Matiu 21

1Ba ale jam a cheŋ Jerusalem la ba yaa jam paari Betfaaji tɛŋka ate Olivi Guuku a boro la. Yeezu yaa tom wa ŋaaŋviirɔma baye a 2weeni ba ayen, <<Nama a liŋ dɛ niŋ a cheŋ ga jo tɛŋ fiika po. Ni dan deri ga jo dula, ni le nya boniŋ ale ka biik ate ba bobi a zaani. Ni foli si a ta jam. 3Ni dan boro a foli si nuru ale bek ni ayen, <Ka boa ate nama a nye?> Ni weeni wa ayen ka ti Nyɔnɔ Yeezu Kirisita ale a yaali si. Ni dan weeni dila, wa le te ni suik ate ni foli si a ta jam.>>

4Yeezu weeni ba nya kude kama ate ku sak ayen dii ate Wen biisiteerɔma wanyi wa a ŋmarisi Wen Gbaŋka po dipo la a jam chim wensie. Wa ŋmarisi ayen, 5<<Weeni Zayon Liewa! Nya, fi naawa a cheena fi jigi. Wa nye ka nna ŋmam ŋmam ale dɔ boniŋ, kaai ale ka bonpaalik.>> (Zakaria 9:9)

6Wa ŋaaŋviirɔma bayewa yaa dɛ niŋ a cheŋ a ga nye dii ate Yeezu a weeni ba la. 7Ba yaa ga foli bonika ale ka biika a ta si a jam Yeezu jigi. Ba le ta si a ga paari wa la, ba yaa yeeri ba gattaŋa ti gela a vi bonpaalika chiaka zuk ate Yeezu yaa jueli a kali. 8Nuru boari yegayega yaa jam gilim ba ate ba gela a pai ba gatta a pati a dueni suiku po ayen Yeezu a ta wa bonika a cheŋ va ti zuk a taam. Ba gela mɛ a cheŋ suiku nakpiak a ga che tiisa vaata a pati a dueni suiku po. 9Ba le jam a bo suiku po a cheŋ ate baai a jam dɛ niŋka, ale baai mɛ a jam wari ŋaaŋka la, meena a yaa zuli wa ale a kaari ayen, <<Naawen vari ti a basi. Fi waai ale ka Deevid Nidoabinni la. Niaka a bo waai ale cheena Naawen yuenni nyiŋla. Fi, Naawen dii ale bo wenŋmazuk la, a vari ti a basi.>>#21:9 Yiila 118:25-26 10Yeezu ale ga jo Jerusalem tɛŋka po la, tɛŋka meena demma yaa deri ta tugurik ale chaab. Ba meena yaa jam a bek chaab ayen, <<Ka wana ale nuruwa de?>> 11Nuru boanni yaa weeni ba ayen, <<Nuruwa de ka Wen biisiteerɔwa Yeezu. Wa nyini ka Nazaret tɛŋ kaai ale bo Galili la.>>

12Yeezu yaa jo Wen yenni po a yiak geruŋdɔba ale daarɔba, ale zak baai ale a tagri ligraŋa ŋanzaanitaŋa ale baai la a da nangbaŋsa la zukpagliksaŋa a tulim kpib. 13Wa yaa weeni ba ayen, <<Ba ŋmarisi kama ayen, <Mi yenni ba le wi di ayen ka puusa yeri.> (Azaya 56:7) alege nama a pai di a chim zueba boka jigi.>> (Jeremaya 7:11)

14Nuruba yaa ta yeeba ale gbatta a jam Yeezu jigi Wen yenni po ate wa tebi ba. 15Kaabteerɔ kpaŋŋa ale Sinsak sagrɔma ale ga nya wakperikaliik sii ate wa tom la ale bisaŋa ale a pak wa Wen yenni po ale a weeni ayen, <<Ti a pak fi Deevid Nidoabinni,>> ba sue yaa puuri ale Yeezu. 16Ba yaa bek Yeezu ayen, <<Fi wom bisaŋa ale a weeni diila?>> Yeezu yaa weeni ba ayen, <<Mm, nama an karim ku le weeni dii ayen, <Bimbaansa ale buluata nɔi po fi gomsi ka pimpauk a magsi fidek.> >> (Yiila 8:2) 17Yeezu yaa basi ba alege cheŋ nyini tɛŋka po a cheŋ Betani a ga goa.

