Kaabka 1
1
1Naawen yaa bo Tuka Viuku po a wi Moosis a biisi ale wa. Wa yaa weeni wa ayen, 2<<Weeni Izirali demma ayen, ni waai a dan ta tiirim a cheen ni te Naawen, ni yeeri duŋ niiŋa po yaase piisaŋa ale buaŋa po.
3<<Juka tiirimu a dan ka naab buui ate ni a ju bu meena la tiirim ni yeeri lalik koluk kuui ale kan ta jomi ya. Wa ta jam te tuka jigini nansuiŋku ate Naawen a siak tuesi wa. 4Wa pai nisa a vi juka tiirim duŋ kaai ate ba le ju meena la zukku ate Naawen a siak a nye biem duisi basika a te wa. 5Wa yaa tɔgri lalik koluku Naawen niŋ ate Aaron nidoabilisaŋa, kaabteerɔma a tuk ziimu a boori basi kutuk kuŋkuŋku zuk kabtaŋa meena Tuka Viuku nansuiŋku. 6Wa yaa puli juka tiirim duŋka a boani ka. 7Kaabteerɔwa Aaron nidoabilisaŋa ale pai bolim a vi juka kutukku kuŋkuŋku zuk a yaa pai daata a vi du. 8Aaron nidoabilisaŋa kaabteerɔma ale pai lantaŋa ale zukku ale kpapalaŋa a vi daataŋa zuk. 9Wa yaa sugri duŋka ponni po ŋantaŋa meena ale naŋsaŋa. Kaabteerɔwa a yaa ju ba meena kuŋkuŋku zuk. Ka meena juka tiirim buui ale a ju ale bolim la. Nyummu abe masa kama a te Naawen.
10<<Tiirimu a dan ka tiirim buui ate ni le ju bu meena la wa lueri piisaŋa po, yaase booŋa po, jaduok kuui ale kan ta jomi la. 11Wa tɔgri duŋka juka kutukku kuŋkuŋku wiiluk geŋka Naawen niŋ, ate Aaron nidoabilisaŋa kaabteerɔma a pai ziimu boori basi juka kuŋkuŋku kabtaŋa meena. 12Wa boani duŋka a gebi zukku ale kpapalaŋa tɔgatɔga ate kaabteerɔwa a gomsi bu vi daataŋa zuk tii ale a dɛ kuŋkuŋku zuk la. 13Wa sugri duŋka ponni po ŋantaŋa ale naŋsaŋa ale nyiam. Ate kaabteerɔma yaa pai ba meena a ju juka kuŋkuŋku zuk. Bu ka meena juka tiirim, ba te ale ka bolim, buui nyum ale masa a te Naawen la.
14<<Tiirimu a dan ka kiŋkaŋŋa ŋanta ate wa yaa ayen wa ju bu meena te Naawen, wa pai nangbaŋ yaase kawuruk. 15Kaabteerɔwa yaa ta nangbaŋka yaase kawuruku jam juka kuŋkuŋku zuk, a ŋmeeni zukku a gebi a ju juka kuŋkuŋku zuk. Wa basi ate ka ziimu a nyini a nyo juka kuŋkuŋku zuk. 16Abe wa yaa yeeri fɔnni meena a pai yuk basi juka kuŋkuŋku kori geŋka, ate tintuemu doa la. 17Wa yaa mobi ka a lagri kiŋkaŋŋa. Wa kan lagri meena. Kaabteerɔwa le juka kuŋkuŋku zuk. Bu ka meena juka tiirim, ba te ale ka bolim, buui nyum ale masa a te Naawen.
Currently Selected:
Kaabka 1: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
