Kaabka 16

1Naawen yaa biisi ale Moosis, Aaron nidoabilisaŋa bayewa ale kpi la ŋaaŋnyiŋ ba le kan tu Naawen a magsi la. 2Naawen weeni Moosis ayen, <<Weeni fi suoku Aaron ayen, wa kan jo jigi dii ale ta tuilum la, garuk panni ŋaaŋ biem duisi basika nanlikka niŋŋa diipo meena ate wa yaali la, dan kan daa di wa le kpi. Dii nyiŋla Mi pai m dek a sak chiŋmanni po ka biem duisi basika nanlikka zuk. #16:1-25 Nya fotowa, Nyinika 26:34.

3<<Aaron ale magsi wa jo Wen yenni po diila ale nna. Wa jo ale lalikbili a magsi biem tiirim ale padiak a magsi meena juka tiirim. 4Wa le jo tuilum garuk woŋ peeluk ale tɛŋ garuk peeta. Wa pai garuk pali peeluk a bobi wa chiaka abe wa vuk zutɔk peeluk. Gattaŋa de ka Naawen tuima gatta, dila nyiŋ wa so ale nyiam abe wa jo tuilum gatta. 5Izirali demma jigi wa tuesi budukta tiye a magsi biem tiirim ale padiak a magsi meena juka tiirim.

6<<Aaron a pai lalikka a te a magsi wadek biem tiirim a nye biem duisi basika a te wadek ale wa yenni demma. 7Abe wa pai bua ŋayewa a te Naawen Tuka Viuku nansuiŋka nɔi. 8Aaron yaa le nak gbaŋ a lueri bua ŋayewa ate Naawen a soa, abe kunyi a magsi biem ta chelim. 9Aaron yaa le ta buuk kuui ate gbaŋka a lo ku zuk la ate Naawen a soa la a jam nye kaabka ase biem tiirim la. 10Alege buuk kuui ate ba nak gbaŋka a lueri a magsi biem ta chelim la, ba ta ku vuta a jam Naawen niŋ ate ba pai ku a nye biem duisi basika. Ba le ta ku a ga basi ka gɔnni po ase biem ta cheŋka la.

11<<Aaron yaa le ta wadek biem tiirimu lalikka a jam nye biem duisi basika te wadek ale wa yenni demma. Wa le tɔgri lalikka a magsi wadek biem tiirimu. 12Wa le pai jaab waai ale a moak bolimu la a yeeri bolim kaala kuŋkuŋku zuk a sueri, a nye ŋan baai nyum ale masa la nisa nɔi buye a ta va garuk panni ŋaaŋ. 13Wa le pai ŋan baai nyummu ale masa la a nyo bolimu po Naawen niŋ, ate ŋan baai nyummu ale masa la nyuisaŋa a yiti lik biem duisi basika nanlikka nɔiyeŋ dakanni zuk, ate wa kan kpi. 14Wa le pai lalikka ziimu gela a pai nandub a tiak a misi biem duisi basika nanlikka zuk abe wa ŋman pai nandub a tiak a misi buyopɔi biem duisi basika nanlikka niŋ.

15<<Wa yaa le tɔgri biem tiirim buuku a te nuruma abe wa pai ziimu garuk panni ŋaaŋ a yaa nye dii dek ate wa nye ale lalikka ziimu la. Wa yaa misi ziimu gela biem duisi basika nanlikka zuk ale ka niŋ. 16Suiku de po wa le nye biem duisi basika a te jigi dii ale ta tuilum la, Izirali demma daŋtaŋa ale ba tuikpanni nyiŋ, ba biemu a dan poom ka dii ya. Wa le nye dila mɛ a te Tuka Viuku dii nyiŋla ku bo ka ba suŋsuŋ po. 17Diipo ate Aaron a jo jigi dii ale ta tuilum la ayen wa nye biem duisi basika la waai a kan bo Tuka Viuku po. Se ka wa nin nye biem duisi basika a te wadek ale wa yenni demma ale Izirali demma alege nyini.

