Josua 2

1Josua Nun nidoabinni a yaa jam basi nidoaba baye ate ba nyini Sittim ayen ba ga kpesi nya tɛŋka. Wa weeni ba ayen, <<Ni cheŋ a ga kpesi nya Jeriko tɛŋka tɛŋ kaai dek ate ba a wi ayen Jeriko la.>> Ba yaa cheŋ a ga jo nidoa yaalik yeri po wa yuei a jam le Arayab.

2Nuruma yaa jam weeni Jeriko naawa ayen, <<Nya dɛ Izirali demma gela ale jam dela yokku de ayen ba kpesi nya ti tɛŋka.>> 3Ate Jeriko naawa a yaa tom nuruba Arayab jigi ayen, <<Ta nuru baai ale jam bo fi yenni po la a jam, dii nyiŋla ba jam kama ayen ba kpesi a nya ti tɛŋka meena.>>

4Alege nipowa dɛ a jam pai nidoama de bayewa a suk kama. Wa jam weeni ba kama ayen, <<Mm, nuruma a jam ka mi jigi, alege mi zɛ ba le nyini ka kauk kuui la. 5Ase tɛŋka ale sobi la, diipo ate ba lik tuoku la nuruma a nyini kama. Mi zɛ ba le va suik kuui la. Ni saŋ ba ŋaaŋ nwuli da dii dai ni le paari ba suik.>> 6Alege Arayab a jam pai nidoama de bayema a suk ka sampok zuk. 7Ate nuruma a yaa jam gisi nidoama de bayema a va suik kuui ale a cheŋ Jodan benni la. Ase nuruma de ale bo gisika po la ba yaa lik tuataŋa.

8Alege ate nidoama de bayema duek tɛŋ yok kula la, Arayab a yaa jueli ba jigi 9a yaa weeni ba ayen, <<Mi seba kama ayen Naawen a pai tɛŋka de ate ni kama ate tama a chali ni yɔgsum, ate nuru baai meena ale bo tɛŋka de po la nyiŋsaŋa a gɔk nama nyiŋ. 10Ti wom Naawen ale basi ate Nyakpiem Mɔnuŋku a kpeeri ate ni lo jueli, diipo ate ni jam nyini Ejipiti po a nyini la, ale ni le jam nye Amori nalima ŋaye Siyon ale Og ale jam bo Jodan benni kori geŋsa baai ate nama kaasi ba la. 11Tama ale jam wom diila, ti nyiŋsaŋa a jam a gɔk kama ate waai meena a jɔk nyiŋbiiri nama nyiŋ, dii nyiŋla Naawen ni Wenni ka Wen a bo wenŋmazuk ale tɛŋzuk de. 12Yɔgyɔgla de ni be pɛ a te mu Naawen yuenni nyiŋ ayen ni le sak jiirim ale m dɔkdemma dii nyiŋla, mi ale sak jiirim ale ni la nyiŋ. Ni nye wari ate ku a sak ayen, 13ni kan ko m kowa ale m mawa ale m suataŋa ale m toama ale ba nuruma ale baai meena ale moata ba la ate ni basi ate ti kan kpi.>>

14Ate nidoama bayema a yaa weeni wa ayen, <<Wen a ko ti ase tama dan zɛri an nye dii ate tama a weeni fu la. Fi mɛ a dan kan weeni a sak waai tama ale a yaali ti nye diila. Ti a puulim kama ayen Naawen a dan pai tɛŋka de a te ti, ti le nye fu a magsi.>>

15Arayab a jam bo ka yeri dii ate ba jam sɛ di tɛŋka parika zuk. Wa jam pai ka miik ate nuruma yik ka a va wa dɔkku tuokparuku a zi. 16Wa yaa weeni ba ayen, <<Ni jueli guutaŋa zuk ate baai ale a gisi ni la a kan nya ni. Ni suk dula jigini a paari daa ŋata ate ba yaa dan ŋman kuli a bi ni yaa cheŋ.>>

17Nidoama de bayema yaa weeni wa ayen, <<Pɛka dɛ ate fi basi ate ti nye la, a kan nye ti wari ya, 18nin ka diipo ate tama ale ŋman pilim jam tɛŋka po, a nya ale fi pai miik mɔnuŋ a bobi tuokparuk kuui ate fi a basi ate tama a va du a nyini la nyiŋ. Maa basi ate fi kowa ale fi mawa ale fi suataŋa ale fi kowa yenni demma meena a bo fi yenni po. 19Ase waai a dan nyini fi yenni po a nyini peelim wa ziimu a va wadek, dila an nya tama, alege waai a dan bo yenni po ale fu alege kpi wa ziimu a va tama. 20Alege fi dan weeni a sak waai tama ale nye diila, pɛka a kan nye tama wari ya.>>

21Wa yaa siak ale basi ate ba cheŋ. Ase ba le cheŋ a ga nueri la, wa yaa pai miik mɔnuŋka a bobi tuokparuku nyiŋ.

22Ase ba le cheŋ la, ba yaa jam boka guutaŋa zuk a paari daa ŋata, ate baai ale bo suiku po a gisi ba la a ŋman kuli ale an nya ba. 23Ate nidoama bayewa a yaa jam ŋman kuli. Ba jam basi guutaŋa, a lo Jodan benni a jueli jam Nun nidoabinni Josua jigi a weeni wa dii meena ale jam nye ba la. 24Ba yaa weeni Josua ayen, <<Naawen a sum pai tɛŋka meena a nyo ka ti nisa po. Nuruma meena nyiŋsaŋa a gɔk kama tama nyiŋ.>>

Currently Selected:

Josua 2: BWU

Highlight

Copy

Compare