Luuk 23
23
1Nisɔmma meena yaa yiti ta Yeezu a cheŋ Gominawa Paalɔt jigi. 2Juijui ate ba toariŋ wa a weeni ayen, <<Tama yik nuruwa de kama ale wa boro a paasi ti nuruma ayen ba kan a tuni ba lampoowa a te naab kpioŋku Siiza. Wa maari a weeni mɛ ayen wadek ale Kirisitawa, wa ka naab.>> 3Gominawa Paalɔt a yaa bek wa ayen, <<Ka fi ale Juuma naawa la?>> Yeezu yaa tulisi wa ayen, <<Fi ale weeni.>> 4Paalɔt yaa weeni kaabteerɔ kpaŋŋa ale nuru boanni ayen, <<Mi an nya nuruwa de kaasuŋŋoa.>> 5Ba yaa ŋmasi a biisi nna yegayega ayen, <<A zaani Galili tɛŋka a jam paari Judia tɛŋka a ta ga paari dela, wa kasim a sak nuruma kama ayen ba basi ate kaasuŋ jam.>>
6Paalɔt ale wom nna la, wa yaa bek ayen, <<Nuruwa de ka Galili denɔ?>> 7Paalɔt ale wom ayen Yeezu nyini ka juijui ate Naab Ayerod a jam a nya ka zuk la, wa yaa basi ate ba ta Yeezu a cheŋ wa jigi. Dila po wa Naab Ayerod dek a jam bo ka Jerusalem tɛŋka.
8Naab Ayerod ale nya Yeezu la, ku yaa peenti wa sui nna yegayega boan nyiŋŋa, wa kasim jam a yaali ayen wa nya wa dii nyiŋla, wa wom ka wa wari ate wa yaa jam a yiili ayen wa le nye wakperikaliik ate wa nya. 9Naab Ayerod yaa bek wa bega nna yegayega alege Yeezu an jam tulisi wa. 10Kaabteerɔ kpaŋŋa ale Sinsak sagrɔma a yaa za dula a toariŋ Yeezu ale nin muna. 11Naab Ayerod ale wa tugurik tɔŋdɔma a yaa nye Yeezu a la ale a nye wa jigi nna ase wa daa nuru la. Ba ale nye dila la ba yaa pai kasaauk naluŋ jo Yeezu ate Naab Ayerod yaa weeni ate ba ta wa ŋman cheŋ Paalɔt jigi. 12Da dila danni Naab Ayerod ale Paalɔt a deri dɛ doata ale chaab. Ba jam ka dachaasa alege ate nya kude a nye.
13Paalɔt yaa wi kaabteerɔ kpaŋŋa ale niŋdeerɔma ale nuruma meena jigi yeŋ, 14weeni ba ayen, <<Nama ale ta nuruwa de a jam mi jigi a weeni mi ayen wa a dak ka suik kaasuŋta a sak nuruma. Yɔgyɔgla de nama dek abe nya mi ale bek wa beŋŋa meena alege mi an nya dii meena ate nama weeni ayen wa kaasi la. 15Ayerod mɛ abe an nya wa wakaasuŋŋoa dii nyiŋla, ka wala ale basi wa ate wa jam tama jigi. Nuruwa de an nye wari a magsi kummoa. 16M be le basi kama ate m tugurik tɔŋdɔma miiri wa abe m basi wa ate wa cheŋ.>> 17Bena meena ba Gaambasika Tigini a nyiem dan jam paari ku nyiem a fɛ kama ayen Gominawa Paalɔt lak nuru waai ate wa tɛŋka demma a yaali ayen ba lak ate wa nyini likka dɔkku po a nyini la a basi.
18Alege ba yaa kaari ate ku jueli ayen, <<Ko nuruwa de abe fi lak Barabasi a te ti.>> 19Barabasi a jam bo likka dɔk ka wa ale jam maari a siti wɔkwɔk a ko nuru la nyiŋ. 20Paalɔt yaa ŋman biisi ale ba a yaali ayen wa yeeri Yeezu a basi. 21Alege nuruma a ŋman kaari ate ku jueli nna yegayega a weeni ayen, <<Kpi wa jabarim nyiŋ! Kpi wa jabarim nyiŋ!>> 22Dii ale a saari butawa la, Paalɔt yaa bek ba ayen, <<Ka boa? Ka boan jaab wabiok ate wa nye? Mi an nya wa dii ate wa kaasi a magsi wa kpi la. M le basi kama ate m tugurik tɔŋdɔma miiri wa abe m basi wa.>> 23Alege nuruma yaa ŋman kaari ate ku jueli nna yegayega a gaam dii ate ba poom kaari la a weeni ayen, ba kpi wa jabarim nyiŋ ate wa kpi. Ba kaarika de a jam basi kama ate ba nak dɛ. 24Paalɔt yaa siak bo buusa te ba 25a yaa lak Barabasi waai ale jam maa nye nɔiyeŋka ale wa tɛŋka demma a nye kpaliŋka a ko nuruba ate ba yik wa a lik la a te ba, Paalɔt yaa pai Yeezu a te wa tugurik tɔŋdɔma ayen ba nye wa dii ate ba a yaali la.
26Tugurik tɔŋdɔma a yaa ta Yeezu a cheŋ a yaa ga zik nuru wanyi ale wa cheena tɛŋka po. Wa yuei ale Simon. Wa jam nyini ka Sairini. Tugurik tɔŋdɔma yaa yik wa a fɛ wa ate wa ji Yeezu jabarimu a va wa ŋaaŋ.