18<<Wa yaa nyini kuŋkuŋku jigini a nye biem duisi basika a te di. Wa pai lalikka ziimu gela a sa kuŋkuŋku nyiilaŋa. 19Wa le misi ziimu gela ale wa nandub naŋtuok nɔi buyopɔi a duisi ate ku ta tuilum a nyini daŋ tii ale bo Izirali demma po la.

20<<Ase Aaron dan nye biem duisi basika a te jigi dii ale ta tuilum la, ale Tuka Viuku ale kuŋkuŋku a ga nueri, wa yaa ta buuk vuuku a jam niŋ. 21Wa pai nisaŋa meena a vi buuk vuku zukku zuk a weeni Izirali biemu ale ba gaasa ale ba tuikpari nyeka a basi ku zuk. Wa pai ku ate waai ale magsi wa ta ku ga basi gɔnni po la. 22Buuku ale ku ji ba wabaataŋa meena a ta cheŋ juijui ate nuruba ka la, ate nuruwa yaa basi ku gɔnni po.

23<<Aaron yaa le jo Tuka Viuku po a yeeri wa gattaŋa ate wa jo alege jo jigi dii ale ta tuilum la a dueni dula. 24Wa yaa so wa nyiŋka ale nyiam tuilum jigi, abe wa ge jo wadek gattaŋa. Wa yaa nyini a pai juka tiirimu a te magsi wadek abe wa pai juka tiirimu a te a magsi nuruma, a nye biem duisi basika te nuruma ale wadek. 25Wa le ju biem tiirimu kpapalaŋa mɛ ka kuŋkuŋku zuk.

26<<Nuru waai ale ta buuk kuui ale ta biem a cheŋ a ga basi gɔnni po la, a sugri wa gattaŋa abe wa so wa nyiŋka ale nyiam abe wa yaa nya suik a jam nuruma boka jigini. 27Lalikka ale magsi biem tiirimu la ale buuku ale magsi biem tiirimu la sii ziimu ate ba ta jam jigi dii ale ta tuilum la ayen ba nye biem duisi basika la a magsi ba ta nyini nuruma ale bo juijui la a nyini. Si gbanaŋa ale lantaŋa ale puusaŋa po ŋantaŋa ba ju ba. 28Nuru waai ale a ju ba la ku a fɛ ate wa sugri wa gattaŋa abe wa so wa nyiŋka ale nyiam. Kula ŋaaŋnyiŋ wa yaa jam nuruma jigi.

29<<Kude ka ŋmarisi kaai ale magsi ni kasim a va a ta cheŋ. Chiisa siyopɔiwa po ka daa piwa danni ni zɛri nidek ni kan tom tuini. Dan poom ka tɛŋka denɔ yaase nichaanɔ ale bo ale ni waai kan tom tuini. 30Dii nyiŋla danni de, ba le nye biem duisi basika a te ni ate ni nye cheri. Ate Naawen niŋ ni biemu a duisi basi ate ni nye cheri. 31Di ka vuusum dai, ate ni zɛri nidek. Ka ŋmarisi kaai ale magsi ni kasim a va. 32Kaabteerɔwa waai ate ba kpiiri kpaam a nyo wa zuk po a bobi wa ate wa a tuesi wa kowa tuimaŋa a chim kaabteerɔ kpioŋku la, abe nye biem duisi basika. Se wa pai garuk peelitaŋa, tuilum gattaŋa a jo. 33Wa nye biem duisi basika a te Wen dɔkku ale Tuka Viuku ale kuŋkuŋku ale kaabteerɔma ale tɛŋka nuruma meena.

34<<Kude ka ŋmarisi kaai ale magsi ni kasim va a cheŋ. Ni nye biem duisi basika a te Izirali demma biemu meena bunyi bein po.>> Ate ba nye a va Naawen ale weeni Moosis diila.

Currently Selected:

Kaabka 16: BWU

Highlight

Copy

Compare