Chiinika 27
27
1Liema de ate ba kowa a chim Zelofehad ate wa chim Yefer nidoabili ate wa mɛ a chim Gilead nidoabili ate wa mɛ a chim Makir nidoabili ate wa mɛ a chim Manasa nidoabili, a nyini Manasa yezuimaŋa la ate wa mɛ a chim Josefi nidoabili. Liema de yue a jam le Mala ale Nowa ale Yogla ale Milka ale Tirza. 2Ba yaa jam cheŋ Tuka Viuku nansuiŋku nɔi a zaani Moosis ale Eleaza kaabteerɔwa ale niŋdeerɔma ale tigsuŋku meena niŋ a weeni ayen, 3<<Ti kowa a kpi ka gɔnni po. Wa jam maa ka Koora ŋaaŋviirɔma po baai ale jam jigi yeŋ an siak te Naawen la, alege wa jam kpi ka wadek biem nyiŋ wa an biak nidoa. 4Ka boa ate tama kowa yuei a muriŋ a bɛ wa dɔkku po ayen wa ka nidoabili nyiŋŋa? Ni te ti nitalim a nyini ti koma jigi.>>
5Moosis yaa ta ba wanni a jam Naawen niŋ 6ate Naawen a weeni wa ayen, 7<<Zelofehad liema ale a weeni diila, ka wensie. Ku a fɛ ate ni te ba ba dɛka jigini ase ba mɛ nitalim la a pai ba koma nitalimu a te ba.
8<<Weeni Izirali demma ayen, <Ase nuru a dan kpi ale ka nidoabili ya, ni pai wa nitalimu a te wa liewa. 9Ase wa dan kan ta lie, ni pai wa nitalimu a te wa suataŋa. 10Wa bɛ dan kan ta suata, pai wa nitalimu a te wa kowa suataŋa. 11Ase wa kowa me a dan kan ta suata, pai wa nitalimu a te wa dɔkku po waai ale moata wa la ate wa tanla. Ku ka ŋmarisika buusa a magsi ayen Izirali demma a va ase Naawen ale weeni Moosis diila.> >>
12Naawen a yaa weeni Moosis ayen, <<Jueli guuku de ale bo Abarim po la a nya tɛŋka a ti m te Izirali demma la. 13Fi dan nya a nueri, fi mɛ ale kpi kama ase fi suoku Aaron ale jam kpi diila. 14Dii nyiŋla tigsuŋku ale jam nye tukpari nyaataŋa ale bo Zin Gɔnni po la, nama jam a zɛri m wanni kama an zuli mu ase weleŋsa nyɔnɔwa la ba nimbie po.>> Dela jam ka Meriba Kades nyaataŋa ale bo Zin Gɔnni po la.
15Moosis a yaa weeni Naawen ayen, 16<<Naawen, nurubiik meena chiisa Wenni, a lueri nuru ate wa a nya naakuuni de zuk 17waai ale wa dɛ ba niŋ a ta ba nyini peelim abe wa ŋman ta ba jo, ate Naawen nuruma a kaa nye ase piisa ale kan ta naapeerik diila.>>
18Ate Naawen a yaa weeni Moosis ayen, <<Yik Nun nidoabinni Josua, wa ka nuru waai ate Naawen chiik a bo wa po la, pai fi nisaŋa a vi wa zuk a puusi te wa. 19Basi ate wa zaani Eleaza kaabteerɔwa ale tigsuŋku meena niŋ ate fi nye dila ale ba boro. 20Te wa fi pagrimu gela, dila ale basi ate Izirali naakuuni meena a zuli wa. 21Wa le zaani ka Eleaza kaabteerɔwa niŋ waai ale wa pai Urim a bek wie a sak wa Naawen ale a yaa diila. Naawen ale a weeni diila wa ale Izirali naakuuni meena ale nyini peelim, wa le ŋman weeni ba ate ba jo.>>
22Moosis a yaa nye dii ate Naawen a weeni wa la. Wa yik Josua a basi ate wa zaani Eleaza kaabteerɔwa ale tigsuŋku meena niŋ. 23Ate wa yaa pai wa nisaŋa a vi wa zuk a puusi te wa ase Naawen ale weeni Moosis diila.
Currently Selected:
Chiinika 27: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
