Kaabka 5

1<<Nuru waai a dan nya wari yaase wa wom wari yaase wa seba wari ate ba mooli ayen wa jam a chim seerɔ a biisi ate wa zɛri, wa nye ka biem, ba le namsi wa.

2<<Nuru abe dan tiri jabuui ale daŋ la, yeri duŋ kpiuk yaase gɔi duŋ kpiuk yaase ŋankpiuk tii ale a cheŋ ba lɔga zuk la, wa dan poom kan seba alege wa daŋ kama ale nye kaasi.

3<<Yaase wa dan tiri nurubiik daŋta, jabuui ale a basi ate wa a daŋ la, wa dan poom kan seba, alege ŋaaŋnyiŋ wa miŋ wa kaasi kama.

4<<Nuru abe dan kan poli ya ale pɛ ayen wa nye wari, di ka nalim yaase biem, wa dan poom kan seba ale nye ya, wa dan miŋ wa kaasi kama.

5<<Waai dan nye wieŋa dii kaasi, wa weeni wa le nye ka biem la. 6Wa be ta nyemagsika tiirim a jam Naawen jigi a magsi biem buui ate wa nye la, wa ta pasari yaase buuk a jam ase biem tiirim la. Kaabteerɔwa ale nye biem duisi basika a te wa, wa biemu nyiŋ.

7<<Wa dan kan ta posukwa wa ta nangbaŋsa siye jam te Naawen wa biem tiirimu nyiŋ. Kanyi ka biem tiirim, kanyi mɛ meena juka tiirim. 8Wa ta si jam te kaabteerɔwa ate wa dɛ niŋ a pai kanyi a te biem tiirimu nyiŋ. Wa ŋmeeni ka zukku a ko, abe wa kan gebi ka zukku meena. 9Wa boori ziimu gela a basi juka kuŋkuŋku gauŋ. Ziim buui ale tali la, wa kpiiri meena a basi juka kuŋkuŋku tɛŋ. Ku ka biem tiirim. 10Kaabteerɔwa yaa pai nangbaŋ m kala a te Naawen ase meena juka tiirim la a va chaab ale ku le magsi wa nye diila. Ate ku nye biem duisi basika ate wa nya vɔŋteka.

11<<Ase wa dan kan ta nangbaŋsa siye a te, wa ta zom ale chin kpienni a jam ase biem tiirim la, wa kan pai kpaam yaase ŋan baai nyum ale masa la a nyoro, dii nyiŋla ku ka biem tiirim. 12Wa ta jam kaabteerɔwa jigi. Ate wa yaa nye nisa nɔi ate ku sak ayen ka mi ale soa a vi juka kuŋkuŋku zuk a ju te Naawen, ku ka biem tiirim. 13Suiku de po kaabteerɔwa ale nye biem duisi basika a magsi chaab ale biem buui ate wa nye la ate wa nya vɔŋteka. Tiirim buui ale tali la ka kaabteerɔwa ale soa ase ŋandiinta tiirimu ate wa soa diila.

14Naawen yaa weeni Moosis ayen, 15<<Waai dan zɛri Naawen nɔi a magsi chaab ale wa tuilum ŋanta alege an potim seba, wa ta padiak kaai ale kan ta jomi a magsi chaab ale kpana dii ate kaabteerɔwa a yaali la. Ku ka nyemagsika. 16Wa le kan nye magsi va ale tuilum jaamu la, wa tiirimu a dan poori ase bunu la, wa gum ase dila bunyi la du a pai meena a te kaabteerɔwa wa le nye biem duisi basika ale padiaka wa nyemagsika nyiŋ ate wa nya vɔŋteka.

17<<Waai a dan nye biem Naawen ale kisi dii wa sinsaŋŋa po la, alege zɛ wa diem tom kaasi kama, ba le namsi wa dila nyiŋ. 18Wa ta padiak ase nyemagsika tiirim la a jam te Naawen. Ka chim padiak kaai ale kan ta jomi a magsi chaab ale dii ate kaabteerɔwa a yaali la. Suiku de po kaabteerɔwa ale nye biem duisi basika wa tom kaasika nyiŋ ate wa nya vɔŋteka. 19Ka nyemagsika tiirim. Chivie ta wa kama, wa le kaasi Naawen la nyiŋ.>>

Currently Selected:

Kaabka 5: BWU

Highlight

Copy

Compare