigini kama. 11Ba magsi ba dɛ tigini ka daa pi ale ŋanaansiwa danni chiisa siyewa po junɔi. Ba a magsi ba ŋɔbi pabiika a gum chaab ale ŋandiin tii ate ba an nyo dabinta du la ale tinaŋ tuasa. 12Ku a fɛ ate ba kan tali lammu ate vari veenti bu yaase ba ŋɔbi ka kobaŋa. Ase ba daa dɛ Gaambasika Tigini, ku a fɛ ate ba va ŋmarisika meena. 13Alege nuru waai a dan nala, ale an bo nyeerim po, a zɛri an dɛ Gaambasika Tigini, kula nyɔnɔwa ku a fɛ ate ba yiak wa, wa nuruma po a basi dii nyiŋla wa an te Naawen tiirim diipo ale magsi la. Nuru wala ale nya wa biemu tutuna.
14<< <Nichaanɔ a dan bo ni po a yaali wa dɛ Naawen Gaambasika Tigini, ku a fɛ ate wa mɛ a nye dila a ta va di ŋmarisika ale di buusaŋa ale ka diila. Ku a fɛ ate ni ta ŋmarisi yena a te nicham ale tɛŋ bisaŋa.> >>
15Dai dii danni ate viuku, viuku kuui ate Naawen wanni a boro ate ba jam ti ku la, chiŋmari ale jam lik ku. A nyini junɔi a ta ga paari saluik, chiŋmanni a jam bo viuku zuk ase ka bolim la. 16Ku le jam ka dii a tom du a cheŋ la ale la. Chiŋmanni a jam lik ku kama, tɛŋka a dan sobiri di a nya ase ka bolim la. 17Diipo meena ate chiŋmanni a zagri ale a ge viuku la, Izirali demma a basi dula kama. Diipo ate chiŋmanni a zaani la, Izirali demma mɛ a kali ka dula. 18Naawen a nyiem le biisi ate Izirali demma a cheŋ, wa dan ŋman weeni ayen ba zaani ba nyiem a bo ka dula. Chiŋmanni ale bo viuku zuk a beni diila, ba a bo ka dula. 19Ase chiŋmanni a dan bo viuku zuk ate ku beni, Izirali demma a nyiem siak a te Naawen wanni kama a kan cheŋŋi. 20Dai dii dai chiŋmanni a bo viuku zuk ka daa maga, ate Naawen a dan biisi, ba wari bo dula jigini, ate wa dan ŋman biisi ayen ba cheŋ, ba yaa basi dula ale cheŋ. 21Dai dii dai chiŋmanni a boro a nyini ka junɔi a ga paari saluik, ase di dan ga zagri saluiku ba a basi dula kama. Ku dan poom ka kantueŋ yaase yok, chiŋmanni a dan ga zagri ba a cheŋ kama. 22Chiŋmanni a dan bo viuku zuk a paari daa ŋaye yaase chiik yaase ben, Izirali demma a bo ka dula ba kan cheŋ, alege di dan zagri, ba a cheŋ kama. 23Naawen a dan biisi, ba nyiem tigsi a bo ka jigi yeŋ, ate wa nyiem ŋman biisi ate ba basi dula ale cheŋ. Ba jam a wom Naawen wanni kama, a ta va wa wanni ate wa jam biisi a ta va Moosis zuk la.
Currently Selected:
Chiinika 9: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