18Vari ale ŋman veenti la saluik, ba yaa basi Betani tɛŋka ale ge ŋman cheŋ Jerusalem tɛŋka ate kom yaa jam ta Yeezu. 19Wa yaa nya kiŋkaŋ ale ka za suiku nakpiak. Wa yaa cheŋ ka tɛŋ ayen wa nya ase ka ta moota ya ate wa dɛ, alege jaab a jam ka ka zuwa. Ka vaata nyiini ale jam boro. Yeezu yaa weeni kiŋkaŋka ayen, <<A nyini jinla danni a ta a cheŋ, fi kan ŋman yɔni yɔna.>> Wa le ga weeni dila la, kiŋkaŋka vaataŋa meena yaa deri jak ate ka kpi.

20Wa ŋaaŋviirɔma ale nya nyakude la, ku yaa chim wakperikaliik ba jigi. Ba yaa bek chaab ayen, <<Kiŋkaŋka a nye ka sɛ a deri kpi nna nwuli?>> 21Yeezu yaa tulisi ba ayen, <<Ni basi ate m weeni ni ayen nama a dan ta siaka ale mi ale ka chichama, nama le baga a tom dii ate mi a nye ale kiŋkaŋka la kama. Ni baga a weeni guuku de mɛ dek ayen ku yiti a cheŋ ga zaani nyakpiemu po ate ku sum nye dila. 22Nama dan ta siaka ale mi nalimnyiini ale a puusi a te Wen ayen wa te ni jaab, wa a te ni kama.>>

23Ba le ga paari Jerusalem tɛŋka po la, ba yaa ŋman jo Wen yenni po. Yeezu ale jam boro a sak nuruma la, kaabteerɔ kpaŋŋa ale Juuma nisɔmma yaa jam wa jigi a bek wa ayen, <<Ka wana ale te fu pagrimu de ate fi a tom tuimaŋa de? Ka wana ale te fu suik mɛ ate fi a nyiem jigi meena a tom tuimaŋa de?>> 24Yeezu yaa weeni ba ayen, <<Mi mɛ ta wari ayen m bek ni. M dan bek ni ate ni baga a tulisi mu, m le weeni ni waai ale te mu pagrimu ate mi a tom tuimaŋa de meena la. 25Jɔɔn ale jam a te nuruma soka la, a nyini ka wenŋmazuk yaa nuruba jigi ya?>> Ate ba ta nanpaga ale chaab ayen, <<Ti dan weeni ayen, <Ka wenŋmazuk,> wa le bek ti ayen, <Ka boa ale soa ate nama a ka siaka ale wa?> 26Alege ti dan weeni ayen, <Nurubisa jigi,> ti a chali ka nuruma yɔgsum dii nyiŋla ba a wi Jɔɔn ayen ka Wen biisiteerɔ.>> 27Ba yaa tulisi Yeezu ayen, <<Tama zɛ.>> Yeezu yaa weeni ba ayen, <<Mi mɛ a kan weeni ni pagrim buui ate mi ta a tom wieŋa de la.>>

28<<Ni wom dii ate mi ta ayen m weeni a sak ni la. Nuru wanyi ale jam boro a ta nidoabilisa baye. Dai yeŋ po wa yaa weeni nidoabili kpagni ayen, <Cheŋ ga kpa m talimu po jinla.> 29Wa yaa weeni wa ayen, <Mi kan yaali ayen m cheŋŋi.> Ku le nye magadek la, wa yaa ŋman tagri wa popola a cheŋ talimu. 30Ku an jam beniya ate kowa yaa cheŋ baaŋka jigi a weeni wa mɛ ayen wa cheŋ a ga kpa talimu po. Wala yaa siak, alege wa an cheŋ ya.>> 31Dula jigini Yeezu yaa bek Juuma ayen, <<Bisaŋa de bayewa, ka ba wana dek ale tom dii ate ba kowa a yaali la?>> Ba yaa weeni wa ayen, <<Ka kpagni.>> Yeezu yaa ŋman weeni ba ayen, <<Wensie ate mi a weeni ni, lampoo cheesirɔma ale nipok baai ale ka nidoa yaalisa la ale basi ba wabaataŋa abe ba dɛ ni niŋ a jo Wen naamu po. 32Jɔɔn Sokateerɔwa a jam kama ayen wa sak ni wayɔrisima suik kuui ate nama ayen ni va la, alege ni jam ka siaka ale wa sinsaŋŋa. Lampoo cheesirɔma ale nipok baai ale ka nidoa yaalisa la meena a jam ta siaka ale wa sinsaŋŋa kama. Nama dek a seba nya kude kama.

