Chiinika 23
23
1Balaam weeni ayen, <<Se kuŋkuŋta tiyopɔi dela a te mu, gomsi lalisa siyopɔi ale padaasa siyopɔi a te mu.>> 2Belak yaa nye dii ate Balaam a weeni la, ate ba nɔi bayema a yaa pai lalik ale padiak a nye kaabka kuŋkuŋ meena zuk.
3Balaam yaa weeni Belak ayen, <<Bo dela fi tiirimu gauŋ abe fi ge ate mi cheŋ nakpiak. Da dii dai Naawen ale jam tu chaab ale mu. Wa le pai wa dii a sak mu la m le weeni fu.>> Ate wa yaa basi dula ale jueli guutaŋa zuk.
4Wen a yaa tu wa ate Balaam a weeni ayen, <<Mi nye ka kuŋkuŋta tiyopɔi, kunyi meena zuk m teka lalik ale padiak.>>
5Naawen yaa pai wari nyo Balaam nɔnni po ale weeni wa ayen, <<Ŋman cheŋ Belak jigi a te wa wanni de.>>
6Ate wa yaa ŋman cheŋ ga nya ale wa za wa tiirimu gauŋ ale Moab nabisaŋa meena. 7Balaam yaa biisi wa wasusugni ayen, <<Belak ale ta mu nyini Araam tɛŋka. Moab naawa ale bo guutaŋa ale bo konni po la a jam weeni ayen, <Jam ka kikaasa a te Jekob te mu jam zɛri Izirali demma.> 8Mi a yaa m nyeka se ka te baai ate Wen an ka te la? Mi a yaa m nyeka se a zɛri baai ate Naawen an zɛri ba la? 9Piuŋku zuk mi nya ba kama, a nyini kauk kuui ale jueli la mi nya ba kama. Mi nya nuru baai ale gaari bo dula la kama baai ale kan pai badek ase ba ka tɛŋsaŋa de kanyi la. 10Ka wana ale baga a chiini Jekob bisaŋa yaase wa chiini Izirali bisa bunaansiwa po? Basi ate mi kpi ase wayɔrisima nyɔnɔ ale kpi la abe m kpeglimka a nye ase bala la!>>
11Belak yaa weeni Balaam ayen, <<Boa ate fi nye mi di? Mi ta fi jam ayen fi ka te m dachaasaŋa alege fi an nye wari ya, fi gonti niak ba kama!>>
12Wa yaa tulisi ayen, <<M kan biisi Naawen ale pai dii a nyo m nɔnni po la?>>
13Ate Belak yaa weeni wa ayen, <<Va mu a cheŋ jigi di choa dula jigini fi le nya ba, fi le nyaka kauk alege daa ba meena. A nyini dula ka te ba a te mu.>> 14Wa yaa ta wa a cheŋ Zofim peelim po Pisga guuku zuk, dula jigini wa yaa se kuŋkuŋta tiyopɔi a yaa kaab lalik ale padiak kunyi meena zuk.
15Balaam a yaa weeni Belak ayen, <<Bo dela fi tiirimu gauŋ abe fi ge ate mi tu Naawen dula.>>
16Naawen a yaa jam tu Balaam a pai wari a nyo wa nɔnni po ayen, <<Ŋman cheŋ Belak jigi a pai wanni de a te wa.>>
17Wa yaa ŋman ga nya wa ale wa za wa tiirimu gauŋ ale Moab nabisaŋa. Belak yaa bek wa ayen, <<Naawen ayen ka boa?>>
18Wa yaa biisi wa wasusugni ayen, <<Belak yiti a wom, wom mi Zippor nidoabili yaa. 19Wen daa nuru ayen wa velimu yaase saalɔbiik ayen wa tagri wa popolaŋa. Wa le biisi ale kan nye? Wa le puulim ale kan nye wa le puulim diila? 20Mi tuesi ka wari ayen m niak, Wa be niak ba kama mi a ŋman bag a tagri di.
21<<Naŋbiak a ka Jekob buuni po. Ti an nya niniga Izirali demma po. Naawen ba Wenni a bo le ba kama. Naawa kaarika a bo ba suŋsuŋ kama. 22Wen ni ta ba nyini Ejipiti po a nyini. Ba ta ka lalik waarik pagrim. 23Bɔkka tuima an baga a nye Jekob wari ya, porisika an baga a nye Izirali demma wari ya. Ba yaa le weeni ka nna a te Jekob ale Izirali demma ayen, <Nya Naawen ale nye diila!> 24Nuruma a yaa yiti ase gbeŋ sari la a nuem ase gbeŋli a nyiem ale nya lam a ŋuuni dii a kan vuusi la, ka di ni ga ŋɔbi ale nyu jabuui ate di yik la ziimu.>>
25Ate Belak a yaa weeni Balaam ayen, <<Kan ka a te ba yaase fi niak ba mɛ!>>
26Balaam yaa tulisi ayen, <<Mi an weeni fu ayen ku a fɛ ate m nye dii meena ate Naawen a weeni la?>>
27Belak a ŋman weeni Balaam ayen, <<Jam basi ate m ta fu cheŋ jigi yoŋ. Da dii dai dila ale yɔk Wen sui ate wa basi ate fi ka te ba a te mi dula.>> 28Belak yaa ta Balaam a jueli Peor guuku zuk ale chuiri a nya tɛŋka kauk kuui ale doa jassi la.
29Balaam mɛ a yaa ŋman weeni ayen, <<Sɛ kuŋkuŋta tiyopɔi (7) dela a te mu, gomsi lalisa siyopɔi (7) ale padaasa siyopɔi (7) a te mu.>> 30Belak a yaa jam nye dii ate Balaam a weeni wa la ale kaab lalik ale padiak kuŋkuŋ meena zuk.
Currently Selected:
Chiinika 23: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
