Chiinika 13
13
1Naawen a yaa weeni Moosis ayen, 2<<Tom nuruba ate ba ga kpesi nya Keenan tɛŋka, kaai ate mi ale pai te Izirali demma la. A nyini ba ŋiaka dɔkku po tom ku niŋdeerɔma wanyi meena.>>
3Ase Naawen ale weeni la, Moosis yaa tom ba ate ba nyini Paran Gɔnni. Ba meena a jam ka Izirali niŋdeerɔba.
4Ba yueŋa ale nna. A nyini Aruben dɔkku po, ba tom ka Zakkur nidoabili Sammua. 5A nyini Simeyon dɔkku, ba jam tom ka Yori nidoabili Safat. 6A nyini Juda dɔkku, ba jam tom ka Jefunne nidoabili Kaleb. 7A nyini Isaka dɔkku, ba jam tom ka Josefi nidoabili Igal. 8A nyini Ɛfraim dɔkku, ba jam tom ka Nun nidoabili Yoseya. 9A nyini Benjamin dɔkku, ba jam tom ka Arafu nidoabili Palti. 10A nyini Zebulun dɔkku, ba jam tom ka Sodi nidoabili Gaddiel. 11A nyini Josefi dɔkku Manasa, ba jam tom ka Susi nidoabili Gaddi. 12A nyini Dan dɔkku, ba jam tom ka Gemalli nidoabili Ammiel. 13A nyini Asɛ dɔkku, ba jam tom ka Maakil nidoabili Setur. 14A nyini Nafitali dɔkku, ba jam tom ka Vofsi nidoabili Nabi. 15A nyini Gad dɔkku, ba jam tom ka Maki nidoabili Geuel. 16Nuruma de yueŋa ale nna, ate Moosis a jam tom ayen ba ga kpesi nya tɛŋka la. Moosis ale jam tagri Nun nidoabili Yoseya yuenni ale te wa yue ayen Josua.
17Ase Moosis ale tom ba ayen ba ga kpesi nya Keenan tɛŋka la, wa weeni ayen, <<Ni va Negev tɛŋka po ale tɛŋ kaai ate guuta a bo ka po la. 18Ni nya ase tɛŋka a nye ase ka se la, nuru baai ale bo ka po la a ta pagrim yaase ba wobsa kama, ba piisi yaase ba an piisi ya. 19Ba bo ka tɛŋ boan choa po? Ka nala yaase ka lɔrima? Tɛŋ sin chaab po ate ba boro? Ba an se parik a gilim si yaase ba se parik a gilim si? 20Ka tantaŋa ka sɛ? Poosuk a bo ka po yaase poosuk a ka? Tiisa a bo ka po yaase tiisa ka? Ni nye dii ate ni ale baga a ta tɛŋka tiisaŋa yɔnaŋa gela a jam la.>> Ku jam ka diipo ale magsi yɔn fi gilima ŋaai ale dɛ niŋ a muni la.
21Ba yaa jam cheŋ a ga kpesi nya tɛŋka a nyini Zin Gɔnni po a ta ga paari Areyob a tuk Lebo Yamat tɛŋsaŋa nyiŋ. 22Ba yaa va Negev tɛŋka po a jam paari Yebron tɛŋka, kauk kuui ate Anak ŋaaŋbisaŋa Ayiman ale Sesai ale Talmai a boro la. Ba le jam se Yebron la ku paari ka bena ŋayopɔi alege ate ba se Zoan ale bo Ejipiti po la. 23Ase ba le jam paari Eskol Viaka la, ba yaa jam che tiib naŋ ale yɔn fi gilima sagi. Nuruba baye ale jam pai yɔn fi gilima a yik diok nyiŋ a ji ate di bo ba suŋsuŋ ale yɔn kpieŋ gilima ale kiŋkama. 24Ba jaa wi dula ayen ka Eskol Viak dii nyiŋla, Izirali demma ale jam gbesi yɔn fi gilima sagni dula la nyiŋ. 25Ba ale kpesi a nya tɛŋka a nueri daa pisinaansiwa ŋaaŋ nyiŋla, ba yaa ŋman jam.
26Ba yaa ŋman jam Moosis ale Aaron ale Izirali naakuuni ale jam bo Kades, Paran Gɔnni po la jigi. Dula jigini ate ba yaa jam weeni dii ate ba nya la sak Moosis ale Aaron Izirali tigsuŋku meena ale pai tɛŋka yɔnaŋa a sak ba. 27Ba yaa jam weeni Moosis wieŋa de ayen, <<Ti cheŋ tɛŋ kaai ate fi a tom ti la kama, siita ale biisim ale sueri ka po ka yɔnaŋa abe le nna. 28Alege nuru baai ale bo ka po la a pagra kama, ate ba se parik a gilim ka ale ŋmasi zuak mɛ. Ti nya Anak ŋaaŋbisaŋa mɛ ale ba bo dula. 29Amalek demma a bo ka Negev tɛŋka. Yit demma ale Jebus demma ale Amori demma a bo ka guuku zuk tɛŋka, alege ate Keenan demma a jam moata ka nyakpiemu ale sali Jodan Benni la.>>
30Kaleb a yaa basi ate nuruma a nye chorototo Moosis niŋ ale weeni ayen, <<Ti cheŋ a ga tuesi tɛŋka, tama ale baga a nye dila kama.>>
31Alege nuru baai ale va wa cheŋ la a weeni ayen, <<Tama an baga a nye kpaliŋ ale nuru bala. Ba pagra a gaam tama ale ka diila kama.>> 32Ate ba yaa basi ate wanni de a waaŋ paari Izirali demma meena ba le nya dii tɛŋka po la. Ba weeni ayen, <<Tɛŋ kaai ate tama cheŋ ga kpesi nya la, a nɛ baai ale bo ka po la kama. Nuru baai meena ate tama a nya la ka ganduata. 33Ti nya Anak ŋaaŋbisaŋa Nefilim demma mɛ a boka dula. Tama a nye ase ka nanchoŋta la tama dek nina po, ti ka dila a te ba.>>
Currently Selected:
Chiinika 13: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