27Nuru boari nna yegayega ale jam va wa. Nipooba ale jam maa bo ba po, a kum ale a fɔbili Yeezu nyiŋ. 28Yeezu yaa virim nya ba a weeni ba ayen, <<Jerusalem nipooba, ni kan a kum a te mi, ni a kum a te nidek ale ni bisaŋa. 29Dii nyiŋla, daa le cheena ate nuruba ale weeni ayen, <Nipok baai ale kan ka bisa la, baai ale kan biak nya la, baai ate bisa an ŋoosi la a ta niauŋ la.> 30Dila powa ale nuruba ale weeni guuk kpientaŋa ayen, <Ni lo ti zuk,> abe ba weeni guuk fiisaŋa mɛ ayen, <Ni lik ti.> (Yosea 10:8) 31Ase diokku ale yɔgsa alege ba a nye nna la, ka boa ale ku nye ase ku nin ko?>>
32Tuim kaasima nyam baye a te ba jam maa ta ba ale Yeezu a cheŋ ayen ba kpi ba.#23:32-49 Nya fotowa, Matiu 27:38-56.
33Ba ale jam paari juijui ate ba a wi ayen, <<Zukoluk Jigi La>>, ba yaa kpi wa jabarimu nyiŋ. Tuim kaasima nyama mɛ bayewa ba kpi wanyi a zaani wa juga, wanyi mɛ a zaani wa gala. 34Yeezu yaa weeni ayen, <<M Koa, vɔŋ te nuruma de dii nyiŋla, ba zɛ ba ale nye diila.>> Ba ale kpi wa la, ba yaa nak gbaŋ a lueri wa gattaŋa a chari chaab. 35Nuruma yaa za a nya wa, alege ba kpaŋŋa yaa nye wa a la a weeni ayen, <<Wa vari nuruba a basi, basi ate wa vari wadek a basi ase wa nin ka Wen Kirisitawa, Waai Ate Wa Lueri La.>> 36Tugurik tɔŋdɔma mɛ a jam a nye wa a la a pai damiisiŋ a te wa a nye ase ba a te wa ka zula la, 37ale a weeni ayen, <<Fi dan ka Juuma naab, be vari fidek a basi.>> 38Ba jam ŋmarisi ka jaab tapagi nyiŋ ayen, <<Ka Juuma Naawa Ale Nna,>> a yaa pai di a maŋ wa jabarimu zuk.
39Tuim kaasima nyama bayewa ate ba jam maa kpi ba a gum Yeezu po la, bala wanyi a yaa jam a lɛ wa ayen, <<Fi daa Kirisitawa? Be vari fidek ale tama mɛ a basi.>> 40Alege wa vaanchoawa a yaa toariŋ wa ayen, <<Fi kan chali Wen yaa ale ba ale nye ti meena bunyi diila? 41Ba ale nye tama diila, ku magsi kama dii nyiŋla, ka tama tuim kaasimaŋa tutuna ale nna ate ti boro a tuesi. Alege nuruwa de an kaasi wari ya.>> 42Wa biisi dila ale ge a yaa weeni ayen, <<Yeezu, fi dan jam fi naamu po, teeri m wari.>> 43Yeezu yaa weeni wa ayen, <<Wensie ate mi a weeni fu ayen jinla fi ale bo ale mu Wen jigi.>>
44Ku ale jam paari kantueŋ baŋ pi ale buye la, tɛŋka meena yaa jam nye legi nna kpitɔ a ta ga paari kantueŋ baŋ buta, 45ase wenbinni ale kan ŋman jam a nya la, ate garuk panni ale jam yik Wen yenni la a cheeri buye. 46Yeezu yaa kaari nna yegayega ate ku jueli ayen, <<M Koa, m pai m chiika a nyo fi nisima po.>> (Yiila 31:5) Wa ale weeni dila la, wa yaa deri kpi. 47Tugurik tɔŋdɔma kpagni ale jam za dula a yaa nya dii ale nye la, wa yaa te Wen pimpauk a weeni ayen, <<Nuruwa de a sum jam ka wayɔrisima nyɔnɔ.>> 48Nuru boari ale jan jam ayen ba nya dii le di nye la. Ba ale nya dii meena ale nye la ba yaa pilim ŋmani a kuli ale sui kaasuŋ. 49Baai meena ale jam seba Yeezu nalimnyiini a chak la, ale nipok baai mɛ ale jam va wa a nyini Galili a jam la, bala meena a jam za ka niŋniŋa alege a nya.
50Nuru ale jam boro wa yuei jam le Josefi. Wa jam ka nisɔmma tigsuŋku po nuru, wa jam ka nuru maŋ ale wayɔrisima nyɔnɔ. 51Wa nyini ka Arimatia Juuma tɛŋ kanyi ale la waai ale jam kan ta ba popolaŋa ale ba nyeelaŋa la, wa jam a yiili ka Wen naamu ayen bu jam. 52Josefi wade a jam cheŋ Paalɔt jigi a ga saalim wa ayen wa basi ate wa ga yeeri kpiewa jabarimu zuk. 53Wa ga yeeri wa a ta nyini jabarimu zuk a siŋ, a yaa pai garuk pali naliŋ a vili wa a ta wa ga gu piuŋ vɔrup ate ba keri la po. Kpio an jam duak bu po a nya ya. 54Da dila danni jam ka Gomsika dai ate Vuusum Danni mɛ a boro a piilim. 55Nipok baai ale jam va Yeezu a nyini Galili tɛŋka a jam la a yaa jam va Josefi a cheŋ ga nya vɔrumu ate Yeezu dua bu po diila 56ale ge a yaa pilim ŋmani a ga gomsi kpa masisa. Vuusum Danni a yaa ale jam paari la, ba vuusi kama ase ba sinsaŋŋa ale a sak ba diila.
Currently Selected:
Luuk 23: BWU
Highlight
Share
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation