Malakai 3

1<<M le tom tomtomdɔwa ate wa gomsi suiku a te mu. Nyɔnɔwa waai ate ni a limisi la ale jam wa Yenni. Tomtomdɔwa waai ale ta nɔiyeŋka ate ni a yaali la ale jam.>> Naawen Dii Ale A Dɛ Tugurik Tɔŋdɔma Niŋ La ale weeni. 2Dila po wa waai a kan baga a boro. Wa dan jam waai kan vuugi. Wa a nye ase ka bolim buui ale dɛ a pai kutuk daŋta diila. A nye mɛ ase chi sugruŋ la, 3Wa a nye ase ka waai ale pai bolim a nyaliŋ kutuk peeluk a yeeri daŋta la. Wa nye Livai buuni ka dila a soti ba ase ligmɔniŋ ale kutuk peeluk la. Ate ba ta ba tiiritaŋa a jam Naawen jigi a magsi. 4Ate Naawen yaa tuesi Juda ale Jerusalem tiiritaŋa ase ku ale ka dii a nyini piilimka la.

5Naawen Dii Ale A Dɛ Tugurik Tɔŋdɔma Niŋ La ale weeni ayen, <<Ti wa yaa jam ni jigi a bo ni buusa. Baai ale a porisi ale a nye kaboŋsa ale baai ale a velim ale baai ale kaa tuni tuimtomdɔba ba tutuna ale a peri la, ale a vari pukɔga ale kpiŋsa ale baai ale kan nye nicham a magsi ale baai ale kaa zuli mi la m le biisi bo mini ba.

6Mi Naawen a kan tagri. Dila nama Jekob ŋaaŋbisaŋa an jam kpi ya. 7<<A ta nyini ni kokpieŋsaŋa daaŋa po ni an va mi ŋmarisika alege zɛri ka. Ni ŋman jam mi jigi ate mi mɛ ŋman jam ni jigi. Naawen Dii Ale A Dɛ Tugurik Tɔŋdɔma Niŋ La ale weeni. Ni le bek ayen, ti ti nye ka sɛ a ŋmani?

8<<Nuru a magsi wa a zu Wen yaa? Alege ni a zu mi. Ni le bek ayen ti nye ka sɛ a zu fu? Ni a zu ka tiirim buui ale magsi ni te mi ale ni kpanni ŋantaŋa baai ale saari piika la. 9Dila nyiŋ kikaasa a bo ni zuk, tɛŋka meena a zu mi kama. 10Ni ta ni ŋandiintaŋa piika meena a jam ŋandiintaŋa duenika yenni ate ŋandiinta a bo m yenni po. Mi Naawen Dii Ale A Dɛ Tugurik Tɔŋdɔma Niŋ La ale a weeni ayen ni nye mi a nya. M le lak wenŋmazuk tuataŋa a kpiiri niauŋ kuui meena ate ni a yaali la a te ni. 11M kan basi ate ŋan yirinta a dɛ ni kpanni ŋantaŋa. Mi Naawen Dii Ale A Dɛ Tugurik Tɔŋdɔma Niŋ La ale a weeni ayen ni yɔnaŋa a kan lo tɛŋŋa se ka ŋa nin muni a magsi gbesika. 12Tɛŋsa meena za ba wi ni ayen suipeentik nyam, dii nyiŋla ni tɛŋka ale masa.>> Naawen Dii Ale A Dɛ Tugurik Tɔŋdɔma Niŋ La ale weeni.

13Naawen yaa weeni ayen, <<Ni biisi wie ŋa an nala a te mu. Alege ni bek ayen, <Ti tin biisi fi wie ayen ka boa?> 14Ni weeni ayen, <Wen va ka a ka kiri. Ku an nala ale ti ale a zuli wa wieŋa yaase ti Naawen Dii Ale A Dɛ Tugurik Tɔŋdɔma Niŋ La ayen tama kaasi ale ti le nye diila. 15Ti a weeni kama ayen kanjanta nyam sui peenti kama. Wabaata nyam nye wie ate ŋa a niak kama. Ba a nak nanpaga ale Wen alege jaab a kan nye ba.> >>

16Alege baai ale a zuli Naawen la a biisi ale chaab kama, ate wa a wom ba. Baai ale a zuli Naawen la yue a ŋmarisi nyo ka gbaŋ po wa niŋ a doa a magsi teerika. 17Naawen Dii Ale A Dɛ Tugurik Tɔŋdɔma Niŋ La ale weeni ayen, Ka mi ale soa ba. Dai dila danni ba le chim ka mi dek nuruba. Ase ko ale ta jiirim ale wa bi kaai ale tom a te wa la, mi mɛ ale ta jiirim ale m nuruma. 18Ni yaa le nya abe ni baga a gaari nuru maŋsaŋa ale nuru baataŋa, nuru baai ale tom a te Wen ale baai ale kan tom a te wa la.

Currently Selected:

Malakai 3: BWU

Highlight

Copy