Nayum 2

1Nama Niineve demma kaasirɔwa cheena ayen wa siti ni. Pagrim buui ale bu kaasi ni la a jam ya. Ni lik ŋan kasintaŋa. Ni kasi suiku. Ni gomsi magsi kpaliŋ.

2Naawen a yaali wa ŋman te Izirali zulaŋa kama ase ba le jam ka dii alege ate ba dachaasaŋa a yik ba la. 3Dachaasaŋa a jam ta ka ŋanchɔgsin mɔnta ale jo garuk mɔnta. Ba gomsi kama ayen ba choa ba. Ba torokoma a nyaksi ase ka bolim la. Ba wusumaŋa a yɔk namaga. 4Torokoma a chali tɛŋka suitaŋa po a cheŋ niŋ ale ŋaaŋ tɛŋka gugorutaŋa po. A nyaksi ase bolim ale a nye nna yilibi yilibi ase bolim ale a kamsi la.

5Ba wi ba kpaŋŋa kama ate baa cheŋ niŋ geŋ ale a nak naŋsa a lo. Tugurik tɔŋdɔma a chali ga parika jigini ayen ba kasi ŋan baai ba a yuk la. 6Nansuiŋ tii ale bo benni jigini la a lagri Naawa yenni po niniga nyiini ale sueri. 7Nipok naawa ba yik ate wa yɔmma a kum ase nangbaŋsa la a nak ba kuusa ale niniga. 8Niineve demma a daa chali kama ase mɔgi ale ŋɔsi la. Ba yaa kaari ayen, basi basi, alege waai an viriŋ ŋaaŋŋa. 9Ni vari kpanaŋa. Ni vari ligmɔniŋka. Tɛŋka jigsi kama ale ŋanta. 10Niineve a kaasi kama a dua. Ate nuruma nyiŋsa a gɔk ate ba duna a nak chaab, pagrim a bɛ. Ate nimbidaasa a peenti.

11Tɛŋ kaai ale jam a nye ase gbeŋma boka jigi la a boka be yɔgla, juijui ate gbeŋma bisa a dɛ ŋandiinta la, juijui ate gbeŋduata ale gbeŋniima a cheŋ ate jaab a kan nye ŋa bisaŋa wari la? 12Gbeŋli a ko ka lanta yega a te di bisaŋa ale di vaanchoawa, ale sueri di boka jigini ale lanta.

13Naawen Dii Ale A Dɛ Tugurik Tɔŋdɔma Niŋ La yaa weeni ayen, <<Mi ka ni dachiak. M le ju ni torokoma. Ba le ko ni tugurik tɔŋdɔma kpaliŋ po abe m tuesi jaab meena ate ni tuesi nuru yonta jigi la. Ba kan ŋman wom baai ate ni a tom la luelita.>>

Currently Selected:

Nayum 2: BWU

Highlight

Copy

Compare