Matiu 6
6
1<<Ni dan tom tuimaŋsa a te nuruba, ni kan a nye ŋa a lagri ate nuru meena a nya ŋa. Ni dan a nye dila, ni kan baga a tuesi tutuna ŋaai ate ni Kowa waai ale bo wenŋmazuk a yaali ayen wa te ni la.
2<<Ni dan pai jaab a te jajak, kan mooli a sak nuruba ase sakpaŋ zula nyama ale a nye dii ba tuka diinaŋa po ale yabaŋa po la. Ba a nye dila ayen ka nuruba a pak ba. Bala chaama poom tuesi ba tutuna kama. 3Ni dan pai jaab a te jajak, kan basi ate ni dɔ maŋsa a poom seba ku nɔi po. 4Ni dan a suk a nye dila ni Kowa, waai ale a nya dii ate ni a nye la ale tuni ni.
5<<Ni dan puusi a te Wen, ni kaa puusi ase sakpaŋ zula nyama ale a puusi diila. Bala chaama a yaali ayen ba nyiem zaani ka ba tuka diinaŋa po yaase yabaŋa po a puusi ate nuruba a nya ba. Mi ale a weeni ni ayen ba poom tuesi ba tutunaŋa kama. 6Alege ni dan a yaali ayen ni puusi a te Wen, ni jo ni diinaŋa po nidek ni nyiini abe ni lik ni tuataŋa a puusi a te ni Kowa, waai ate ni kan nya wa la. Ate ni Kowa, waai ale a nya ni la a te ni jabuui ate ni a yaali la.
7<<Ni daa puusi a te wa, ni kaa biisi wie nna yegayega ate ŋa ka kiriya ase bɔgluk kaarisaŋa ale a nye diila. Ba a poli kama ayen biik yegayega ale basi ate ba bɔgtaŋa a wom ba. 8Ni abe kaa nye ase bala la. Ni Kowa a poom seba jaabuui ate ni a yaali wa jigi la kama ale ge ate ni a bek wa.
9<<Ni be puusi a te Wen ase nnala la, <Ti Ko waai ale bo wenŋmazuk la, basi ate fi yuei weleŋka a nya zula. 10Fi naamu abe jam, ate fi ale a yaali diila, a nye tɛŋzuk de, ase ku le ka dii wenŋmazuk la. 11Te ti jinla de ŋandiin tii ate ti a yaali la. 12Pai ti pama a daasi ti ase tama ale pai a daasi chaab diila. 13Kan basi ate ti jo nyenyaka po, abe fi vari ti jabioku jigi a basi, ale naamu ka fi ale soa ale pagrimu ale zulaŋa taam wuu. Ku be nye dila.>
14<<Ni dan vɔŋ a te baai ale nye ni a kaasi la ni Kowa, waai ale bo wenŋmazuk la, ale vɔŋ a te nama mɛ. 15Ni be dan kan vɔŋ a te baai ale nye kaasi ni la, ni Kowa mɛ a kan vɔŋ a te ni.
16<<Ni dan boro a bobi nɔi,#6:16 Kaabka 16:29-34 ni kan kaasi ni nimbieŋa ase sakpaŋ zula nyama ale a nye diila. Ba a kaasi ba nimbieŋa kama ayen waai meena nya ba ale bobi nɔi la. Mi ale a weeni ni, ba poom nya ba tutunaŋa kama dera. 17Ni dan bobi nɔi, ni be puuri ni nimbieŋa abe ni chaasi ni zuimaŋa, 18ate nuruba a kan baga a seba ayen ni bobi ka nɔiya. Ni Kowa waai ale a nya dii meena ate ni a suk a nye la, wa le te ni ni tutunaŋa.
19<<Ni kan pai ŋanta yegayega a dueni tɛŋzuk de, ate miari a dɛ kaasi, yaase nyiam a siŋ ba po a kaasi ba, yaase zueba a wɛ a jo du a zu ba. 20Alege ni pai ni ŋantaŋa yegayega a dueni wenŋmazuk. Miari ale nyiam a kan baga a kaasi ba dula jigini. Zueba mɛ a kan baga a wɛ jo dula jigini a zu ba. 21Dii nyiŋla, ni jigsika ale bo juijui la, ni suiniima mɛ a bo ka dula.
22<<Nummu a nye ase ka zeuŋ la a te nyiŋka. Nummu a dan nala nyiŋka meena a sueri ale ka bolim. 23Alege ni nimbieŋa a dan kan nala nyiŋka a bo ka legi po. Ase bolim buui ale bo ale ni la dan ka legi, legi dila bie kama yegayega.
24<<Nuru yeŋ an baga a tom a te kpaga ŋaye, wa le kisa ka wanyi abe wa a yaali nwala yaase wa le va ka wanyi abe wa zɛri wanyi. Fi kan baga a tom a te Wen ale a yaali ligra.>>
25<<Kude nyiŋ mi a weeni ni ayen ni kaa a yiili ni nyuvooŋa, ayen ni le nya ŋandiinta ale nyiam ate ni baga a vuugi, yaase gatta a jo lik ni nyiŋsaŋa. Nyuvuri an gaam ŋandiinta ale gatta? 26Ni nya nuinsaŋa sii ale bo wenŋmazukku a yiti la. Si kan kpa tatta yaa si a che za a pai ŋa a nyo bua po. Ni Kowa waai ale bo wenŋmazuk la ale a nya si zuk. Nama an gaam nuinsaŋa? 27Ka ni wana ale a yiili ate dila a gum dai du a te wa? 28Ka boa ate ku a daani ni gatta nyaka nyiŋŋa? Ni ŋman nya tiisaŋa ale wuutaŋa ale a nye ba puutaŋa la, ba kan tom yaase ba a yɔk gatta, 29alege ni basi ate m weeni ni ayen Solomon ale jam jigsi dii nna yegayega la, wa jam ka gatta ate ti nala a paari tiisaŋa ale wuutaŋa de puutaŋa. 30Alege Wen abe dan a te ti ga tila chaab wuutaŋa de tii nyiem ale boro jinla alege chum ba ŋman pai ti nyo bolim po la, ku a fɛ kama ayen wa te nama mɛ gatta. Ka boa ale soa ate nama siaka an soa diiya? 31Ni be kan a daani ni dega abe ni a weeni ayen, <Ti te nye ka sɛ a nya ŋandiinta a dɛ? Ti te nya nyiam ka be a nyu yaase ti te nya gatta ka be a jo?> 32Baai ale kan daa Juuba la a nyiem a kasim a yaali ka ŋantaŋa de chaama, alege ni Kowa waai ale bo wenŋmazuk la, a seba ayen nama a yaali ba kama. 33Ni basi ate ni niŋ a bo ale Wen naamu ale wa wayɔrisimaŋa, ate wa yaa te ni jaabuuri meena ate ni a yaali la.
34<<Nya kude nyiŋ ni kan basi ate chum wie a daani ni. Daaŋa meena a ta wie kama ate ŋa a daani. Kan ŋman yaali daanika a gum danni ale ta daani kaai la po.
Currently Selected:
Matiu 6: BWU
Highlight
Share
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation