Malakai 1

1Wanni de ka wa dii ate Naawen a pai te Malakai ayen wa biisi a te Izirali demma.

2Naawen weeni ayen, <<Mi a yaali ni kama.>> Alege ni yaa bek ayen, <<Fi ti a yaali ti ka sɛ?>> Naawen yaa weeni ayen, Iisɔ ale Jekob jam daa suata? Mi jam a yaali Jekob kama, 3alege kisi Iisɔ. Mi jam kaasi wa tɛŋka ale ka guutaŋa jigini kama ate gɔi duŋsa yaa boro. 4Edom nuruma ale weeni ayen, ti tɛŋka kaasi kama alege ti ŋman cheŋ a ga sɛ ŋan baai ale kaasi la. Alege Naawen Dii Ale A Dɛ Tugurik Tɔŋdɔma Niŋ La a yaa weeni ayen, ba dan ŋman sɛ, m le kaasi ba ŋmana. Nuruma ale weeni ayen, Edom ka tɛŋ kaai nyeka ale toa. Naawen sui kasim a puuri ale Edom demma kama. 5Ni le nya wieŋa de ale nidek nina. Ate ni weeni ayen, <Naawen a zuaya a nyini Izirali a ga paari jigi meena.> >> 6Naawen Dii Ale A Dɛ Tugurik Tɔŋdɔma Niŋ La a weeni ayen, <<Biik a zuli wa ko kama, yɔma mɛ a zuli wa kpagi. Mi ka ko, alege ka boa ale soa ate ni kan zuli mi? Mi ka kpagi, ka boa ate ni kan zuli mi? Nama kaabteerɔma a kan zuli mi. Alege ni bek ayen, <Tama nye ka sɛ a kan zuli fu?>

7<<Dii ale a sak ayen ni kan zuli mi la, ni ta ka ŋandiin tii ale kan nala a jam a te mi. Ni ŋman bek ayen, boan le nye ate ŋantaŋa an nala? Ŋa an nala dii nyiŋla ni kan zuli mi kuŋkuŋku. 8Ni dan ta duŋ yioba a jam nye kaabka, ku an nala. Ni dan ta duŋ gbaŋsa ale duŋ yɔgnyieŋsa a jam a nye kaabka, ku an nala. Ni be pai bala a te ni tɛŋka kpagni, wa sui ale peenti ale ni? Wa ale siagi? Naawen Dii Ale A Dɛ Tugurik Tɔŋdɔma Niŋ La ale a weeni.

9Yɔgyɔgla de ni weeni ate Wen a ta jiirim ale ni, alege wa kan siak tuesi ni tiirimu. Naawen Dii Ale A Dɛ Tugurik Tɔŋdɔma Niŋ La ale weeni.

10<<Ni wanyi a dan poom lik Wen Yenni tuataŋa ate ni kan tɔti bolim tii ale kan ta kiri la mi kuŋkuŋku zuwa. Mi sui an peenti ale ni. M kan tuesi ni tiiritaŋa.>> Naawen Dii Ale A Dɛ Tugurik Tɔŋdɔma Niŋ La ale weeni. 11<<A zaani kori a ga paari yeri niŋ tɛŋsa meena ale zuli mi. Jigi meena ba le ta ŋan baai nyum ale masa ale tiirim maŋsa a jam te mi. Dii nyiŋla tɛŋsaŋa ale zuli mu.>> Naawen Dii Ale A Dɛ Tugurik Tɔŋdɔma Niŋ La ale weeni.

12<<Alege ni kan zuli mu. Ni weeni ayen Nyɔnɔwa jazaanimu an nala, dila la ŋandiintaŋa mɛ a ka kiri ya. 13Ni weeni ayen, nama a jiak kama ale dila meena nyeka, ate ni yaa zɛri ale kisika. Ate ni yaa pai duŋ sii ale kɔni, ale duŋ gbansa, ale duŋ sii ale a yuak a te mi ayen ni tiirim. Ni ta jam kama ase tiirim la alege mi kan tuesi.>> Naawen Dii Ale A Dɛ Tugurik Tɔŋdɔma Niŋ La ale weeni. 14<<Nuru waai ale a vari la ale nya kikaasa. Wa ta duŋ diok kama wa duŋsaŋa po a nyiem yaa puulim ayen wa pai te mi. Wa ŋman pai duŋ kaai ale ta wari la a te. Mi ka naab kpioŋ.>> Naawen Dii Ale A Dɛ Tugurik Tɔŋdɔma Niŋ La ale weeni. <<Tɛŋsa meena abe a chali mu kama.

Currently Selected:

Malakai 1: BWU

Highlight

Copy

Compare