Matiu 11

1Yeezu ale biisi ale wa ŋaaŋviirɔma pi ale bayewa a nueri la, wa yaa basi dula jigini ale ge cheŋ tɛŋ sii ale moata dula la ayen wa sak ba Wen wamaŋsaŋa wie.

2Jɔɔn Sokateerɔwa a diem jam bo ka naawa Ayerod dɔk kuui ate ba a lik nuruba la po. Jɔɔn ale wom dii ate Kirisitawa jam a tom la, wa yaa tom wa ŋaaŋviirɔma po ba gela ate ba cheŋ Yeezu jigi. 3Ba ale ga paari wa jigi la, ba yaa bek wa ayen, <<Ka fi ale nuru waai ate Jɔɔn a weeni ayen fi le jam la, yaa ti diema a limisi nuru yoŋŋoa?>> 4Yeezu yaa tulisi ba ayen, <<Ni ŋman pilim cheŋ a ga weeni Jɔɔn dii ate nama a wom ale nya la. 5Yeeba a nya, gbansa mɛ a baga a cheŋ, gama mɛ a nya nyiŋyɔgsa. Tukpara nyam a wom, ale nak kpieba a yiti. M be sak ŋanjaksa mɛ Wen wamaŋsaŋa wie.#11:4-5 Azaya 35:5-6, 26:19, 29:18-19, 61:1 6Nuru waai ale kaa jɔk wa siaka mi nyiŋ la, sui a peenti kama.>>

7Jɔɔn ŋaaŋviirɔma ale basi Yeezu ale a kuli la, Yeezu yaa deri piilim a biisi Jɔɔn wie ale nuru boanni, a bek ba ayen, <<Nama ale jam nyini cheŋ sagni po la nama poli ayen ni nya ka boa? Nama a poli ayen ni nya ka nuru ate wa a nye ase wuuk ate viok a fuk la? 8Nama a nyini cheŋ ayen ni nya ka boa? Nama a cheŋ dula ayen ni nya ka nuru waai ale jo garuk naliŋsa la? Baai ale a jo garuk tila chaama la a bo ka nalima yie po. 9Ka boa ale soa ate ni nyini? Ni nya biisiteerɔ yaa? Ni basi ate m weeni ni ayen ka waai ale gaam biisiteerɔ. 10Ka waai ate ba ŋmarisi wa wie Wen Gbaŋka po ayen, <<<Nya, m tom ka tintomdɔ waai ale wa gomsi suiku la ayen wa dɛ fi niŋ.>> (Malakai 3:1)

11<<Wensie ate mi a weeni ni, Jɔɔn Sokateerɔwa a gaam nuru baai meena ale jam boro a ta nyini dipo la kama, alege Wen naamu po waai ale ka baaŋ la a ŋman zuak a gaam Jɔɔn kama. 12A ta nyini diipo ate Jɔɔn a piilim a sak nuruba la a ta jam paari jinla, Wen naamu jam a nam kama, ate wɔkwɔk nuruba a tuesi bu ale pagrim. 13A ta nyini diipo ate Wen a liŋ pai wa Sinsaŋŋa a te Moosis la ale Wen biisiteerɔma meena ale jam a sak nuruba diila a ta jam paari Jɔɔn jamka mɛ nuruma de meena a biisi Wen naamu wie kama. 14Ni dan siak a te dii ate ba ŋmarisi la, ni le miŋ ayen Jɔɔn ka Wen biisiteerɔwa Elaja. Ba ŋmarisi Wen gbaŋka po ayen wa le ŋman pilim jam. 15Waai ale ta tue a wom la, a wom mi nalimnyiini.

16<<Ka boan jaab ate mi le pai a magsi chaab ale gaŋka de? Ba a nye se ka bisa ale tigsi chaab a kala yaba po a wi ba doaba a weeni ba ayen, 17<Tama peeri wiisa kama alege fi kan gɔgi? Tama be ŋman yi ka kuun yiila alege fi kan kumu?> 18Jɔɔn ale jan jam la, wa kan dɛ yaase wa a nyu, ate ni jam a weeni ayen, <Wa ta ka chichirik biok wa zuk po.> 19Mi Saalɔbiika ale jam, a dɛ ale a nyu ale nuruba la, ate ba jam a weeni ayen, <Ni nya nuruwa de. Wa ka puuk nyɔnɔ ale a nyu daam mɛ nna yegayega. Wa ka lampoo cheesirɔba ale wabanyeerisa doa.> Wen yammu a sak nuruba ka wa wensie suitaŋa tii ale ka tɔgatɔga la.>>

20Yeezu a tom wakperikaliisa yegayega tɛŋ sii ale moata la po, alege tɛŋ sila demma an diem a jam basi ba wabaataŋa. Wa yaa toariŋ ba ayen, 21<<Nama Koraziin demma ku le jam tua kama ni jigi. Nama Beteseida demma, ku le jam tua kama nama mɛ jigi. Ase mi a dan poom a tom wakperikaliisaŋa dɛ ka Taaya ale Saidon tɛŋsaŋa po ase mi ale tom dii nama jigi la, baai ale jam bo dula dipo la ate basi ba wabaataŋa kama. Ba ti jo ka boorisa gatta abe ba nye tintuem a yuk ba zuimaŋa. 22Alege mi a weeni ni Wen a dan jam ayen wa bo tɛŋzuk meena demma buusa wa le ta jiirim ale Taaya ale Saidon demma a gaam nama kama. 23Nama Kapernaum demma, nama a poli ayen ba le zak ni a ta jueli wenŋmazuwa? Nama ale siŋ ka kpiluŋ. Ase mi dan poom a tom wakperikaliisaŋa dɛ ka Sodom tɛŋka dipo, ase m le tom diila, Wen a kan bo ba buusa a kaasi ba. 24Wensie ate mi a weeni ni Wen a dan jam ayen wa bo tɛŋzuk meena demma buusa wa le ta jiirim ale Sodom demma a gaam ni.>>

25Va ŋala po Yeezu yaa weeni ayen, <<Mi a nye fi jiam m Koa, wenŋmazuk ale tɛŋzuk Naawen yaa, fi ale pai wieŋa de a suk yam nyam ale baai ale ta sebchakka ale pai ŋa a sak buluata. 26M Koa, ŋade ka fi ŋmantiika yaalika nyiŋ. 27M Kowa a pai jaabuuri meena a te mu kama. Nuru waai a zɛ Wen Nidoabinni, ka wa Kowa nyiini ale seba wa. Nuru waai mɛ a zɛ Kowa ka wa Nidoabinni nyiini ale seba wa. M basi kama ate baai ate m lueri la seba wa mɛ.

28<<Nama meena baai ale ji jib kpienta ale jiak la, ni jam mi jigi. Mi ale te ni vuusum. 29Mi sinsaŋŋa a nye se ka niiga diok la. Ni pai ku a su ni ŋeeŋa po ate ni baga. Mi ka nuru waai ale seba m dek taka la. Ni dan basi ate mi a sak ni, ni le nya vuusum. 30Diok kuui ate mi a pai a te ni la, ku ta cheŋka an tua. Jib tii ate mi a pai a ji ni la valima kama.>>

Currently Selected:

Matiu 11: BWU

Highlight

Copy

Compare