33<<Ni wom wamagsini di choa. Yeri nyɔnɔ ale jam kpa wa kaduk, a vuk tiisa ka po ayen si a yɔni. Wa yaa che daata a ti gilim ka meena ale tu goluk a magsi daam ŋmiaka ale sɛ yie woŋ. Wa ale nye dila a ga nueri la, wa yaa yaali nuruba ayen ba a limisi ka abe ba a tom ka po alege nyiem a cheŋ tɛŋ nna niŋniŋa.#21:33 Nya fotowa, Piilimka 9:20. 34Wa kadukka tiisaŋa yɔnaŋa pisika ale jam paari la, wa yaa tom wa tomteerɔba ayen ba ga tuesi yɔna ŋaai ate wa soa la nuruma jigi a ta jam te wa. Ba yaa cheŋ ba jigi.#21:34 Azaya 5:1-7 35Nuruma yaa yik ba a nak ba wanyi ale ko wanyi ale ge a pisi tana a yuk nwala mɛ. 36Kadukka nyɔnɔwa yaa ŋman tom wa tomteerɔma ba yega a gaam wa le poom a tom mbala diila, alege nuruma a ŋman nye ba mɛ ase mbala la dekdega. 37Ku ŋaaŋnyiŋ wa yaa tom wadek nidoabinni ale weeni ayen, <Ba le zuli m nidoabinni. 38Nuruma ale ga nya wa nidoabinni ale wa cheena la, ba yaa weeni chaab ayen, <Nidoabinni de kowa a dan jam kpi, wala ale wa tuesi wa ŋantaŋa meena. Ni basi ate ti ko wa, ate wa kowa a dan jam kpi abe tama a soa wa ŋantaŋa meena.> 39Ba yaa yik wa a ko a vuuri wa a ta nyini kadukka po a nyini peelim. 40Nama seba kadukka nyɔnɔwa le wa nye ba diila? Wa le jam ko ba kama abe wa ŋman pai wa kadukka a te nuru yonta.>> 41Ba yaa weeni Yeezu ayen, <<Wa le jam a yik ba kama a ko abe wa pai wa kadukka a ŋman te nuruba ba chaab, ate wa tiisaŋa yɔnaŋa pisika wein a dan paari, abe wa nya wa denni.>>

42Yeezu yaa weeni ba ayen, <<Nama an diem karim Wen gbaŋka ale weeni ayen, <Tain dii ate seerɔma a zɛri ayen di an nala la, tain dila dek ale tulim a chim tain maŋ. Naawen ale nye dila. Di ka wakperikaliik ti nina po.> (Yiila 118:22-23) 43Dila nyiŋ mi a weeni ni kama, Wen ale tuesi wa naamu ni jigi abe wa ŋman pai bu a te baai ale a tom tuimaŋsa la. 44Nuru waai a dan lo tintain dila zuk wa a ŋɔriŋ ka bunabuna, alege di be dan lo waai zuk, di le piak wa.>>#21:44 Azaya 28:16; Daniel 2:44-45

45Kaabteerɔ kpaŋŋa ale Farisiima ale wom dii ate Yeezu a biisi la, ba yaa deri miŋ ayen wa a biisi ka ba wie. 46Ba yaa jam a yaali ayen ba yik wa, alege ba jam a chali ka nuru boanni yɔgsum. Nuru boanni a jam a poli kama ayen Yeezu a jam ka Wen biisiteerɔma po wanyi.

Currently Selected:

Matiu 21: BWU

Highlight

Copy

Compare