Kaabka 20

1Naawen yaa biisi ale Moosis ayen, 2<<Weeni Izirali demma ayen, <Nuru waai a dan nyini Izirali yaase nichaanɔ a bo Izirali a pai wa biik a te Molek bɔglukku ba ko wa; tɛŋka nuruma a yuk wa ale tana a ko. 3Mi sui ale puuri ale nuru wala choa kama ate dila ale basi ate m yeeri wa a ta nyini wa nuruma po a nyini; wa le pai wa bisaŋa a te Molek bɔglukku la nyiŋ. Wa taŋ ka m yenni ale kaasi m yuei dii ale ta tuilum la. 4Ase tɛŋka demma a dan lik ba ninaŋa diipo ate nuruwa dɛ a pai wa biika a te Molek la a ni an ko wa, 5mi dek sui ale puuri ale nuru wala ale wa buuni meena abe m yeeri wa ale wa buuni meena a ta nyini ba nuruma po a nyini. Wa ale baai meena ale taŋ badek a va Molek bɔglukku la.

6<< <M sui le puuri ale nuru waai ale a tom sampoporinni ale chichirik wiirisa tuima a va bɔgluk yoŋta la, m le yeeri ba a ta nyini wa nuruma po a nyini.

7<< <Ni gaari nidek abe ni welema, dii nyiŋla, ka Mi ale Naawen ni Wenni. 8Ni ta m ŋmarisika abe ni a va ŋa. Mi ale Naawen dii ale basi ate ni welema la.

9<< <Ase ni po wanyi a dan ka te wa ko yaase wa ma, ku a magsi ka ba ko wa. Wa ka te ka wa ko ale wa ma, wa ziimu a va ka wadek.

10<< <Ase nuru waai a dan goa ale wa vaanchoa pok, baai ale goa ale chaab la, ka kaboŋ nyeerisa. Ba ko ba.

11<< <Nuru a dan goa ale wa ko pok wa pai ka wa kowa a nyo chivie po. Ku a magsi ka ba ko nipowa ale nidoawa, ba ziimu a va ka badek.

12<< <Ase nuru waai a dan goa ale wa sampok, ku a magsi ka ba ko ba nɔi bayema. Ba le nye diila ka butima. Ba ziimu a va ka badek.

13<< <Nuru waai mɛ abe dan goa ale nidoa ase ba le a goa ale nipooba diila, ba nɔi bayema a nye ka dii ale a kisi la, ku a magsi ka ni ko ba. Ba ziimu a va badek.

14<< <Ase nuru a dan faari nipok ale wa ma ku ka gaasa. Wala ale nipooma bayema ni ju ba ale bolim, ate dila ale basi ate gaasa a kan bo ni po.

15<< <Ase nuru mɛ a dan goa ale duŋ ni ko wa ale duŋka meena.

16<< <Nipok mɛ a dan goa le duŋ, ni ko nipowa ale duŋka meena, ku a magsi ka ni ko ba. Ba ziimu a va badek.

17<< <Nuru a dan faari wa toa, wa kowa lie yaase wa mawa lie ate ba goa le chaab, ku ka chivie, ku a magsi ka ba yeeri ba ba nyama dek nimbie po a ta nyini ba nuruma po a nyini. Wa an zuli wa toawa. Wa le nya ku tutuna.

18<< <Ase nuru a dan goa ale nipok waai ale a lo chiak la, wa dak nipowa chiaka lo ka a sak kama. Nipowa mɛ an suk wa dega. Bala ba nɔi bayema ku a magsi ka ni yeeri ba a ta nyini ba nuruma po a nyini.

19<< <Bi kan goa ale fi ma toa yaase fi kowa toa fi dan nye dila fi pai ka ni buuni nuru a nyo chivie po. Ni nɔi niyema ale nya ku tutuna kama.

20<< <Ase nuru a dan goa ale wa ko toa wa an zuli wa kowa suoku. Ba le nya ku tutuna kama. Ba le kpi alege an biak biiga.

21<< <Ase nuru a dan faari wa suok pok ku ka daŋta, wa pai ka wa suoku nyo chivie po. Ba mɛ ale kpi alege an biak biiga.

22<< <Ni ta m ŋmarisika ale m buusaŋa meena abe ni va ŋa, ate tɛŋ kaai po ate m ta ni cheena ayen ni bo ka po la a kan chiiri ni a basi. 23Ni be kan va tɛŋ sii ate mi a yiak ba a te ni la ŋiak wieŋa. Dii nyiŋla ba nye ŋade meena kama ate mi a zɛri ba. 24Alege m weeni ni kama ayen, ni le tuesi ba tɛŋka, m ale pai ka a te ni ase ni nitalim la. Ka ka tɛŋ kaai ate biisim ale siita a bo ka po la. Mi ale Naawen ni Wen dii ale poori ni a ta nyini tɛŋsaŋa po a nyini la.

25<< <Ku a magsi ka ni seba duŋ sii ale nala ale sii ale daŋ la a gaari, abe ni seba ŋan yirin tii ale daŋ ale tii ale nala la a gaari, abe ni kan taŋ nidek ale duŋ sii yaase ŋan yirin tii yaase ŋan baai ale a cheŋ poi nyiŋ a bo tɛŋka po la, ŋantaŋa de ka baai ate m poori ba ase baai ale daŋ la a te ni. 26Ni be welema a te mi dii nyiŋla mi Naawen m welema kama, ate m yaa poori ni a ta nyini tɛŋsaŋa po nyini ayen ni chim m dek nuruba.

27<< <Nidoa yaase nipok waai ale ka sampoporik yaase chichirik wiirik a bo ni po la ku a magsi ka ni ko wa. Ni yuk ba ale tintana. Ba ziimu a va ka badek.> >>

Currently Selected:

Kaabka 20: BWU

Highlight

Copy

Compare